Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  April 2015

Un Joya di Antiguedad den un Monton di Sushi

Un Joya di Antiguedad den un Monton di Sushi

KICO ta bin na bo mente ora bo pensa riba un monton di sushi? Casi sigur lo bo pensa riba algo desagradabel cu ta hole stinki. Pues lo bo no spera di haya algo di balor ey den, vooral no un joya precioso.

Sinembargo, un shen aña pasa dos homber a haya un joya asina meymey di hopi sushi. No tabata trata aki di un joya literal, sino algo di hopi mas balor. Kico e hombernan aki a haya? Y dicon loke nan a haya ta asina importante pa nos awe?

UN HAYAZGO INESPERA

Na comienso di siglo 20 Bernard P. Grenfell y Arthur S. Hunt, dos profesor di e Universidad di Oxford, a bishita Egipto. Ey, nan a haya varios fragmento di papiro den un monton di sushi banda di e Vaye di Nilo. Mas despues, na aña 1920, mientras cu e hombernan aki tabata traha riba un compilacion di e fragmentonan, Grenfell a cumpra algun fragmento mas cu a ser descubri na Egipto. El a cumpra nan pa e Bibliotheek John Rylands na Manchester, Inglatera. Pero tur dos homber a fayece prome cu nan por a caba di compila e fragmentonan.

Colin H. Roberts, un otro profesor di e Universidad di Oxford, a caba e trabou. Mientras cu e tabata sortia e fragmentonan, e la mira un pida papiro di nuebe pa seis centimeter. Pa su sorpresa, den e texto Griego e por a reconoce algun palabra. Un di e bandanan tabatin e palabranan di Juan 18:31 te cu 33 y e otro banda tabatin parti di e versiculonan 37 y 38. E ora ey, Roberts a realisa cu el a haya algo di hopi balor.

CALCULANDO SU EDAD

Roberts a pensa cu e pida papiro aki tabata hopi bieu. Pero con bieu e tabata? Pa haya sa esaki, el a compara e papiro aki cu otro manuscritonan di antiguedad cu si tabatin fecha. E tecnica aki yama paleografia. * Cu e metodo aki e por a calcula mas o menos con bieu e papiro aki tabata. Pa e comproba esaki, el a saca su potret, mand’e pa tres experto riba e tereno aki y pidi nan pa calcula con bieu e tabata. Kico nan a saca afo?

Ora e tres expertonan a studia e estilo di skirbi y e tipo di letter di e papiro, nan tur tres a yega na e conclusion cu posiblemente el a ser skirbi alrededor di aña 125 despues di Cristo, apenas algun decada despues di e morto di apostel Juan. Pero paleografia no ta e manera di mas confiabel pa calcula con bieu un manuscrito ta. Hopi experto ta di opinion cu e texto di e fragmento lo por ta data di cualkier aña di siglo 2. Sinembargo, e pida papiro aki tabata, y ta keda, e fragmento di manuscrito di mas bieu di e Scritura Griego Cristian cu hende a yega di haya.

KICO E FRAGMENTO DI RYLANDS TA REVELA?

Dicon e fragmento aki di e Evangelio di Juan ta asina importante pa hende cu ta stima Bijbel den nos tempo? Tin por lo menos dos motibo. E prome, e formato di e fragmento ta yuda nos compronde cuanto balor e Scritura tabatin pa e prome cristiannan.

Dicon e fragmento aki di e Evangelio di Juan ta asina importante pa hende cu ta stima Bijbel den nos tempo?

 Den siglo 2 despues di Cristo, hende tabata compila texto na dos manera: den forma di rol of den forma di codex. Un rol tabata traha di pidanan di papiro, of percament (algo manera papel di saco maron) geplak of cosi na otro pa forma un blachi largo. Un hende por a habri un rol of ser’e ki ora cu ta necesario. Mayoria di biaha hende tabata skirbi solamente un banda di e rol.

Pero, e fragmento chikito cu Roberts a haya tabatin texto skirbi na tur dos banda. Esaki ta indica cu probablemente el a bin di un codex y no un rol. Un codex tabata traha di papel di percament of papiro cu nan tabata cose na otro y dobla manera un buki.

Dicon un codex tabata mas mihor cu un rol? Wel, e prome cristiannan tabata predicador di e bon noticia. (Mateo 24:14; 28:19, 20) Nan a predica tur caminda na ken cu nan a topa, di cas pa cas, den plasa y riba caya. (Echonan 5:42; 17:17; 20:20) Pues tabata hopi mas practico pa e cristiannan cana cu un formato compacto di e Scritura.

Ademas, tabata mas facil pa tanto e congregacionnan como cada hende traha su mes copia di e Scritura. Asina e Evangelionan a ser copia bes tras bes. Sin duda esaki a haci posibel cu mas y mas hende por a bira cristian.

E fragmento di Rylands, parti dilanti y patras

E di dos motibo pakico e fragmento di Rylands ta asina importante pa nos awe ta pasobra e ta laga nos mira cu e textonan biblico a ser transmiti na un manera confiabel. Aunke e fragmento aki ta contene djis algun versiculo di e Evangelio di Juan, e ta bisa casi mescos cu loke nos por lesa awe den Bijbel. Pues e fragmento di Rylands ta comproba cu aunke Bijbel a ser copia bes tras bes den transcurso di tempo, toch e no a cambia.

Ta claro cu e fragmento di Rylands di e Evangelio di Juan ta djis un di e tantisimo fragmento- y manuscritonan cu ta duna prueba cu e textonan di Bijbel a ser transmiti na un manera confiabel. Werner Keller a skirbi den su buki The Bible as History cu “e manuscritonan aki di antiguedad ta kita tur duda di cu e Bijbel cu nos tin awendia ta exacto y confiabel.”

Ta berdad cu cristiannan no ta basa nan fe riba descubrimento arkeologico. Nan ta kere cu “henter e Scritura ta inspira di Dios.” (2 Timoteo 3:16) Toch un joya precioso asin’aki ta sigura nos cu loke Bijbel a bisa for di hopi tempo pasa ta berdad: “E palabra di Jehova ta dura pa semper.”—1 Pedro 1:25.

^ par. 8 Segun e buki Manuscripts of the Greek Bible, paleografia ... “ta e estudio cu ta analisa scritura di antiguedad.” Cu tempo, hende su manera di skirbi ta cambia. E cambionan aki por mustra con bieu un manuscrito ta ora compar’e cu otro manuscritonan cu tin fecha conoci.

Mas Informacion

PREGUNTA CU BIJBEL TA CONTESTA

Bijbel Ta Duna un Relato Confiabel di e Bida di Hesus?

Considera algun informacion tocante e Evangelionan y e manuscrito di mas bieu cu tin.