Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  March 2015

 STORIA DI BIDA

Jairo Ta Sirbi Dios cu Su Wowonan

Jairo Ta Sirbi Dios cu Su Wowonan

Imagina con bo bida lo ta si e unico cos di bo curpa cu bo por controla ta bo wowonan. Mi ruman homber Jairo ta den e situacion dificil ey. Toch su bida tin un proposito. Pero prome cu mi splica dicon, laga mi conta bo su storia.

Jairo a nace cu un tipo di paralisis celebral cu yama spastische quadriplegie. * E maleza aki ta pone cu e no tin control riba gran parti di su curpa. Como resultado, su celebro no por manda señal na su musculonan, y pesey e ta haci movecionnan cu e no por controla y su man- y pianan ta troce sin cu e por yuda. Tin biaha, Jairo ta cuminsa sacudi asina hopi cu e ta haci su mes daño, y tambe e por dal otro hende cu ta banda di dje si nan no pone atencion. Pa evita accidente, lamentablemente, hopi biaha nos tin cu mara su man- y pianan na e rolstoel.

UN HUBENTUD DOLOROSO

Jairo a sufri hopi segun cu e tabata crece. Tempo e tabatin apenas tres luna, el a cuminsa haya atake di epilepsia, y tin biaha esaki tabata hasta pon’e cay flauw. Hopi biaha mi mama tabata core bay hospital cu ne den su brasa, pensando cu el a muri.

Como cu cada biaha Jairo su musculonan tabata contrae y hala cera duro, cu tempo, su wesonan a deforma. Ora e tabatin 16 aña, el a saca su pelvis for di luga y dokter mester a opera su bil di pia, heup y pelvis. E tabata un operacion grandi. Ainda mi ta corda con tur anochi Jairo tabata grita yora di dolor ora cu e tabata recuperando.

Jairo su limitacion fisico tabata asina grave cu e mester a depende completamente riba otro hende pa yud’e cu su actividadnan diario, manera come, bisti paña y bay drumi. Mayoria di biaha ta mi mama cu mi tata ta haci esey. Aunke Jairo mester di yudansa constante, semper nan ta cord’e cu su bida no ta depende solamente di e yudansa di hende sino tambe di e yudansa di Dios.

NOS A HAYA UN MANERA PA COMUNICA

Nos mayornan ta testigo di Jehova y for di tempo cu Jairo tabata baby nan tabata lesa relatonan biblico p’e. Semper nan tabata sa cu bida tin mas sentido ora un persona tin un bon relacion cu Dios. Jairo tin un curpa fragil cu ta sacudi constantemente, pero a pesar di esey e por tin un speransa briyante y solido pa futuro. Sinembargo, semper nan tabata puntra nan mes si Jairo por a capta e siñansanan di Bijbel.

Un dia, tempo Jairo tabata chikito, mi tata a bis’e: “Jairo, por fabor bisa mi algo. Si di berdad bo stima mi, lo bo papia cu mi.” Na e momento ey Jairo su wowonan a yena cu awa. Maske el a purba di expresa su sintimentonan cu palabra, e unico cos cu  tabata sali for di su boca ta algun zonido. Mi tata a sinti su mes malo pasobra el a pone Jairo yora. Pero e manera cu Jairo a reacciona a mustra cu el a compronde loke mi tata a bisa; ta papia e no por a papia.

Poco tempo despues, mi mayornan a nota cu tin biaha Jairo tabata move su wowonan lihe lihe comosifuera e tabata kier bisa nos loke e tabata sinti y pensa. Jairo tabata sinti su mes frustra ora hende no comprond’e. Pero ora mi mayornan a cuminsa compronde loke e tabata bisa cu su wowonan y dun’e loke e tabatin mester, e tabata haya un sonrisa grandi riba su cara. Tabata su manera di bisa danki.

Un logopedista a duna nos un sugerencia pa yuda nos comunica cu ne: hisa tur dos man ora cu ta trata di un pregunta cu por ser contesta cu un simpel si of no. Man drechi kiermen si y man robes kiermen no. Di e manera aki, Jairo por a laga nos sa kico e tabata kier door di wak na un di nos mannan.

UN LOGRO IMPORTANTE DEN JAIRO SU BIDA

Tres biaha pa aña, testigonan di Jehova ta tene congreso- y asambleanan caminda nan ta duna discursonan basa riba Bijbel. Hopi hende ta asisti na e congreso- y asambleanan aki. Semper Jairo tabata bira hopi entusiasma durante e discurso pa e candidatonan di bautismo. Un dia, ora cu Jairo tabatin 16 aña, mi tata a puntr’e: “Jairo, bo tambe kier batisa?” Di biaha el a wak mi tata su man drechi, mustrando claramente cu e tabata kier batisa. E ora ey mi tata a puntr’e: “Bo a priminti Dios den oracion cu lo bo kier sirbie pa semper?” Atrobe Jairo a bira wak mi tata su man drechi, mustrando bon cla cu el a dedica su bida na Jehova caba.

Despues di a trata cu Jairo varios tema biblico relaciona cu bautismo, tabata bisto cu Jairo a compronde kico bautismo cristian ta. Pues na aña 2004, el a contesta e pregunta di mas importante di su bida: “Bo a dedica bo mes na Dios pa haci su boluntad?” Jairo a wak ariba y asina el a mustra cu su contesta tabata si. Na e manera ey nos a plania di antemano pa e duna un contesta afirmativo. Pues, cu 17 aña di edad Jairo a batisa como un testigo di Jehova.

WOWONAN FIHA RIBA E COSNAN DI DIOS

Na 2011, Jairo a haya un manera nobo pa comunica: un computer cu e por controla cu movemento di su wowonan. E computer aki ta sigui e movecion di Jairo su iris. Ora Jairo keda wak un icon of kinipi wowo, ta comosifuera e ta click riba e pantaya mescos cu ora bo click algo cu un mouse. E computer ta diseña cu un programa cu tin varios icon cu ta representa  palabra of frase pa yuda Jairo comunica. Ora cu e kinipi wowo riba un icon, e programa di computer ta comberti e mensahe cu tin skirbi den un stem electronico.

Segun cu Jairo su conocemento di Bijbel tabata crece, su deseo pa yuda otro hende compronde siñansanan di Bijbel tambe a crece. Hopi biaha durante nos Adoracion Como Famia e ta wak ami y despues e ta wak e computer. Di e manera ey e ta corda mi cu mi mester skirbi comentarionan cu e por duna durante e sesionnan di pregunta y contesta cu tin na nos reunionnan di congregacion cristian.

Durante reunion, cu hopi pasenshi Jairo ta busca riba e pantaya pa wak riba cua icon e mester click, y despues di esey e stem electronico ta bisa su contesta di manera cu tur hende por tende. E ta smile yen di goso ora cu e por anima e miembronan di e congregacion na e manera aki. Alex, un di Jairo su amigonan hoben, a bisa: “Jairo su comentarionan tocante temanan biblico semper ta impresiona mi.”

Jairo ta uza un computer cu e por controla cu movemento di su wowonan y cu tin un stem electronico pa duna comentario na reunion y predica na otro hende

Jairo ta uza su wowonan tambe pa comunica cu otro hende tocante su creencianan. Un manera cu e ta haci esaki ta ora e click riba e icon cu ta mustra un hardin cu bestia y hende di tur nacion cu ta biba na paz cu otro. Ora cu e haci esaki, e stem ta bisa: “E speransa cu Bijbel ta ofrece ta cu Tera lo bira un paradijs caminda lo no tin maleza ni morto mas, Revelacion 21:4.” Si e persona mustra interes, Jairo ta click riba un otro icon y e stem di e computer ta bisa: “Lo bo kier studia Bijbel cu mi?” Pa nos sorpresa, nos welo a acepta e invitacion aki. Un ruman tabata yuda Jairo pa studia Bijbel cu nos welo. Ta hopi emocionante pa mira con pocopoco nos welo tabata haya conocemento di Bijbel. Y nos tabata contento pa mira nos welo batisa na e congreso regional na Madrid na augustus 2014.

E docentenan di Jairo tambe a mira cuanto fe e tin den Dios. Rosario, un logopedista di Jairo, a yega di bisa: “Si un dia mi dicidi di drenta un religion, ta testigo di Jehova lo mi bira. Mi a mira con Jairo su fe a duna su bida un berdadero proposito a pesar di e situacion dificil cu e ta aden.”

Jairo su wowonan ta briya di alegria cada biaha cu mi lesa e promesa di Bijbel aki p’e: “E cohonan lo bula manera bina, y lenga di e muda lo grita di alegria.” (Isaias 35:6) Maske tin biaha e ta sinti su mes desanima, toch por lo general e ta contento. Esaki ta posibel solamente pasobra e personanan di mas importante den su bida ta Dios y su rumannan cristian. Jairo su actitud positivo y fe fuerte ta duna prueba cu si nos sirbi Jehova bida lo ta bale la pena hasta bou di e situacionnan di mas dificil.

^ par. 5 Paralisis celebral ta un termino general pa describi e daño celebral cu ta afecta movemento di e curpa. Tambe e por causa atake di epilepsia, problema serio cu comemento y problema cu habla. Spastische quadriplegie ta e tipo di paralisis celebral di mas severo y e persona cu ta sufri di dje no por tene su nek stret, y su man- y pianan ta bira stijf.