Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  July 2015

Ta Posibel pa Nos Agrada Dios?

Ta Posibel pa Nos Agrada Dios?

Bijbel ta papia hopi bon di algun personahe biblico. Bo a yega di lesa tocante nan y pensa: Ami nunca lo por ta manera nan. Kisas bo ta rasona: Ami no ta perfecto, y no ta tur ora mi ta haci loke ta bon.

Job tabata un homber “perfecto y recto.”—Job 1:1

Bijbel ta describi Job como un homber “perfecto y recto”; Lot como un “homber husto” y David como un homber cu a “haci solamente loke tabata bon” den Dios su bista. (Job 1:1; 2 Pedro 2:8; 1 Reynan 14:8) Pero laga nos haci un analisis mas profundo di e bida di e personahenan biblico ey. Nos lo bay wak (1) cu nan a haci fout, (2) cu nos por siña hopi for di nan ehempel y (3) cu hende imperfecto por agrada Dios.

NAN A HACI FOUT

“[Dios] a libra Lot, un homber husto cu tabata sumamente afligi pa e conducta sinberguensa di e malbadonan.”—2 Pedro 2:7

Job a pasa den varios situacion inhusto y el a saca conclusion robes cu Dios no ta worry si e ta keda fiel na dje of no. (Job 9:20-22) Job tabata asina sigur cu e ta un homber husto cu otro hende a haya e impresion cu e tabata considera su mes mas husto cu Dios.—Job 32:1, 2; 35:1, 2.

 Lot a tarda pa tuma un decision cu eigenlijk lo mester tabata facil y logico. E hendenan cu tabata biba na Sodoma y Gomora “tabata tormenta su alma husto” pasobra nan tabata sumamente inmoral. (2 Pedro 2:8) Dios a bisa cu e lo bay destrui e stadnan ey y a duna Lot un oportunidad pa scapa hunto cu su famia. Kisas lo bo pensa cu Lot lo a sali di e stad di biaha. Pero, na e momento crucial ey, el a tarda. E angelnan cu Dios a manda pa salba Lot cu su famia mester a gara nan na nan man y hiba nan pafo di e stad.—Genesis 19:15, 16.

David “a sigui [Dios] cu henter su curason, pa haci solamente loke tabata bon den [Su] bista.”—1 Reynan 14:8

David no a domina su mes y a comete adulterio cu e esposa di un otro homber. Pa colmo, el a purba di sconde loke el a haci, y a laga mata e esposo di e muher. (2 Samuel, capitulo 11) Bijbel ta bisa cu loke “David a haci tabata malo den bista di SEÑOR.”—2 Samuel 11:27.

Tanto Job, Lot como David a comete eror, y tin di e erornan aki tabata grave. Pero, manera nos lo bay wak, nan tabatin un deseo pa sirbi Dios obedientemente cu henter nan curason. Nan tabata dispuesto pa arepenti y pa haci e cambionan necesario. Pesey, nan tabatin Dios su aprobacion, y por lo general Bijbel ta referi na nan como hende fiel.

KICO NOS POR SIÑA?

Como hende imperfecto, nos tur ta comete eror. (Romanonan 3:23) Pero ora cu esey sosode, nos mester arepenti y despues haci tur loke nos por pa drecha e asunto.

Con Job, Lot y David a haci esey? Job tabata un homber di integridad. Pesey, ora Dios a  rasona cu ne, Job a cambia su manera robes di pensa y a hala su palabra atras. (Job 42:6) Lot su punto di bista tocante e hendenan inmoral di Sodoma y Gomora tabata completamente na harmonia cu Dios su normanan. E problema tabata cu e no a mira cu e situacion tabata urgente. Finalmente Lot a huy bay y a scapa e huicio di Dios pasobra el a obedece y no a bira wak patras. Aunke David a kibra Dios su ley, el a revela loke tabatin den su curason door di arepenti y pidi Jehova pa tene misericordia di dje.—Salmo 51.

E echo cu e hombernan aki tabatin aprobacion di Dios ta mustra cu loke e ta spera di hende imperfecto ta rasonabel. Dios “sa di kico nos ta traha; e ta corda cu ta stof nos ta.” (Salmo 103:14) Pues, si Dios sa cu nos lo comete eror, kico e ta spera di nos?

Dios “sa di kico nos ta traha; e ta corda cu ta stof nos ta.”—Salmo 103:14

CON HENDE IMPERFECTO POR AGRADA DIOS?

E conseho cu David a duna su yiu Salomon ta duna nos e clave con pa agrada Dios. El a bisa: “Abo, mi yiu Salomon, conoce e Dios di bo tata, y sirbie cu henter bo curason.” (1 Cronicanan 28:9) Kico esey ta encera? Wel, nos mester tin amor pa Dios y nos mester ta determina pa haya sa kico ta su boluntad y cumpli cu ne. Esaki no kiermen cu nos mester ta perfecto, pero nos mester tin un deseo si pa sirbi Dios obedientemente y nos mester ta dispuesto pa lag’e corigi nos. Door cu nan tabata stima Dios y tabata kier obedec’e, Dios a considera Job como “perfecto”, Lot como un “homber husto” y David como un homber cu ta “haci solamente loke tabata bon” den Dios su bista. Aunke nan a comete eror, toch nan por a agrada Dios.

Pa sirbi Dios cu henter nos curason, nos mester ta determina pa haya sa kico ta su boluntad y cumpli cu ne

Pues si un pensamento robes bin na nos mente, si nos bisa algo cu despues nos ta lamenta of si nos haci algo cu despues nos ta realisa ta robes, laga e ehempelnan cu nos a caba di considera anima nos. Dios sa cu actualmente nos no por ta perfecto. Pero, loke si e ta spera di nos ta pa nos stim’e y haci esfuerso pa obedec’e. Si nos sirbie cu henter nos curason, nos por ta sigur cu nos tambe lo agrada Dios.

Mas Informacion

Kico Bijbel Ta Siña Realmente?

Biba na un Manera Cu Ta Agrada Dios

Bo por biba na un manera cu ta agrada Jehova. Bo por hasta bira su amigo.