Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  October 2015

 BIJBEL TA CAMBIA BIDA DI HENDE

Awor Si Mi Ta Sinti Cu Mi Por Yuda Otro Hende

Awor Si Mi Ta Sinti Cu Mi Por Yuda Otro Hende
  • NACI NA AÑA: 1981

  • PAIS NATAL: GUATEMALA

  • SU PASADO: UN NIÑEZ TRAUMATICO

MI PASADO:

Mi a nace na Acul, un pueblito isola den e montañanan di e parti west di Guatemala. Y mi famia ta pertenece na un grupo etnico cu yama Ixil; nan ta descendiente di e Mayanan. Mi ta papia Spaño y nos idioma indjan. Y mi a crece den un periodo sumamente violento durante e guera civil di Guatemala cu a dura 36 aña largo. Durante e periodo ey hopi di e Ixilnan a muri.

Ora mi tabatin cuater aña, mi ruman homber kende tabatin shete aña tabata hungando cu un handgranaat cu a explota accidentalmente. Como consecuencia, mi a bira ciego, y lamentablemente mi ruman homber a perde su bida. Despues di e accidente, mi a keda na un instituto pa mucha ciego na e Ciudad di Guatemala caminda mi a siña Braille. Mi a pasa henter mi niñez na e instituto ey. E hendenan cu tabata traha eynan a prohibi mi di papia cu e otro muchanan y mi compañeronan tabata ignora mi. Esaki ta algo cu nunca mi no a compronde. Tur ora mi tabata sinti mi mi so, pesey tur aña mi tabata anhela pa e dos lunanan cu mi tabata pasa cerca mi mama yega pa caba. Mi mama semper tabata masha cariñoso. Pero lamentablemente, mi mama a fayece ora mi tabatin dies aña. Esey tabata un golpi hopi duro pa mi, pasobra mi a sinti cu mi a perde e unico persona cu tabata stima mi.

Ora mi tabatin 11 aña, mi a bay bek na e pueblito caminda mi a nace pa biba cu mi ruman homber parti tata y su famia. Nan a percura pa mi necesidadnan fisico, pero ningun hende no por a yuda mi emocionalmente. Tin biaha, mi tabata sclama na Dios: “Pakico mi mama a muri? Dicon mi ta ciego?” Nan tabata bisa mi cu tur e cosnan aki ta boluntad di Dios. Anto esey a pone mi pensa cu Dios ta inhusto y sin sintimento. Si mi tabata por a mata mi curpa, lo mi a haci esey.

Door cu mi tabata ciego, mi tabata fisicamente y emocionalmente vulnerabel. Ora mi tabata mucha, nan a abusa sexualmente di mi na varios ocasion. Mi nunca a bisa niun hende nada pasobra mi a pensa cu nan lo no worry toch. Casi niun hende no tabata papia cu mi, y ami no tabata papia cu niun hende tampoco. Mi tabata deprimi y mi tabata isola mi mes, y mi no tabata confia niun hende.

BIJBEL A CAMBIA MI BIDA:

Ora mi tabatin 13 aña, dos testigo di  Jehova (un pareha casa) a acerca mi na scol durante pauze. Un di e juffrouwnan na mi scol a haya duele di mi y a pidi nan pa bishita mi. Nan a mustra mi dos promesa cu tin den Bijbel, esta cu den futuro e mortonan lo resucita y cu e ciegonan lo mira atrobe. (Isaias 35:5; Juan 5:28, 29) Mi a gusta loke nan tabata siña mi. Pero tabata dificil pa mi papia cu nan pasobra mi no tabata custumbra di papia cu hende. Aunke mi tabata hopi cera, nan tabata masha cariñoso y nan tabatin hopi pasenshi cu mi, y pesey nan a sigui bishita mi pa mi haya sa mas tocante Bijbel. E pareha aki mester a cana mas cu 10 kilometer y hasta a subi sero pa yega na mi pueblito.

Mi ruman homber a bisa mi cu nan tabata bisti nechi pero bo por a mira cu nan no tabata hende di placa. Pero semper nan tabata mustra interes den mi door di trece regalito pa mi. Mi tabata convenci cu solamente cristian berdadero lo haci e tipo di sacrificionan ey.

Mi a studia Bijbel uzando publicacionnan na Braille. Aunke mi tabata compronde loke mi tabata siña, tin cos cu tabata dificil pa mi acepta. Por ehempel, tabata dificil pa mi kere cu Dios realmente ta interesa den mi, y cu otro hende por mustra e mesun interes ey den mi. Mi a compronde pakico Dios ta permiti maldad, pero tabata dificil pa mi mir’e como un Tata amoroso. *

Gradualmente, loke mi a siña for di Bijbel a yuda mi cambia mi punto di bista. Por ehempel, mi a siña cu Dios ta sinti hopi duele di hende cu ta sufri. Relaciona cu su sirbidornan cu a ser maltrata, Dios a bisa: “Siguramente mi a mira e afliccion di mi pueblo ... Mi ta consciente di nan sufrimentonan.” (Exodo 3:7) Ora cu mi a siña conoce Jehova su bunita cualidadnan, esey a conmove mi pa dedica mi bida na dje. Y na aña 1998, mi a batisa y mi a bira un testigo di Jehova.

Mi a bay biba cerca e ruman aki y su famia

Mas o menos un aña despues di mi bautismo, mi a tuma un curso pa hende ciego cerca di e stad Escuintla. Un di e rumannan homber cu ta dirigi un congregacion na Escuintla a haya sa con dificil tabata pa mi asisti na e reunionnan na Acul. E cos ta cu tabata hopi dificil pa mi yega na e congregacion mas cerca di mi cas pasobra mi mester a subi sero mescos cu e dos Testigonan cu tabata studia cu mi. Pa yuda mi, e ruman homber a busca un famia na Escuintla cu tabata dispuesto pa laga mi biba na nan cas y pa yuda mi bay e reunionnan. Te awe, nan ta cuida mi comosifuera mi ta parti di nan famia.

Mi por conta bo cuanto cos e rumannan a haci pa mi. Tur e experencianan aki a convence mi con hopi nan stima mi y cu testigonan di Jehova ta cristian berdadero.—Juan 13:34, 35.

E BENEFICIONAN:

Antes mi tabata sinti cu mi no ta bal nada y mi no tabatin speransa. Awor si mi bida tin sentido. Como cu mi ta predica full-time, mi por enfoca riba e obra di siña otro hende e berdadnan precioso cu tin den Bijbel en bes di focus riba mi limitacion fisico. Ademas, mi tin e privilegio di yuda dirigi e congregacion y duna discurso biblico. Mi hasta tabatin e privilegio di duna discurso na congresonan regional di testigonan di Jehova caminda miles di hende ta asisti.

Mi ta dunando un discurso uzando mi Bijbel na Braille

Na aña 2010, mi a bay e Scol di Entrenamento Ministerial (cu awor yama Scol pa Predicador di Reino) na El Salvador. E scol aki a yuda mi sirbi mi rumannan den fe mas mihor. E entrenamento aki a pone mi sinti cu Jehova realmente ta stima mi y balora mi. Tambe esaki a yuda mi mira cu Jehova por entrena cualkier persona pa haci su trabou.

Hesus a bisa: “Tin mas felicidad den duna cu den ricibi.” (Echonan 20:35) Antes mi tabata pensa cu nunca lo mi por ta feliz. Pero awe mi por bisa cu di berdad mi ta feliz, y awor si mi ta sinti cu mi por yuda otro hende.

^ par. 13 Pa mas informacion tocante e motibo pakico Dios ta permiti maldad, wak capitulo 11 di e buki, Kico Bijbel Ta Siña Realmente?, publica pa testigonan di Jehova.