Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  October 2015

 TOPICO PRINCIPAL | TA BALE LA PENA PA HACI ORACION?

Dicon Dios Ta Anima Nos pa Haci Oracion?

Dicon Dios Ta Anima Nos pa Haci Oracion?

Dios ta ofrece nos su amistad.

Pa amigonan tin un bon amistad cu otro, nan mester comunica. Pesey mes, Dios ta anima nos pa papia cu ne pa nos por bira bon amigo di dje. Dios a bisa: “Boso lo sclama na mi y bin haci oracion na mi, y lo mi scucha boso.” (Jeremias 29:12) Si bo papia cu Dios, lo bo “hala cerca [dje], y lo e hala cerca [bo].” (Santiago 4:8) Bijbel ta bisa: “SEÑOR ta cerca di tur esnan cu ta sclama na dje.” (Salmo 145:18) Mas nos resa na dje, mas mihor nos relacion cu ne lo bira.

“[Jehova] ta cerca di tur esnan cu ta sclama na dje.”—Salmo 145:18

Dios kier yuda bo.

Hesus a bisa: “Acaso tin un di boso cu si su yiu pidie pan, e ta dun’e un piedra? Of si e pidie un pisca, e ta dun’e un colebra? Pesey, si boso ... sa di duna boso yiunan bon regalo, cuanto mas boso Tata cu ta den cielo! E sigur lo duna cos bon na esnan cu pidie.” (Mateo 7:9-11) Si, Dios ta anima bo pa haci oracion na dje pasobra “e ta interesa den [bo]” y e kier yuda bo. (1 Pedro 5:7) E ta hasta anima bo pa cont’e tur bo problemanan. Bijbel ta bisa: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan.”—Filipensenan 4:6.

Hende tin mester di Dios.

Expertonan cu ta studia comportacion di hende a ripara cu miyones di hende ta sinti e necesidad di haci oracion. Hasta algun ateo y agnostico ta sinti esey. * Esaki ta un prueba cu Dios a crea hende cu un necesidad spiritual. Hesus a bisa: “Feliz ta esnan cu ta consciente di nan necesidad spiritual.” (Mateo 5:3) Un manera cu nos por satisface e necesidad ey ta door di papia regularmente cu Dios.

Pues, si bo haci oracion na Dios, ki beneficio lo bo por haya?

^ par. 8 Un encuesta cu Pew Research Center a haci na aña 2012 ta mustra cu 11 porciento di ateo y agnostico na Merca ta resa por lo menos un biaha pa luna.