Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2015

 TOPICO PRINCIPAL | KICO DIOS TA PENSA DI GUERA?

Dios Su Punto di Bista Tocante Guera den Antiguedad

Dios Su Punto di Bista Tocante Guera den Antiguedad

E pueblo tabata sufri hopi maltrato. Constantemente nan tabata haci oracion na Dios pa nan haya yudansa, pero Dios no a contesta nan oracionnan di biaha. Di ken nos ta papiando? Di e Israelitanan, e pueblo di Dios den pasado. Y ken tabata maltrata nan? E nacion poderoso di Egipto. (Exodo 1:13, 14) Pa hopi aña e Israelitanan a warda pa Dios pone un fin na nan sufrimento. Pero finalmente e tempo a yega pa Dios tuma accion. (Exodo 3:7-10) Bijbel ta bisa cu Dios a bringa personalmente contra e Egipcionan. Dios a manda Dies Plaga devastador riba Egipto y a destrui farao y su ehercito den Lama Cora. (Salmo 136:15) Di e manera ey, Jehova Dios a demostra di ta “un guerero” pa su pueblo.—Exodo 15:3, 4.

E echo cu Dios mes a bringa contra e Egipcionan ta mustra cu e no ta contra tur guera. Na varios ocasion, el a duna su pueblo Israel permiso pa bay guera. Por ehempel, Dios a manda nan bringa contra e Cananeonan, kendenan tabata sumamente malbado. (Deuteronomio 9:5; 20:17, 18) Tambe el a duna ordo na Rey David pa bay bringa contra e Filisteonan, kendenan tabata hopi cruel. Dios hasta a bisa David ki strategia pa uza pa nan gana e bataya.—2 Samuel 5:17-25.

E relatonan biblico aki ta mustra cu Dios a aproba guera ora otro nacion tabata oprimi y maltrata e Israelitanan. Pakico el a haci esey? Pa proteha su pueblo y pa proteha adoracion berdadero. Pero tin tres punto importante cu nos tin cu tene na mente ora Dios autorisa un guera. Kico nan ta?

  1. DIOS SO TABATA DETERMINA KEN LO BAY GUERA. Na un ocasion, Dios a bisa e Israelitanan: “Boso no tin mester di bringa den e bataya aki.” Dicon no? Pasobra Dios mes lo a bringa pa nan. (2 Cronicanan 20:17; 32:7, 8) Y el a haci esey hopi biaha, manera nos a menciona na principio di e articulo aki. Pero na otro ocasionnan, Dios a duna ordo pa su pueblo mes bringa den guera. Jehova Dios a laga nan haci esey pa nan conkista y defende e Tera Priminti.—Deuteronomio 7:1, 2; Josue 10:40.

  2. DIOS SO TABATA DETERMINA KI ORA UN GUERA ASINA LO TUMA LUGA. E sirbidornan di Dios mester a warda cu pasenshi te ora Dios duna nan ordo pa bringa contra e nacionnan malbado cu  tabata rond di nan. Esey kiermen cu nan no tabatin mag di bay den bataya sin Dios su permiso. Si nan a haci esey toch, nan lo a perde Dios su aprobacion. En realidad, Bijbel ta mustra cu ora e Israelitanan a tribi di bay guera sin Dios su autorisacion, e consecuencia tabata desastroso. *

  3. Aunke Dios a bringa contra e Cananeonan den guera, el a scapa bida di algun hende, manera Rahab y su famia

    DIOS NO TA DESEA PA NIUN HENDE MURI, NI SIKIERA HENDE MALBADO. Jehova Dios ta e Fuente di bida y Esun cu a crea hende. (Salmo 36:9) Pesey, e no ta desea pa niun hende muri. Lamentablemente, tin hende cu ta traha complot pa maltrata y hasta mata otro hende. (Salmo 37:12, 14) Pa stop maldad, tin biaha Dios a autorisa su sirbidornan pa bringa contra e malbadonan. Sinembargo, tur biaha cu el a manda su sirbidornan bay bringa den guera, el a mustra misericordia y pasenshi na e enemigonan di Israel. (Salmo 86:15) Por ehempel, prome cu e Israelitanan declara guera contra un nacion, nan mester a “ofrec’e paz.” Pakico? Pa duna nan un oportunidad pa cambia nan pensamento y evita un conflicto. (Deuteronomio 20:10-13) Di e manera aki, Dios a demostra cu e “no tin placer den e morto di e malbado, ma mas bien cu e malbado bira for di su caminda y biba.”—Ezekiel 33:11, 14-16. *

Manera nos a caba di wak, den pasado Dios a considera guera como un medio valido pa caba cu opresion y maldad. Pero tabata Dios—y no hende—kende tabata determina ken lo bay guera y ki ora un guera asina lo tuma luga. Acaso e gueranan ey tabata cruel y sangriento? Absolutamente cu no! En realidad Dios ta odia violencia. (Salmo 11:5) Pero e pregunta ta, Dios su punto di bista tocante guera a cambia ora su Yiu, Hesucristo, a cuminsa su sirbishi den e prome siglo?

^ par. 7 Por ehempel, na un ocasion, Dios a ordena e Israelitanan pa no bringa contra e Amalekitanan y e Cananeonan. Pero nan a haci esey toch. Como consecuencia, nan a sufri un derota aplastante. (Numbernan 14:41-45) Hopi aña despues, fiel Rey Josias a bay den bataya sin autorisacion di Dios. E decision imprudente aki a cost’e su bida.—2 Cronicanan 35:20-24.

^ par. 8 E Israelitanan no a ofrece paz na e Cananeonan prome cu nan a bay bringa contra nan den guera. Dicon no? Pasobra Cananeonan a haya 400 aña pa cambia. Ora cu e Israelitanan a bay bringa contra nan, ya no tabatin niun speransa mas cu nan lo cambia nan actitud. (Genesis 15:13-16) Pesey, Dios a destrui nan. Sinembargo, Dios a scapa bida di e Cananeonan cu si a cambia nan conducta.—Josue 6:25; 9:3-27.

Mas Informacion

E TOREN DI VIGILANCIA

Dios A ‘Declara Rahab Husto pa Medio di Obra’

Con e storia di Rahab ta mustra cu pa Jehova ningun di nos no ta insignificante? Kico nos por siña di su fe?