Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2015

 STORIA DI BIDA

Nos Famia Ta Sirbi Jehova pa Shete Generacion Caba

Nos Famia Ta Sirbi Jehova pa Shete Generacion Caba

Hende ta bisa cu mi ta parce mi tata. Mi tin e mesun postura, wowo y sentido di humor cu ne. Pero tambe mi a hereda un tesoro cu nos famia tin pa shete generacion caba. Laga mi conta nos historia.

Mi tata ta conta mi tocante nos herencia spiritual

E storia di nos famia ta cuminsa cu Thomas (1) * Williams cu a nace dia 20 di januari 1815 na Horncastle, Inglatera. Su mama a fayece ora e tabatin dos aña y su tata, John Williams, mester a lanta Thomas y su tres rumannan. John a siña Thomas e ofishi di carpinte, pero Thomas kier a dedica su bida na algo otro.

Den e tempo ey, religionnan tabata lantando cabes atrobe na Inglatera. Pastoor John Wesley a separa for di e Iglesia Anglicano y a forma e Sociedad Metodista, un grupo cu tabata promove estudio personal di Bijbel y evangelisacion. Wesley su siñansanan a plama masha lihe y famia Williams a acepta nan mesora. Thomas a bira un predicador cu a sigui Wesley y mesora el a ofrece su mes pa bay traha como misionero na e islanan den Ocean Sur Pacifico. Na juli 1840, e cu su esposa, Mary, (2) a yega Lakeba. * Esaki ta un isla volcanico na Fidji cu e tempo ey tabata habita pa canibal.

NAN A BIBA MEYMEY DI CANIBAL

Thomas cu Mary a pasa den pruebanan severo durante e prome añanan cu nan a biba na Fidji. Nan mester a traha oranan largo bou di condicionnan dificil y den higra di solo. Ademas di canibalismo, nan a mira hopi otro atrocidad tambe: hende tabata strangula viuda, mata baby y tabatin guera entre tribu. Y generalmente e hendenan local no tabata acepta nan mensahe. Mary y su prome yiu, John, a bira malo y nan a hera muri. Na aña 1843, Thomas a skirbi: “Mi tabata sinti mi hopi tristo ... Y mi tabata hopi desespera.” Pero e cu Mary a persevera, y nan fe den Jehova a fortalece nan.

Durante e tempo ey, Thomas a haci bon uzo di su ofishi como carpinte pa traha e prome cas estilo Europeo na Fidji. E cas tabatin algun innovacion cu a hala atencion di e poblacion local. Por ehempel, e tabata traha riba staca di manera cu biento por a pasa bou di e cas. Net prome cu Thomas a caba di traha e cas, Mary a duna luz na nan di dos yiu, Thomas Whitton (3) Williams, kende tabata e bisabisawelo di mi tata.

Na 1843, Thomas Williams (e tata) a yuda traduci e evangelio di Juan na idioma Fidji, un trabou cu el a haya masha dificil. * Sinembargo, e tabata mihor den antropologia pasobra e tabata un bon observador. El a documenta e resultadonan di su investigacion den  su buki Fiji and the Fijians (1858), cu ta papia tocante bida di e hendenan na Fidji den siglo 19.

Despues di 13 aña di trabou duro na Fidji, Thomas (e tata) su salud a bay hopi atras, y el a dicidi di bay biba na Australia cu su famia. Despues di un carera largo como predicador, el a bira un persona masha respetabel. Y na 1891 Thomas a muri na Ballarat, Victoria.

NAN TA HAYA “ORO” DEN WEST

Na 1883, Thomas Whitton Williams, su esposa Phoebe, (4) y nan yiunan a muda bay Perth, na West Australia. Nan di dos yiu Arthur Bakewell (5) Williams, cu ta mi bisabisawelo, tabatin nuebe aña e tempo ey.

Tempo Arthur tabatin 22 aña, el a bay busca un mihor porvenir na Kalgoorlie, un stad conoci pa su mina di oro, un 600 kilometer oost di Perth. Eynan el a lesa algun literatura di e Studiantenan Internacional di Bijbel, esey ta e nomber cu testigonan di Jehova tabatin e tempo ey. Tambe el a abona riba e revista Zion’s Watch Tower. El a keda asina encanta cu loke el a lesa cu el a cuminsa comparti loke el a siña cu otro hende y forma grupo pa studia Bijbel. Asina e actividadnan di testigonan di Jehova a cuminsa na West Australia.

Arthur a conta su famia tambe e cosnan nobo cu el a siña. Su tata, Thomas Whitton, a apoy’e, pero poco tempo despues el a fayece. Su mama, Phoebe, y su ruman muhernan, Violet y Mary, tambe a bira Studiante di Bijbel. Violet a bira un pionero, esta, un predicador full-time. Arthur a bisa cu Violet tabata “e pionero mas celoso y diligente di West Australia.” Kisas Arthur a exagera un tiki, pero Violet su celo sin duda tabatin un gran influencia riba e siguiente generacion di famia Williams.

Cu tempo, Arthur a casa y muda bay Donnybrook, un stad caminda tabatin hopi plantacion di mata di fruta den e parti zuidwest di West Australia. Eynan el a haya e nomber di cariño “E Loco di 1914” pasobra e tabata papia celosamente di e profecianan di Bijbel cu mester a cumpli den e aña ey. * Pero ora Prome Guera Mundial a cuminsa, nan a stop di haci bofon di dje. Arthur tabata predica regularmente na e clientenan cu tabata bin cumpra cos den su tienda. Na e bentana di e tienda e tabata pone literatura di Bijbel pa tur hende mira. Ademas, el a colga un borchi na e bentana cu tabata bisa cu e lo a duna 100 pound (mas o menos 150 dollar Mericano) di Australia na esun cu por a proba cu e doctrina di Trinidad ta den Bijbel, un doctrina cu e mes a rechasa firmemente. Nunca e no mester a paga ningun hende e placa.

E cas di famia Williams a bira e luga caminda nan tabata studia Bijbel den grupo y tene reunion di congregacion na Donnybrook. Mas despues, Arthur a construi un di e prome Salonnan di Reino, of luga di reunion, na West Australia. Ora cu e tabatin casi  80 aña, ainda e tabata bisti su bachi y dashi pa e bay predica den henter e districto di Donnybrook riba su cabay bieu cu tabata yama Doll.

Arthur tabata un homber keto, celoso y masha respeta. Esaki a haci un impacto profundo riba su yiunan. Su yiu muher Florence (6) a sirbi como misionero na India. Arthur su yiu hombernan, Arthur Lindsay (7) y Thomas, tambe a sirbi pa hopi aña como anciano di congregacion mescos cu nan tata.

E DUSHI APPEL LADY WILLIAMS

Mi bisabisawelo, Arthur Lindsay Williams, tabata un homber conoci y hopi stima pa su caracter amabel. Semper e tabatin tempo pa hende y tabata trata nan cu respet. E tabata campeon den kapmento di palo y a yega di gana 18 campeonato regional den 12 aña.

Sinembargo, Arthur no a keda masha contento ora cu mi welo, Ronald, (8) cu tabatin dos aña di edad e tempo ey, a coy un hacha y kap un palo chikito di appel cu tabatin banda di nos cas. E mama di Ronald a mara e palo, y despues di tempo e palo a pari appel masha dushi mes. Nan a yama e appel ey Lady Williams, un variedad nobo di appel cu despues hende a uza pa produci un otro tipo di appel cu yama Cripps Pink, un di e appelnan di mas conoci na mundo.

Mi welo Ronald a haya algo mihor pa haci cu kap palo ora el a bira grandi. E cu mi wela a sirbi shete aña como trahador boluntario riba proyectonan di construccion di testigonan di Jehova na Australia y na Islanan Salomon. Awor mi welo tin casi 80 aña, pero ainda e ta sirbi como anciano di congregacion, y e ta yuda traha y renoba Salonnan di Reino na West Australia.

ORGUYOSO DI MI HERENCIA

Siguiendo e ehempel di nos antepasadonan, mi mayornan Geoffrey (9) cu Janice (10) Williams, a traha duro pa inculca e principionan di Bijbel den ami (12) cu mi ruman muher Katharine (11) segun cu nos tabata crece. Ora mi tabatin 13 aña, mi a dicidi di biba segun e normanan ey y sirbi Dios pa resto di mi bida. Mi a dicidi di haci esaki e anochi despues di a scucha un discurso na un asamblea. Eynan John E. Barr, un miembro di e Cuerpo Gobernante, of directiva, di testigonan di Jehova, a bisa e hobennan: “No tira e cos di mas precioso cu bo tin afo, esta, e oportunidad di conoce y stima Jehova.” Dos aña despues mi a cuminsa traha como pionero.

Awe, ami cu mi casa Chloe ta disfruta di e trabou di tempo completo den un area aisla. Nos ta predica den un pueblo minero cu yama Tom Price, den e parti noordwest di West Australia. Nos ta traha part-time pa cubri nos gastonan. Mi mayornan, mi ruman muher, Katharine, y su esposo, Andrew, ta traha como pionero na Port Hedland cu ta keda un 420 kilometer noord di Tom Price. Ami cu mi tata ta sirbi tambe como anciano di congregacion.

For di shete generacion pasa, mi antepasado Thomas Williams tabata dicidido pa sirbi Jehova fielmente. Mi ta orguyoso di por a haya e herencia spiritual valioso aki.

^ par. 5 E numbernan ta indica ta ken e persona riba e potretnan akibou ta.

^ par. 6 Antes e isla tabata yama Lakemba. E isla ta situa na e archipielago di Lau na e parti oost di Fidji.

^ par. 10 E misionero John Hunt a traduci gran parti di e Testament Nobo na e idioma Fidji cu a ser publica na 1847. Algo remarcabel di e traduccion aki ta cu e tin e nomber divino, Jehova, na Marco 12:36, Lucas 20:42 y Echonan 2:34.

^ par. 16 Wak e topico “1914—Un Aña Significativo den Profecia Biblico” den e appendix di e buki Kico Bijbel Ta Siña Realmente? publica pa testigonan di Jehova y disponibel online pa download for di jw.org/jw-paa.

Mas Informacion

DIOS TIN BON NOTICIA PA NOS!

Con Principionan di Bijbel Ta Beneficia Nos?

Hesus a splica dicon nos mester di guia y a papia di dos principio biblico cu ta hopi importante.

OTRO PUBLICACIONNAN

Imita Nan Fe

Kico nos por siña for di e homber- y muhernan di fe menciona den Bijbel?