Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  April 2015

Bo Tabata Sa?

Bo Tabata Sa?

Kico tabata e funcion di un centurion den e ehercito Romano?

Centurion Marcus Favonius Facilis

E Scritura Griego Cristian ta menciona varios centurion Romano. Un di nan tabata e oficial di ehercito cu a manda ehecuta Hesus. Cornelio, e prome persona cu no tabata hudiu cu a bira cristian, tambe tabata di e rango ey. Un otro tabata e oficial cu a manda suta Pablo. Y bo tin Julio kende a hiba Pablo Roma.—Marco 15:39; Echonan 10:1; 22:25; 27:1. *

Un centurion normalmente tabata dirigi un grupo di mas o menos 50 pa 100 soldaat. E tabatin e tarea di entrena y disciplina e soldaatnan, inspecciona nan armadura y ekipo di guera y dirigi nan ora di bay guera.

E rango di centurion tabata e posicion di mas halto cu un soldaat Romano por a haya. Esnan cu tabatin e posicion aki tabata soldaatnan cu a sirbi pa hopi tempo y cu mester tabata un bon lider. E disciplina y eficiencia di e poderoso ehercito Romano tabata depende di e centurionnan aki. Segun un diccionario, centurionnan “mayoria di biaha tabata e soldaatnan cu mas experencia y bon den nan trabou.”

Ki diferencia tin entre e spielnan di awendia y esnan di tempo biblico?

Un spiel Egipcio di antiguedad

Spielnan di awendia ta traha di glas. En cambio, den tempo biblico generalmente nan tabata traha spiel di metal bon gepolish, mayoria di biaha di brons, pero tambe di koper, plata, oro of un mescla di oro cu plata. E prome biaha cu Bijbel ta menciona spiel ta en conexion cu e construccion di e tabernakel, e prome centro di adoracion na Israel. Na e ocasion ey, hende muher a contribui cu spiel pa traha un labamano sagrado y su pia di brons. (Exodo 38:8) Probablemente, mester a smelt e spielnan pa por a traha e labamano.

Ora cu arkeologonan a coba na Israel y den bisindario, varios biaha nan a haya spiel hunto cu prenda y otro acesorio cu hende muher tabata uza como adorno. Por lo general, e spielnan aki tabata rondo y un banda so di dje tabata gepolish. E mannan tabata traha di palo, metal of ivoor. Mayoria di biaha e mannan ey tabatin e figura di un hende muher.

E spielnan di antiguedad tabata dof compara cu e spielnan di glas di awendia. Esey kisas ta loke apostel Pablo tabata kiermen ora el a bisa: “Awor nos ta mira un forma vago comosifuera ta den un spiel di metal nos ta wak.”—1 Corintionan 13:12.

^ par. 1 Den e idioma original, e palabra traduci como “oficial di ehercito” den e textonan aki ta referi na un centurion.