Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  April 2015

 UN COMBERSACION INTERESANTE TOCANTE BIJBEL

Dicon Nos Mester Conmemora e Morto di Hesus?

Dicon Nos Mester Conmemora e Morto di Hesus?

Pa bo haya un idea con testigonan di Jehova ta combersa cu hende, tuma nota di e siguiente dialogo. Imagina cu Melisa, un Testigo, ta bishita un señora cu yama Shirley.

“SIGUI HACI ESAKI NA MI MEMORIA”

Melisa: Con ta bay Shirley? Con ta cu bo? M’a keda masha contento di mira bo siman pasa na e Conmemoracion di e morto di Hesus. * Con bo a hay’e?

Shirley: M’a hay’e hopi bon. Pero mi tin cu bisa si cu mi no a compronde tur loke nan a bisa. Mi sa cu hende ta celebra Pasco di Nacemento y Pasco di Resureccion. Pero nunca mi no a tende di hende cu ta conmemora su morto.

Melisa: Bo tin rason. Rond mundo tin hopi hende ta celebra Pasco di Nacemento y Pasco di Resureccion. Pero testigonan di Jehova ta kere cu ta importante pa conmemora e morto di Hesus. Si bo tin un tiki tempo, lo mi tin gana di mustra bo dicon.

Shirley: Si, ta bon, mi tin un par di minuut.

Melisa: Basicamente, testigonan di Jehova ta conmemora e morto di Hesus pasobra e mes a manda su discipelnan haci esey. Wak kico a pasa riba e anochi prome cu Hesus a muri. Bo a yega di tende toch cu Hesus tabatin un cena special cu su fiel apostelnan?

Shirley: Bo kiermen e Ultimo Cena?

Melisa: Asina mes. Nan ta yam’e e Cena di Señor tambe. Na e cena ey, Hesus a duna su apostelnan instruccion bon cla. Wak kico Hesus a bisa na Lucas 22:19. Bo lo kier les’e pa mi?

Shirley: Oke. “Tambe el a coy un pan, gradici Dios, kibra e pan y duna nan, bisando: ‘Esaki ta representa mi curpa cu lo mi duna pa boso. Sigui haci esaki na mi memoria.’”

Melisa: Masha danki. Wak ki instruccion Hesus a duna den e ultimo frase: “Sigui haci esaki na mi memoria.” Y net un tiki prome cu Hesus a haci esaki, el a bisa nan bon cla kico nan mester a conmemora. Tambe el a bisa cu lo e duna su bida pa su siguidornan, y el a laga nos compronde esaki cu e palabranan di Mateo 20:28. E texto aki ta bisa: “E Yiu di hende no a bin pa ser sirbi, sino pa sirbi y pa duna su alma como rescate a cambio di hopi hende.” Cu otro palabra, ta pa e motibo ey testigonan di Jehova ta reuni un biaha pa aña pa conmemora e morto di Hesus, esta, e sacrificio di rescate cu Hesus a ofrece. Pues, su morto por nifica bida pa tur hende cu ta obediente.

DICON NOS MESTER DI UN RESCATE?

Shirley: Mi a yega di tende cu Hesus a muri pa nos por haya bida. Pero pa bisa bo berdad, nunca mi no a compronde con esey ta bay.

Melisa: Wel, mi ta compronde bo. E topico di e rescate, of e sacrificio di Hesus, ta basta profundo.  Pero e ta un di e berdadnan di mas bunita den Bijbel. By the way, bo tin tempo ainda?

Shirley: Si, mi tin un tiki tempo ainda.

Melisa: Great. Bo sa, mi tabata lesando algo tocante e rescate y mi ta bay purba di splica bo esaki na un manera simpel.

Shirley: Oke.

Melisa: Pa bo por compronde kico e rescate ta, bo tin cu compronde prome kico a sosode ora Adam cu Eva a peca den e Hofi di Eden. Pa yuda nos capta esaki, laga nos lesa Romanonan 6:23. Bo por a les’e pa mi?

Shirley: Sigur no. E ta bisa: “E salario cu pica ta paga ta morto, ma e regalo cu Dios ta duna ta bida eterno pa medio di Cristo Hesus, nos Señor.”

Melisa: Danki. Laga nos analisa e texto aki. Na prome luga, wak con e ta cuminsa: “E salario cu pica ta paga ta morto.” Esaki ta un regla simpel cu Dios a stipula na comienso di historia humano. E salario, of castigo, pa pica ta morto. Di mes, na cuminsamento niun hende no tabata pecador. Dios a crea Adam cu Eva perfecto y tur nan yiunan lo por a nace perfecto. Pues nan lo no tabatin cu muri nunca. Adam cu Eva y tur nan descendientenan lo por a biba feliz pa semper. Pero manera nos sa, cosnan no a bay asina, toch?

Shirley: Berdad, Adam cu Eva a come di e fruta prohibi.

Melisa: Corecto. Ora Adam cu Eva a haci esey, nan a desobedece Dios, y nan a peca. Pues ta nan a scoge pa bira imperfecto y a bira pecador. Loke nan a scoge tabatin consecuencianan desastroso, no pa nan so sino tambe pa tur nan descendientenan.

Shirley: Con asina?

Melisa: Wel, nos lo por compara e situacion aki cu un forma pa traha bolo. Bo gusta traha bolo?

Shirley: Sigur cu si!

Melisa: Awel imagina bo cu bo tin un forma pa traha bolo. Prome cu bo haya chens di uz’e, e ta cay abou anto haya un deuk grandi. Awor, kico lo pasa cu tur bolo cu bo traha den e forma ey? Nan tur lo sali cu un deuk, toch?

Shirley: Si, di mes cu si.

Melisa: Wel, ora Adam cu Eva a desobedece Dios, nan tambe a haya manera un deuk, es decir, nan a bira imperfecto y pecador. Debi cu nan a peca prome cu nan a haya yiu, tur nan descendientenan a nace cu e mesun deuk ey; nan tur a nace den pica. Den Bijbel, e palabra “pica” no ta referi solamente na e acto riba su mes, sino tambe na e condicion pecaminoso cu nos a hereda. Como resultado, ora Adam cu Eva a peca, nan a pasa pica pa tur nan descendientenan. Pesey aunke nos no a haci nada malo, nos a hereda pica y morto. Pero manera nos a lesa na Romanonan 6:23, e salario di pica ta morto.

Shirley: Pero esey no ta husto. Dicon tur hende tin cu sigui sufri pa falta di Adam cu Eva?

Melisa: Berdad, bo tin rason, e no ta parce husto. Pero e ta encera mas cu esey. Debi cu Dios su husticia ta perfecto, el a dicidi cu Adam cu Eva mester a muri pa nan pica. Pero e no a laga nos, como nan descendientenan, sin speransa. Dios a percura un manera pa libra nos for di pica y morto. Aki ta caminda e sacrificio di rescate di Hesus ta drenta den e asunto. Laga nos wak Romanonan 6:23 atrobe. E texto ta menciona cu “e salario di pica ta morto”, y despues e ta sigui bisa: “Ma e regalo cu Dios ta duna ta bida eterno pa medio di Cristo Hesus,  nos Señor.” Pues, e morto di Hesus ta loke ta habri caminda pa libra nos di pica y morto. *

E RESCATE—DIOS SU REGALO DI MAS GRANDI

Melisa: Mi kier a splica bo un otro parti di e mesun versiculo ey.

Shirley: Cua esey ta?

Melisa: Wak kico e versiculo ta bisa: “E regalo cu Dios ta duna ta bida eterno pa medio di Cristo Hesus, nos Señor.” Pues, si ta Hesus a sufri, muri y duna su bida pa nos, dicon e versiculo ey ta bisa cu e sacrificio ta “e regalo cu Dios ta duna”? Dicon e versiculo no ta bisa: E regalo cu Hesus ta duna? *

Shirley: Hmm. Bo sa, mi’n sa.

Melisa: Wel, Dios a crea Adam cu Eva, y ta contra dje nan a peca ora nan a desobedec’e den e Hofi di Eden. E lo mester a bira masha tristo ora cu su prome dos yiunan riba Tera a rebela contra dje. Pero mesora Jehova a bin cu un solucion. * El a dicidi di manda un di su yiunan spiritual na Tera pa biba como un ser humano perfecto y pa ofrece su bida como un sacrificio di rescate. Pesey, si bo wak bon, e sacrificio di rescate cu Dios a percura tabata un regalo di su parti. Pero e rescate tabata un regalo di Dios den un otro sentido tambe. Bo a yega di pensa con Dios lo a sinti ora nan a mata Hesus?

Shirley: Pa mi bisa bo berdad, no nunca.

Melisa: Mi ta mira algun cos di hunga den cura. Bo tin yiu, toch?

Shirley: Si. Mi tin dos, un yiu homber y un yiu muher.

Melisa: Como mayor, pensa un rato con Hesus su Tata celestial, Jehova Dios, a sinti ora cu Hesus a muri. Con bo ta kere el a sinti ora e tabata mira con nan a aresta su Yiu, haci cherche di dje y dal e mokete? Y ora nan a clab’e na staca y lag’e sufri prome cu el a muri, con bo ta kere el a sintie?

Shirley: Esey lo mester tabata hopi duro p’e. Bo sa, mi nunca a yega di pensa riba esey.

Melisa: Di mes, ta imposibel pa nos sa precies con Dios a sinti e dia ey. Pero loke si nos sa ta cu e tin sintimento, y nos sa tambe dicon el a permiti tur esaki sosode. Juan 3:16 ta splica esaki na un manera masha bunita. Bo kier a les’e?

Shirley: Oke. E ta bisa: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”

E sacrificio di rescate ta e manera di mas grandi cu Dios a mustra su amor pa nos

Melisa: Danki. Si bo wak na cuminsamento di e texto, e ta bisa: “Dios a stima mundo.” Pues, kico a motiva Dios pa manda su Yiu na Tera pa muri pa nos? Esey ta: amor. E sacrificio di rescate ta e manera di mas grandi cu Dios a mustra su amor pa nos. Y pesey testigonan di Jehova ta bin hunto un biaha pa aña pa recorda e morto di Hesus. Shirley, con b’a haya e splicacion? E tabata comprendibel?

Shirley: Sigur cu si. Danki pa tuma tempo pa splica mi.

Tin un topico di Bijbel en particular cu bo tin gana di sa mas di dje? Bo ta interesa pa sa mas di e creencianan di testigonan di Jehova? Si esey ta e caso, no duda pa bisa un testigo di Jehova esey. Lo e ta contento pa combersa riba e topico ey cu bo.

^ par. 5 Un biaha pa aña, testigonan di Jehova ta bin hunto riba e aniversario di e morto di Hesus pa recorda su sacrificio. E aña aki, e Conmemoracion ta cay riba diabierna 3 di april.

^ par. 32 Un siguiente articulo den e serie aki lo splica con e sacrificio di rescate di Hesus ta libra nos di pica y kico nos mester haci pa por beneficia di dje.

^ par. 36 Bijbel ta bisa cu Dios y Hesus ta dos persona diferente. Pa mas informacion, wak capitulo 4 di e buki Kico Bijbel Ta Siña Realmente? publica pa testigonan di Jehova.

^ par. 38 Wak Genesis 3:15.