Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  October 2015

 TOPICO PRINCIPAL | TA BALE LA PENA PA HACI ORACION?

Dicon Hende Ta Haci Oracion?

Dicon Hende Ta Haci Oracion?

“Mi tabata bicia na wega di placa. Mi tabata haci oracion pa mi gana hopi placa. Pero nunca esey a pasa.”—Samuel, * Kenia.

“Na scol nos mester a djis ripiti oracionnan cu nos a siña for di cabes.”—Teresa, Filipinas.

“Mi ta resa ora mi tin problema. Tambe mi ta resa pa mi haya pordon di pica y pa mi por ta un mihor cristian.”—Magdalena, Ghana.

Loke Samuel, Teresa y Magdalena a bisa ta mustra cu hende ta haci oracion pa diferente motibo; algun ta mas noble cu otro. Tin hende ta haci oracion di curason, pero otronan ta haci oracion sin ningun sintimento. No obstante, sea cu nan ta haci oracion pa pasa examen na scol, pa nan team faborito gana, pa Dios yuda nan famia of pa cualkier otro motibo, miyones di hende ta sinti cu nan mester haci oracion. En realidad, tin encuesta ta mustra cu hasta algun hende cu no tin un religion ta resa regularmente.

Abo ta haci oracion? Si esey ta e caso, kico bo ta pidi den oracion? Sea cu bo tin custumber di haci oracion of no, kisas bo ta puntra bo mes: Ta bale la pena pa haci oracion? Tin un persona cu ta scucha nos oracionnan? Un escritor a bisa cu oracion ta “un tipo di terapia ... Esaki ta mescos cu ora bo tin un pisca den un aquarium y bo ta papia cu ne.” Algun dokter tambe ta pensa asina; nan ta considera oracion como un forma di “medicina alternativo.” Kico abo ta pensa? Hende ta haci oracion simplemente como parti di nan rutina? Of, esaki ta djis un tipo di terapia cu ta trece beneficio pa nan?

Wel, Bijbel ta siña nos algo diferente, esta cu oracion no ta simplemente un tipo di terapia. Bijbel ta sigura nos cu tin un persona cu ta scucha nos oracionnan ora nos haci esey na e manera corecto y pa e motibonan corecto. Esey ta berdad? Laga nos ban wak.

^ par. 3 A cambia algun nomber.