Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  October 2015

Bo Tabata Sa?

Bo Tabata Sa?

Ki retonan Herodes a enfrenta ora el a renoba e tempel na Jerusalem?

E tempel original cu Salomon a traha na Jerusalem tabata riba un sero. El a laga traha muraya parti pariba y parti pabou di e sero pa nivela e tereno rond di e tempel. Como cu Herodes tabata kier un tempel mas bunita cu esun di Salomon, el a dicidi di remodela y expande e tempel.

Herodes su ingenieronan a haci e tereno cu tabata plat panort di e tempel mas grandi pa asina nan por a crea mas espacio. Na e parti zuid, nan a haci e tereno 32 meter mas grandi. Pa logra esaki, nan mester a traha varios boveda (boognan di piedra) y un muraya diki. Na cierto caminda e muraya aki tabata 50 meter halto.

Durante e proyecto, Herodes a purba di no ofende e hudiunan ni stroba e actividadnan religioso y e sacrificionan cu nan mester a haci na e tempel. E historiador Hudiu Josefo a bisa cu Herodes a hasta percura pa e sacerdotenan hudiu siña e trabou di metsla y carpinte. El a haci esey pa ningun trahador no autorisa drenta e luganan sagrado.

Herodes a muri prome cu e proyecto a termina. Na aña 30 despues di Cristo, ya nan tabatin 46 aña trahando riba e tempel. (Juan 2:20) Agripa II, e bisanieto di Herodes, a termina e proyecto meymey di e prome siglo.

Dicon e hendenan riba e isla cu yama Malta a pensa cu apostel Pablo ta un asesino?

E diosa di husticia (na man robes) ta bringa cu e diosa di inhusticia

Kisas e creencianan di e religion Griego a influencia algun hende di Malta. E buki di Echonan ta mustra nos kico a sosode despues cu Pablo a naufraga riba Malta. Pablo a cende un candela pa e hendenan cu a naufraga cu ne no sinti friu. Ora el a tira palo seco den e candela, un colebra venenoso a mord’e y a keda colga na su man. Pesey e hendenan di Malta a bisa: “Casi sigur e homber aki ta un asesino, y aunke el a logra sali sano y salvo for di lama, Husticia no ta lag’e sigui biba.”—Echonan 28:4.

Den e texto aki, e palabra Griego pa “Husticia” ta “dike.” E palabra ey por referi na husticia mes. Pero den mitologia Griego, Dike tabata nomber di e diosa di husticia. Nan tabata pensa cu e diosa aki tabata vigila loke ta pasa riba Tera. Ademas, nan tabata pensa cu e tabata informa Zeus di inhusticianan cu a keda tapa pa asina esnan culpabel por a haya nan castigo mereci. Pesey, segun un diccionario, probablemente e habitantenan di Malta tabata pensa: Aunke Pablo no a muri riba lama, e diosa Dike lo a regla cuenta cu ne mediante e colebra venenoso. Ora e hendenan a ripara cu nada malo no a pasa cu Pablo, nan a cambia di opinion.