Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  March 2015

Bo Tabata Sa?

Bo Tabata Sa?

Ki bentaha ciudadania Romano a duna apostel Pablo?

Pablo a declara: “Mi ta apela na Cesar!”

Hende cu tabatin ciudadania Romano tabatin cierto derecho- y privilegionan tur caminda den e Imperio Romano. Nan tabata cay bou di e ley Romano y no bou di e ley di e provincianan. Ora un ciudadano Romano ser acusa, e por a acepta pa ser husga segun e leynan local, pero e tabatin derecho di aparece dilanti di un tribunal Romano tambe. Si el a haya sentencia di morto, e tabatin e derecho di apela su caso cerca e emperador.

A base di e derechonan aki, Ciceron, un politico Romano di siglo un prome cu Cristo, a bisa: “Ta un crimen pa mara un ciudadano Romano, ta un acto di maldad pa sut’e, y pa yega asina leu di mat’e, ta casi manera asesina bo propio mama of tata.”

Apostel Pablo a predica den henter e Imperio Romano. Y Bijbel ta menciona tres ocasion cu el a haci uzo di su derecho como ciudadano Romano: (1) El a informa e wardadornan di ordo publico di Filipo cu nan a viola su derechonan ora cu nan a sut’e. (2) Na Jerusalem el a revela cu e ta un ciudadano Romano pa evita di haya sota. (3) El a apela su caso na Cesar, emperador Romano, pa Cesar mes por a trata su caso.—Echonan 16:37-39; 22:25-28; 25:10-12.

Con nan tabata paga wardadornan di carne den tempo biblico?

Un contract graba riba klei pa compra di carne y cabrito, rond di aña 2050 prome cu Cristo

E patriarca Jacob a cuida e bestianan di su omo Laban pa 20 aña. El a traha 14 aña pa e por a casa cu Laban su dos yiu muhernan. Despues el a traha 6 aña mas y a haya un cantidad di bestia como pago. (Genesis 30:25-33) E revista Biblical Archaeology Review ta bisa cu un combenio entre un doño y un wardador di carne, manera esun entre Laban y Jacob, “tabata hopi conoci pa e escritor- y lesadornan di e texto biblico den antiguedad.”

Un ehempel di esey ta e contractnan cu a ser descubri na Nuzi, Larsa y otro sitionan cu awe ta conoci como Irak. Cada combenio tabata conta pa un aña, cuminsando for di e temporada di pela carne te na e mesun temporada ey den e siguiente aña. Cada wardador tabata haya un cantidad specifico di bestia pa cuida. Tabata registra e bestianan segun nan edad y sexo. Un aña despues, e wardador mester a duna e doño un cantidad di lana, producto di lechi y carne jong cu nan a palabra, y e resto tabata bay pa e wardador mes.

E cantidad di bestia por a aumenta dependiendo di cuanto carne embra un wardador a haya pa cuida. Shen carne embra por a werp 80 lamchi. Cualkier perdida di animal tabata ser kita for di e pago di e wardador. Pues, e tabatin bon motibo pa cuida e bestianan bon.