Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2015

 BIJBEL TA CAMBIA BIDA DI HENDE

Mi A Kere Cu Mi Tabata Disfrutando di Mi Bida

Mi A Kere Cu Mi Tabata Disfrutando di Mi Bida
  • NACI NA AÑA: 1982

  • PAIS NATAL: POLONIA

  • SU PASADO: TABATA VIOLENTO, TABATA UZA DROGA Y KIER A SIGUI UN CARERA PROFESIONAL

MI PASADO:

Mi a nace na un pueblito na Polonia, no mucho leu for di e frontera di Alemania. Como cu mi a lanta den un area caminda tabatin boerderij y mondi, mi tabatin un bida trankil. Mi kerido mayornan a anima mi pa mi ta un bon hende, un bon studiante y pa mi bay universidad pa mi por tin un bon futuro.

Mi problemanan a cuminsa ora mi a bay studia ley na un universidad na e ciudad di Wroclaw. Mi tabata leu for di cas, y mi a scoge mal amigo. Semper mi a gusta futbol, pero bou di influencia di mi amigonan nobo, mi a bira un fanatico. Mi team faborito tabata di Varsovia (capital di Polonia), y den weekend mi tabata bay wak wega sin importa na unda nan tabata hunga. Hopi biaha nos tabata bebe di mas, droga y tin biaha nos tabata bringa cu e fanaticonan di e otro team. Mi a pensa cu di e manera aki lo mi por a baha mi stress, maske mi tabata sa cu si polis aresta mi, esaki lo por a pone un fin na mi carera.

Ami cu mi amigonan tabata gusta bay discoteca. Despues di esey, casi tur ora nos tabata haya nos mes ta bringa riba caya. Polis a aresta mi varios biaha, pero semper mi tabata logra saca mi curpa pa mi no haya problema serio cu husticia. Tin biaha mi tabata logra esey door di duna nan placa bou di mesa. Mi a kere cu mi tabata disfrutando di mi bida, pero den fondo di mi curason mi tabata sa cu loke mi tabata haci ta malo. Pesey mi tabata bay misa tur diadomingo pa mi consenshi stop di molestia mi.

BIJBEL A CAMBIA MI BIDA:

Na aña 2004, dos testigo di Jehova a bishita mi, y mi a acepta pa nan papia cu mi tocante Bijbel. Na momento cu mi a haya sa kico ta nifica ser un berdadero cristian, mi consenshi a cuminsa remorde. Mi tabata sa cu mi mester a stop di bebe di mas, stop di uza droga y stop di asocia cu hende cu no tabata biba na harmonia cu principio biblico. Tambe mi a ripara cu mi mester a cambia mi conducta agresivo y violento. Aunke mi tabata sa esey, toch mi a sigui cana den mal caminda.

Pero riba un anochi tur cos a cambia ora mi a cuminsa bringa cu ocho homber. Mi ta corda cu mientras mi tabata benta riba caya, nan a sigui dal mi y scop mi den mi cabes. Mi a pensa cu mi ta bay muri, pesey mi a haci oracion na Jehova y a pidie pordon cu mi no a tuma su Palabra na serio. Mi a primintie cu si mi sobrevivi, lo  mi cuminsa studia Bijbel cu testigo di Jehova y haci cambio den mi bida. Casi mi no por a kere, pero mi a sobrevivi. Y mi a cumpli cu mi promesa pa studia Bijbel cu e Testigonan.

Na aña 2006, mi a bay biba na Inglatera. Mi meta tabata pa gana suficiente placa pa mi por a bay bek Polonia y sigui studia ley na universidad. Pero ora mi tabata studia Bijbel, tabatin un texto cu a haci un impacto profundo riba mi. Apostel Pablo a skirbi: “Di berdad mi ta considera tur cos como perdida pa motibo di e conocemento tocante Cristo Hesus, mi Señor, cu ta di mucho mas balor. Pa motibo di dje mi a acepta perdida di tur cos y ta considera nan como cos di benta afo, a fin cu mi por gana Cristo.” (Filipensenan 3:8) Ami cu apostel Pablo tabatin dos cos en comun: Nos a studia ley y nos tabata hopi violento. (Echonan 8:3) Pero despues Pablo a compronde cu tabatin un mihor manera pa biba, esta, sirbi Dios y sigui e ehempel di Hesus. Ora mi a medita riba e ehempel di apostel Pablo, mi a realisa cu ni un trabou cu ta paga bon ni un conducta violento lo no haci mi berdaderamente feliz. Mi tabata convenci cu si Pablo por a cambia, ami tambe por. Pesey mi a dicidi di keda Inglatera y no sigui studia ley.

Mas mi a siña di Jehova, mas mihor mi relacion cu ne a bira. Ora mi a siña cu e ta dispuesto pa pordona esnan cu di berdad kier haci cambio, esaki a touch mi curason. (Echonan 2:38) Y ora mi a medita riba e texto di 1 Juan 4:16 cu ta bisa cu “Dios ta amor”, mi a compronde pakico Dios ta odia violencia.

Mi tabata mira con feliz e Testigonan ta, y pesey mi tambe kier a forma parti di nan hermandad

Tambe mi a keda impresiona cu e bon conducta di e testigonan di Jehova. Bo por a mira claramente cu nan ta haci esfuerso pa biba na harmonia cu principio di Bijbel. Mi tabata mira con feliz e Testigonan ta, y pesey mi tambe kier a forma parti di nan hermandad. Mi a haci hopi esfuerso y cambio den mi bida. Y na aña 2008, mi a batisa y a bira un testigo di Jehova.

Ami cu Esther ta haya berdadero goso ora nos siña hende cu ta papia Polaco tocante Bijbel

E BENEFICIONAN:

Bijbel a transforma mi bida. Antes mi tabata ambicioso, violento, adicto na droga, burache y fanatico di futbol. Pero awor mi ta un sirbidor di Jehova cu ta gusta siña otro hende tocante Bijbel. Ainda mi gusta wak futbol, pero mi ta haci mi best pa mantene diberticion na su debido luga.

Mi ta felizmente casa cu Esther, un bunita sirbidor di Jehova. Nos ta sirbi na e parti noordwest di Inglatera, y nos ta haya berdadero goso ora nos siña hende cu ta papia Polaco tocante Bijbel. Pa prome biaha den mi bida, mi tin berdadero satisfaccion. Mi tin un consenshi limpi y mi bida ta yen di proposito.