Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  May 2015

 IMITA NAN FE | JOZEF

“T’ami Ta na Luga di Dios Anto?”

“T’ami Ta na Luga di Dios Anto?”

JOZEF tabata para den hardin di su cas segun cu solo tabata baha. Kisas e tabata observa e palonan di dadel, otro palonan di fruta y baki cu mata di awa. Poco pafo di su muraya e por a mira e palacio di Farao den horizonte. Di leu e ta tende su yiu homber Manases ta hunga den cas cu su ruman homber chikito, Efraim, y pon’e hari. Jozef por a imagina con su casa ta hari segun cu e ta wak e muchanan haci wega. Jozef a smile pasobra e tabata sa cu e tabata un homber bendiciona.

Jozef a yama su prome yiu homber Manases pasobra e nomber ey ta nifica cu Dios a lag’e lubida tur su problemanan. (Genesis 41:51) E bendicionnan cu Jozef a haya di Dios den e ultimo añanan sigur a alivia e dolor cu e tabata sinti ora e tabata corda riba su cas, tata y ruman hombernan. E odio cu su rumannan grandi tabatin contra dje a cambia su bida completamente. Nan a atac’e cu e intencion di mat’e, pero despues nan a bend’e como esclavo cu algun comerciante biahero. Despues di esey, el a haya su mes cu varios contratiempo. El a pasa mas cu dies aña como catibo y tambe den prizon, pa un tempo hasta mara na boei di hero. Pero awor e tabata e persona di mas importante despues di Farao den e nacion poderoso di Egipto. *

Pa hopi aña, Jozef a wak con Jehova a cumpli cu tur loke El a bisa for di antemano. E tempo ey Egipto tabata disfrutando di e shete añanan di abundancia di cosecha cu a ser profetisa, y Jozef tabata supervisa e wardamento di tur e grano aki. Durante e tempo ey Jozef cu su casa, Asenat, a haya dos yiu homber. Pero ainda e tabata pensa riba su famia cu tabata biba cientos di kilometer leu, specialmente riba su ruman homber Benjamin y nan tata stima, Jacob. Kisas Jozef tabata puntra su mes si ainda nan tabata bon. Podise e tabata puntra su mes tambe si su ruman hombernan a cambia nan actitud violento of si un dia lo e por a drecha e relacion cu su famia y reuni cu nan atrobe.

Si den bo famia tambe tin jaloersheid, traicion of odio, bo no ta bo so pasobra Jozef tambe a pasa den e mesun situacion. Kico nos por siña for di e manera cu el a trata su famia y percura pa nan?

“BAY CERCA JOZEF”

Jozef tabata asina druk cu su trabounan cu e añanan a pasa hopi lihe. Net manera Jehova a bisa den e soño di Farao, despues di e di shete aña di bon cosecha a bin un cambio drastico. Cosecha a fracasa y hamber a cuminsa reina den tur e paisnan den bisindario. Pero Bijbel ta bisa: “Na henter tera di Egipto tabatin pan.” (Genesis 41:54) Sin duda, Jozef su don divino pa interpreta soño y su habilidad pa organisa cosnan a beneficia e pueblo di Egipto.

Jozef a keda humilde y pesey Jehova por a uz’e bon

Probablemente e Egipcionan tabata hopi agradecido na Jozef y a elogi’e pa su bon trabou. Pero Jozef tabata kier pa tur elogio bay pa su  Dios, Jehova. Den nos caso tambe, si nos tin un actitud humilde, Dios por haci nos capaz pa logra cosnan na un manera cu nos no por ni imagina.

Pero cu tempo e Egipcionan tambe a cuminsa sinti e efectonan di e hamber cu tabata reina. Ora nan a sclama na Farao pa yudansa, el a djis bisa nan: “Bay cerca Jozef; kico cu e bisa boso, hacie.” E ora ey Jozef a cuminsa habri e depositonan caminda e grano tabata warda y e hendenan por a cumpra loke nan tabatin mester.—Genesis 41:55, 56.

Pero den e paisnan den bisindario, e situacion tabata totalmente diferente. Por ehempel, e famia di Jozef cu tabata biba cientos di kilometer leu na Canaan tabata sufriendo di hamber. Jacob, cu ya caba tabata di edad avansa, a tende cu tabatin grano na Egipto y pesey el a manda su yiu hombernan ayanan pa cumpra cuminda.—Genesis 42:1, 2.

Jacob a manda dies di su yiu hombernan, pero e no a manda Benjamin, esun di mas chikito. Jacob tabata corda bon cla cu ora el a manda su yiu stima, Jozef, bay bishita su ruman hombernan grandi, e no a bin bek nunca mas. E yiu hombernan mas grandi di Jacob a trece e mantel elegante di Jozef tur kibra y na sanger. E mantel ey tabata un muestra di amor y aprecio di parti di su tata, Jacob. Nan a laga nan pober tata kere cu ta un bestia feroz a mata Jozef.—Genesis 37:31-35.

“JOZEF A CORDA E SOÑONAN”

Despues di un biahe largo, e yiunan di Jacob a yega Egipto. Ora nan a pidi pa cumpra cuminda, e Egipcionan a manda nan bay cerca e oficial di rango halto yama Zafnat-panea. (Genesis 41:45) Nan a reconoce Jozef? No. Nan a mir’e pa un oficial Egipcio di rango halto. Nan tabatin mester di su yudansa, y como muestra di respet, nan a haci loke tabata normal den e tempo ey: Nan “a buig p’e cu nan cara te na suela.”—Genesis 42:5, 6.

Awor, kico di Jozef? El a reconoce su rumannan? Si, di biaha! Ademas, ora el a mira nan buig su dilanti, el a corda tempo cu e tabata jong. E relato ta conta cu “Jozef a corda e soñonan” cu Jehova a dun’e tempo e tabata teenager, den cua el a mira su rumannan buig p’e, net manera nan tabata haciendo awor. (Genesis 37:2, 5-9; 42:7, 9) Kico Jozef lo a haci? Brasa nan? Of tuma venganza?

Jozef tabata sa cu e no mester a laga su emocionnan domin’e. Claramente, Jehova tabata tras di e sucesonan aki pasobra su proposito tabata pa e descendientenan di Jacob bira un nacion grandi. (Genesis 35:11, 12) Si su rumannan ainda tabata violento, egoista y sin escrupulo, e consecuencianan por tabata desastroso. Ademas, si Jozef a bay tras di su emocionnan, lo e por a pone bida di su tata y di su ruman Benjamin na peliger. E no tabata sa mes si nan tabata na bida ainda. Pesey Jozef a keda sin bisa ken e  tabata pa e por a pone su rumannan na prueba y wak si nan a cambia. Asina e por a haci sigur kico Jehova tabata kier pa e haci.

Kisas nunca lo bo no haya bo mes den un situacion parecido. Sinembargo, awendia conflicto den famia y famia kibra ta hopi comun. Den situacionnan asina, kisas nos tin e tendencia di bay tras di nos emocionnan y actua sin pensa. Lo ta mas sabi di nos parti pa imita Jozef y purba di saca afo con Dios kier pa nos trata cu e situacionnan ey. (Proverbionan 14:12) Corda cu ta importante pa ta na paz cu bo famia; pero bo relacion cu Dios y su Yiu ta mas importante ainda.—Mateo 10:37.

“BOSO LO WORDO PONI NA PRUEBA”

Jozef a pone su rumannan na prueba pa wak kico tabatin den nan curason. Mediante un interprete, el a cuminsa papia malo cu nan y acusa nan di ta spion cu a bin di otro pais. Pa defende nan mes, nan a conta Jozef di nan famia y cu nan tin un ruman homber chikito na cas. Jozef a purba di no laga nan mira con contento e tabata cu su ruman chikito tabata na bida ainda. Awor Jozef tabata sa kico e mester a haci. El a bisa nan: “Cu esaki boso lo wordo poni na prueba.” Anto el a bisa nan cu e mester mira nan ruman chikito. Despues el a bisa cu nan por bay cas pa busca e ruman chikito basta un di nan keda como garantia cu nan lo a bolbe bek Egipto.—Genesis 42:9-20.

Sin sa cu Jozef por a compronde nan, nan a cuminsa delibera cu otro y a admiti con malo nan tabata sinti nan mes pa tur loke nan a haci 20 aña mas prome. Nan a bisa: “Di berdad nos ta culpabel encuanto nos ruman homber, pasobra nos a mira e angustia di su alma ora cu el a roga nos, ma nos no kier a scucha; pesey e angustia aki a bin riba nos.” Jozef a compronde tur loke nan a bisa y e mester a kita bay un rato pa nan no mir’e yora. (Genesis 42:21-24) Pero e tabata sa cu berdadero arepentimento ta bay mas leu cu djis sinti duele pa e consecuencianan di un mal acto. Pesey el a sigui pone nan na prueba.

El a manda e otronan cas y a tene Simeon preso. Ademas, el a sconde placa den e saconan di cuminda cu nan a bay cu ne. Nan a bay cas y cu hopi dificultad nan a logra convence Jacob pa laga nan hiba su yiu stima, Benjamin, Egipto. Ora nan a yega Egipto, nan a confesa abiertamente na e sirbidor di Jozef cu nan a haya e placa den nan saco di cuminda, y nan a ofrece pa paga tur e placa bek. Aunke esaki tabata algo di admira, toch Jozef kier a sigui pone nan na prueba pa wak si di berdad nan a cambia. El a prepara un bankete pa nan, y casi e no por a sconde con contento e tabata di mira Benjamin. Despues, Jozef a bolbe manda nan cas carga cu cuminda, pero e biaha aki el a manda su sirbidor sconde su copa di plata den e saco di Benjamin.—Genesis 42:26–44:2.

Jozef a pone nan na prueba un biaha mas. El a manda su sirbidornan persigui su rumannan, aresta nan y acusa nan di a horta su copa. Ora e sirbidornan a hay’e den e saco di Benjamin, nan a hiba tur e rumannan bek cerca Jozef. Awor Jozef a haya un bon chens pa wak kico realmente tabatin den nan curason. Juda a papia pa nan y a pidi Jozef tene piedad di nan. Hasta el a bisa Jozef cu tur 11 ruman tabata dispuesto pa bira esclavo na Egipto. Pero Jozef a bisa nan cu ta Benjamin so mester a keda como esclavo y cu e resto mester bay.—Genesis 44:2-17.

Cu dolor na su curason, Juda a contesta y a bisa cu ta Benjamin “so a keda di su mama, y su tata ta stim’e.” Loke Juda a bisa lo mester a conmove Jozef hopi pasobra Jozef tabata yiu mayo di Jacob su casa stima Raquel, kende a muri ora e tabata dunando luz na Benjamin. Mescos cu su tata, Jozef tambe tabatin bunita recuerdo di su mama. Kisas pesey mes Jozef tabatin asina tanto cariño pa Benjamin.—Genesis 35:18-20; 44:20.

Juda a roga Jozef pa no tene Benjamin como esclavo y a hasta ofrece su mes como esclavo na luga di dje. Anto el a agrega: “Con mi ta haci bay cerca mi tata si e mucha no ta hunto cu mi? Lo  mi no por mira e cos malo cu lo pasa cu mi tata.” (Genesis 44:18-34) Pues no tin duda cu Juda a cambia. El a mustra cu e tabatin duele di loke el a haci y a demostra comprension, generosidad y compasion.

Jozef a mira cu su ruman hombernan a sinti duele di loke nan a haci cu ne

Jozef no por a contene su mes mas. Awor si e mester a saca e emocionnan cu e tabatin wanta aden. El a manda tur su sirbidornan bay, y el a yora asina duro cu e zonido a yega te na e palacio di Farao. Por fin el a bisa nan ken e tabata: “Ami ta boso ruman Jozef.” Su rumannan a keda den shock. Anto el a brasa nan y a bisa nan cu e ta pordona nan pa tur loke nan a haci cu ne. (Genesis 45:1-15) Asina Jozef a refleha e misericordia di Jehova, kende ta cla pa pordona. (Salmo 86:5) Kico di nos?

“BO TA NA BIDA AINDA”

Ora Farao a tende tur loke a sosode den e cas di Jozef, el a bisa Jozef pa trece su tata, cu ya tabata di edad avansa, y henter su famia pa bin biba na Egipto. Pues no a dura mucho cu porfin Jozef tabata hunto cu su tata stima atrobe. Jacob a yora y a bisa Jozef: “Awor mi por muri como cu mi a mira bo cara, cu bo ta na bida ainda.”—Genesis 45:16-28; 46:29, 30.

Jacob a biba 17 aña na Egipto, suficiente tempo pa duna tur su 12 yiu hombernan bendicion profetico prome cu el a muri. El a duna Jozef, su di 11 yiu, un porcion dobel cu eigenlijk ta e yiu mayo mester a haya. Dos di e tribunan di Israel lo a bin di Jozef. Awor, ki bendicion Juda, e di cuater yiu di Jacob, a haya? Como cu el a sobresali entre su rumannan pa su arepentimento profundo, e Mesias lo a bin di su liña di descendencia. Esta un gran bendicion!—Genesis capitulo 48, 49.

Ora Jacob a muri na edad di 147 aña, e rumannan di Jozef tabatin miedo cu lo e por a uza su poder pa tuma venganza. Pero Jozef a trankilisa nan. Constantemente e tabata bisa nan cu nan mester a stop di sinti nan mes culpabel pa tur loke cu a sosode pasobra ta Jehova mes tabata tras di e asunto. Jozef a puntra nan: “T’ami ta na luga di Dios anto?” (Genesis 15:13; 45:7, 8; 50:15-21) Jozef tabata sa cu Jehova ta e Hues perfecto. Pues no tabata keda na dje pa castiga hende cu Dios a pordona.—Hebreonan 10:30.

Bo ta haya cu tin biaha ta dificil pa pordona? Esaki por ta mas dificil ainda ora un hende a haci malo cu nos intencionalmente. Pero si nos pordona hende cu di berdad a arepenti, nos lo alivia tanto nos mes dolor como di esun cu a peca contra nos. Y asina nos ta imita e fe di Jozef y e ehempel di su Tata misericordioso, Jehova.