Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  October 2015

 CONSEHONAN DI PASADO CU TA PRACTICO DEN NOS TEMPO

Sea Dispuesto pa Pordona

Sea Dispuesto pa Pordona

PRINCIPIO BIBLICO: “Sigui ... pordona otro libremente, hasta si un di boso tin motibo pa keha un otro. Mescos cu Jehova a pordona boso libremente, boso tambe mester haci mescos.”—Colosensenan 3:13.

Kico esaki ta encera? Bijbel ta compara pica cu un debe y pordon cu cancelacion di un debe. (Lucas 11:4) Un obra di consulta ta splica cu den Bijbel e verbo Griego traduci como “pordona” ta nifica “pasa por halto di un debe y keda sin exigi pago.” Pues, ora nos ta dicidi di pordona un hende cu a ofende nos, nos no ta spera nada a cambio. E echo cu nos ta dispuesto pa pordona no kiermen cu loke e persona a haci no a hurt nos. Esey no kiermen tampoco cu nos ta di acuerdo cu loke e persona a haci. Mas bien, nos ta dicidi di no carga rencor maske nos “tin motibo [valido] pa keha.”

E conseho ey ta practico awe? Como cu nos ta imperfecto, nos tur ta peca. (Romanonan 3:23) Pues, lo ta sabi di nos parti pa pordona otro hende, pasobra tardi of trempan otronan tambe lo mester pordona nos. Ademas, ora nos pordona, nos mes tambe ta beneficia. Dicon?

Ora nos carga rencor, nos ta haci daño na nos mes. E emocion negativo ey por kita nos felicidad, controla nos bida y pone nos bira deprimi. Ademas, esaki por causa problema serio di salud. Un informe cu a sali den e revista Journal of the American College of Cardiology, di dr. Yoichi Chida y profesor di psicologia Andrew Steptoe, ta bisa: “Estudionan ta mustra cu rabia y rencor por contribui na problema di curason.”

Pero laga nos wak awor kico ta e beneficionan di pordona. Ora nos pordona, nos ta mantene paz y union y nos lo tin un bon relacion cu otro hende. Pero tin algo mas importante ainda: Si nos pordona, nos lo imita Dios kende ta dispuesto pa pordona nos ora nos arepenti, y na su turno, e ta spera pa nos tambe haci mescos.—Marco 11:25; Efesionan 4:32; 5:1.