Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  February 2015

 BIJBEL TA CAMBIA BIDA DI HENDE

E Contestanan Cla y Logico di Bijbel A Impresiona Mi

E Contestanan Cla y Logico di Bijbel A Impresiona Mi
  • NACI NA AÑA: 1948

  • PAIS NATAL: HUNGRIA

  • SU PASADO: MI TABATA BUSCA CONTESTA PA E PREGUNTANAN IMPORTANTE DI BIDA

MI PASADO:

Mi a nace na Székesfehérvár, Hungria, un stad cu tin un historia largo di mas cu 1.000 aña. Lamentablemente, ainda e cicatriznan cu Segundo Guera Mundial a laga atras den e stad ey ta bibo den mi mente.

Mi a lanta cerca mi welanan parti di mi mama. Mi tin grato recuerdo di nan, specialmente di mi wela Elisabeth. El a inculca den mi un fe firme den Dios. For di tempo mi tabatin tres aña di edad, tur anochi mi tabata ripiti hunto cu ne e oracion di Nos Tata. Pero ta te ora mi tabatin casi 30 aña mi a bin compronde e nificacion di e oracion ey.

Mi welanan a cria mi, pasobra mi mayornan tabata traha di dia y anochi cu e speransa di por a spaar suficiente pa cumpra un bon cas. Pero cada pasa un diasabra henter e famia tabata bin hunto pa un comemento. Mi tabata anhela e ocasionnan ey.

Na 1958, e soño di mi mayornan a bira realidad; nan a logra cumpra un cas cu nos tur tres por a biba aden. Porfin mi por a biba hunto cu nan y mi tabata feliz y contento. Sinembargo, e alegria ey no a dura mucho; apenas seis luna despues mi tata a muri di cancer.

Mi a keda hopi kibra. Mi ta corda con mi tabata resa na Dios: “Mi a roga bo pa laga papi keda na bida. Mi tin mester di dje. Dicon bo no a contesta mi?” Mi tabatin hopi gana di sa unda mi tata tabata. Mi tabata puntra mi mes: Ta cielo el a bay? Of el a stop di existi pa semper? Mi tabata envidia otro mucha cu si tabatin nan tata.

Pa hopi aña mi tabata bay santana casi tur dia. Mi tabata hinca rudia na su graf y resa: “Dios, por fabor, mi kier sa unda mi tata ta.” Tambe mi tabata pidi Dios yuda mi compronde e nificacion di bida.

Tempo mi tabatin 13 aña mi a dicidi di siña Aleman. Mi a pensa cu den e literatura extenso di e idioma Aleman kisas mi por a haya contesta pa mi preguntanan.  Na 1967, mi a bay studia den e stad Jena cu e tempo ey tabata parti di Oost Alemania. Mi tabata hopi interesa den literatura di filosofonan Aleman, specialmente e bukinan cu ta papia tocante nificacion di bida. Aunke mi a haya algun idea interesante, ningun no a laga mi echt satisfecho. Pesey mi a sigui pidi Dios yuda mi haya contesta pa mi preguntanan.

BIJBEL A CAMBIA MI BIDA:

Na 1970, mi a bay bek Hungria caminda mi a conoce Rose, cu kende mi a casa despues. Na e tempo ey, Hungria tabata un pais comunista. Pesey, djis despues cu nos a casa, nos a huy bay Austria cu e meta di emigra pa Sydney, Australia, caminda mi omo tabata biba.

No a dura mucho cu mi a haya trabou na Austria. Un dia, un colega di trabou a bisa mi cu mi por haya contesta pa tur mi preguntanan den Bijbel, y el a duna mi algun buki cu ta bay over di Bijbel. Di biaha mi a lesa nan y tabata kier a siña mas. Pesey, mi a skirbi e editornan di e bukinan, testigonan di Jehova, pa pidi mas literatura.

Net riba e dia cu nos a haci un aña casa, un Testigo hoben di Austria a bishita ami cu Rose. El a trece e literatura cu mi a manda pidi y a ofrece pa studia Bijbel cu mi, locual mi a acepta. Mi tabata asina ansioso pa siña di Bijbel cu nos tabata studia dos biaha pa siman. Anto cada estudio tabata dura rond di cuater ora.

Loke e Testigonan a siña mi for di Bijbel a fascina mi. Ora nan a mustra mi e nomber di Dios, Jehova, den mi Bijbel Hungaro, mi no por a kere mi wowo. Den tur e 27 añanan cu mi tabata bay misa ni un biaha mi no a tende e nomber ey ser menciona. E contestanan cla y logico di Bijbel a impresiona mi. Por ehempel, mi a siña cu e mortonan no ta consciente di nada, comosifuera den un soño profundo. (Eclesiastes 9:5, 10; Juan 11:11-15) Mi a haya sa tambe tocante e promesa cu Bijbel ta duna cu lo bay tin un Tera nobo caminda “lo no tin morto mas.” (Revelacion 21:3, 4) Anto awor mi tin e speransa di mira mi tata bek, pasobra den e Tera nobo ey “lo bay tin un resureccion.”—Echonan 24:15.

Rose a join mi den e estudio di Bijbel, y nos a progresa asina lihe cu nos a caba e buki di estudio den apenas dos luna. Nos tabata bay tur e reunionnan di testigonan di Jehova na nan Salon di Reino, y e amor, bondad y union cu ta reina entre nan a impresiona nos masha hopi.—Juan 13:34, 35.

Na 1976 nos a haya permiso pa drenta Australia. Nos a tuma contacto di biaha cu testigonan di Jehova eynan. Nan a laga nos sinti nos na cas entre nan, y na 1978 nos a batisa como Testigo.

E BENEFICIONAN:

Porfin mi a haya contesta riba e preguntanan cu tabata molestia mi pa asina tanto tempo. Mi a hala cerca Jehova Dios y asina mi a haya e mihor Tata cu ta existi. (Santiago 4:8) Y e speransa di mira mi tata biologico atrobe den e mundo nobo cu Dios a priminti ta di gran balor pa mi.—Juan 5:28, 29.

Na 1989 nos a dicidi di bay Hungria bek pa nos por comparti nos creencianan cu amigo, famia y otro hende. Nos tabatin e privilegio di studia Bijbel cu cientos di hende. Mas cu 70 di nan a cuminsa sirbi Jehova hunto cu nos y tambe mi mama stima.

Pa 17 aña largo mi a pidi Dios yuda mi haya contesta pa mi preguntanan. Mientrastanto, 39 aña a pasa caba y te ainda mi ta resa na Dios. Pero porfin mi por bisa: “Danki, mi Tata stima den cielo pa contesta e oracionnan cu mi tabata haci for di chikito.”

Mas Informacion

Kico Bijbel Ta Siña Realmente?

Berdadero Speransa pa Bo Sernan Keri Cu A Muri

Bo a yega di perde un ser keri den morto? Ta posibel pa mira nan atrobe? Haya sa loke Bijbel ta bisa tocante resureccion.

REUNION

Kico Ta Sosode na un Salon di Reino?

Tira un bista y haya sa.