Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2015

Ken Ta e Anticristo?

Ken Ta e Anticristo?

Recientemente tabatin un pelicula di horor titula Antichrist.

Un grupo musical popular a yama nan CD Antichrist Superstar.

Friedrich Nietzsche, un filosofo di siglo 19, a publica un buki cu el a yama The Antichrist.

Hopi biaha rey- y emperadornan di Edad Medio tabata yama nan enemigonan anticristo.

Martin Luther, un lider di Reforma Aleman, a yama e papanan di Iglesia Catolico Romano anticristo.

PA HOPI tempo caba e palabra “anticristo” ta ser uza pa referi na monarcanan y hasta como titulo di pelicula. Pesey no ta nada straño cu hende ta puntra nan mes: Ken e anticristo ta anto? Nos mester ta interesa den e palabra ey? Wel, nos por haya contesta riba e preguntanan aki den Bijbel, cu ta menciona e palabra anticristo cinco biaha.

BIJBEL TA IDENTIFICA E ANTICRISTO

E unico escritor di Bijbel cu a uza e palabra “anticristo” ta apostel Juan. Kico el a bisa tocante e anticristo? Tuma nota di loke el a skirbi den su prome carta: “Yiunan stima, ta e ora final, y manera boso a tende, e anticristo ta bin. Wel, aworaki mes caba hopi anticristo a aparece, y ta pesey nos sa cu ta e ora final. Nan tabata meymey di nos, pero nan a bay laga nos pasobra nan no tabata di nos ... Ta ken ta e gañado? No ta esun cu ta nenga cu Hesus ta Cristo? Esaki ta e anticristo, esun cu ta nenga e Tata y e Yiu.”—1 Juan 2:18, 19, 22.

Apostel Juan tabata sa cu e anticristo ta tur esnan cu deliberadamente ta plama mentira tocante Hesus y su siñansanan

Kico nos por compronde for di e palabranan aki? Juan a bisa cu tin “hopi anticristo”, loke ta indica cu e anticristo no ta un solo persona sino un grupo di hende. Segun Juan, esnan cu ta forma e anticristo ta hende- of organisacionnan cu ta plama mentira, rechasa Hesus como e Cristo, of e Mesias, y purba di sconde ken realmente Dios y su Yiu Hesucristo ta. Nan por hasta pretende di ta Cristo of un di su representantenan. Y como cu Juan a bisa cu “nan a bay laga nos”, esey ta indica cu nan ta rechasa e siñansanan di Bijbel. Aparentemente, e grupo aki tabata existi caba tempo cu Juan a skirbi su carta den “e ora final”, cu probablemente ta referi na e añanan prome cu e ultimo apostel di Hesus a fayece.

Kico mas Juan a skirbi tocante e anticristo? Papiando di e profetanan falso, el a spierta: “Tur mensahe inspira cu ta declara cu Hesucristo a bin como hende ta di Dios. Ma e mensahe inspira cu no ta bisa esaki di Hesus no ta di Dios. Ademas, esey ta e mensahe inspira cu boso a tende cu lo a bin di e anticristo; wel, awor e mensahe ey ta na mundo caba.” (1 Juan 4:2, 3) Poco tempo despues, Juan a bolbe enfatisa esaki den su di dos carta: “Hopi gañado a presenta den mundo; nan ta personanan cu no ta reconoce cu Hesucristo a bin como hende. Esun cu ta haci esey ta e gañado y e anticristo.” (2 Juan 7) Ta bisto anto cu Juan tabata sa cu e anticristo ta tur esnan cu deliberadamente ta plama mentira tocante Hesucristo y su siñansanan.

“PROFETANAN FALSO” Y “E HOMBER DI MALDAD”

Hesus a adverti cu profeta falso lo bin manera “lobo hambra” cu ta “bisti na cuero di carne”

Hopi tempo prome cu Juan a papia di e anticristo, Hesus a adverti su siguidornan: “Tene cuidou cu e profetanan falso cu ta bin cerca boso bisti na cuero di carne ma cu di paden ta  lobo hambra.” (Mateo 7:15) Apostel Pablo tambe a spierta e cristiannan na Tesalonica: “No laga ningun hende gaña boso di ningun manera, pasobra e dia ey [e dia di Jehova] lo no bin a menos cu e apostasia bin prome y e homber di maldad, e yiu di destruccion, keda revela.”—2 Tesalonicensenan 2:3.

Kico esaki ta siña nos? Cu den e prome siglo, apostata- y profetanan falso tabata activo caba, y tabata haci tur loke nan por pa debilita e fe di e cristiannan. Pues, cu e palabra “anticristo” Juan a referi na tur esnan cu ta plama mentira tocante Hesucristo y su siñansanan. Ora Pablo a describi e anticristo como “e yiu di destruccion”, el a laga nos compronde na un manera cla kico Jehova ta pensa tocante e anticristo.

TENE CUIDOU CU E ANTICRISTO

Kico di awe? Hende y organisacion cu ta forma e anticristo ainda ta rechasa Cristo y su siñansanan. Deliberadamente nan ta plama mentira cu e intencion di confundi hende tocante e identidad di e Tata, Jehova Dios, y su Yiu, Hesucristo. Pesey nos tin bon motibo pa tene cuidou cu mentira religioso. Laga nos analisa dos ehempel.

Pa siglonan, hopi iglesia a promove e doctrina di Trinidad, bisando cu e Tata y e Yiu ta e mesun persona. Di e manera aki, e anticristo ta sconde e identidad di Jehova Dios y di Hesucristo. E doctrina aki ta manera un misterio cu ta stroba hende di curason sincero di imita Hesus y hala cerca Dios, manera Bijbel ta anima nan pa haci.—1 Corintionan 11:1; Santiago 4:8.

Ademas, iglesianan ta confundi hende mas ainda ora nan ta promove e uzo di traduccionnan di Bijbel cu no ta uza e nomber di Dios, Jehova. Nan ta haci esaki a pesar cu Jehova su nomber ta aparece mas o menos 7.000 biaha den e texto original di Bijbel. Como resultado, e identidad di e Dios berdadero ta keda un misterio.

Di otro banda, hende di curason sincero cu conoce e nomber di Dios, Jehova, ta sinti nan atrai na dje. Esaki ta loke Richard a experencia tempo cu el a papia cu dos testigo di Jehova. E ta conta: “Nan a mustra mi den Bijbel cu e nomber di e Dios berdadero ta Jehova. E echo cu Dios tin un nomber a impresiona mi hopi. Nunca mi a yega di tende di esey.” For di e dia ey padilanti el a cuminsa biba segun e normanan di Bijbel pa e agrada Jehova. E ta sigui bisa: “E echo cu mi a haya sa Dios su nomber a yuda mi haya un bon relacion cu ne.”

Pa siglonan, e anticristo a laga miyones di hende keda den scuridad spiritual. Pero ora nos analisa Bijbel, nos por haya sa ken e anticristo ta y libra nos mes di su mentiranan religioso.—Juan 17:17.

Mas Informacion

OTRO PUBLICACIONNAN

Bou di Control di Ken Mundo Ta en Realidad?

Kisas e contesta di Bijbel lo sorprende bo. Descubri dicon esey ta importante y kico e ta nifica pa futuro.

PREGUNTA CU BIJBEL TA CONTESTA

E Doctrina di Trinidad Ta den Bijbel?

Hopi religion ta siña cu Dios ta parti di un Trinidad. Esey ta loke Bijbel ta siña?