Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2015

Nos Mester Resa na Hesus?

Nos Mester Resa na Hesus?

UN INVESTIGADOR a haci un encuesta y a puntra mas cu 800 hoben di diferente grupo religioso si nan ta kere cu Hesus ta contesta oracion. Mas cu 60 porciento a contesta cu si. Pero tabatin un hoben cu a scrap Hesus su nomber y a skirbi “Dios” na su luga.

Kico abo ta pensa? Na ken nos mester resa, of haci oracion? Na Hesus of na Dios? * Pa nos haya e contesta, laga nos wak con Hesus a siña su discipelnan haci oracion.

NA KEN HESUS A SIÑA NOS RESA?

For di Hesus su siñansa y ehempel, nos ta compronde na ken nos mester resa.

Hesus a resa na su Tata. Nos tambe mester haci mescos

SU SIÑANSA: Na un ocasion, un di e discipelnan di Hesus a pidie: “Señor, siña nos haci oracion.” Hesus a bis’e: “Ora boso ta haci oracion, bisa: ‘Tata.’” (Lucas 11:1, 2) Poco tempo despues, den su famoso Sermon Riba Sero, Hesus a anima su oyentenan pa haci oracion y a bisa nan: “Haci oracion na bo Tata.” Y el a sigura nan: “Boso Tata sa kico boso tin mester hasta prome cu boso pidie.” (Mateo 6:6, 8) Riba su ultimo anochi riba Tera, Hesus a bisa su discipelnan: “Kico cu boso pidi e Tata den mi nomber, lo e duna boso.” (Juan 16:23) Pues, manera nos a mira, bes tras bes Hesus a siña nos pa resa na su Tata y nos Tata, Jehova Dios.—Juan 20:17.

SU EHEMPEL: Hesus mes a resa na Dios, manera el a siña nos. Na Lucas 10:21, el a bisa: “Mi ta alaba bo publicamente, Tata, Señor di cielo y Tera.” Na un otro ocasion, “Hesus a hisa su cara na cielo y bisa: ‘Tata, mi ta gradici bo cu bo a tende mi.’” (Juan 11:41) Ademas, e ultimo palabranan cu el a bisa prome cu el a muri tabata: “Tata, den bo man mi ta confia mi spirito.” (Lucas 23:46) Asina Hesus a pone un ehempel cla y comprendibel: El a haci oracion na Jehova, e “Señor di cielo y Tera.” (Mateo 11:25; 26:41, 42; 1 Juan 2:6) Awor, kico di e cristiannan di prome siglo? Nan a compronde na ken nan mester a resa?

NA KEN E CRISTIANNAN DI PROME SIGLO A RESA?

Apenas un par di siman despues cu Hesus a bay cielo, opositornan a cuminsa persigui y menasa su discipelnan. (Echonan 4:18) Manera ta di spera, nan a resa pa pidi yudansa. Pero, na ken nan a resa? Bijbel ta bisa cu “nan tur hunto a haci oracion na Dios” y a pidie pa sigui yuda nan den “nomber di [su] sirbidor santo, Hesus.” (Echonan 4:24, 30) Pues, nan a sigui Hesus su instruccion y a haci oracion na Dios, no na Hesus.

Añanan despues, apostel Pablo a skirbi: “Semper nos ta gradici Dios, Tata di nos Señor Hesucristo, ora nos ta haci oracion pa boso.” (Colosensenan 1:3) Asina el a describi con e y su amigonan tabata haci oracion. Y Pablo a encurasha su rumannan den fe pa “semper gradici nos Dios y Tata pa tur cos den nomber di nos Señor Hesucristo.” (Efesionan 5:20) Pues, Pablo tambe  a encurasha otronan pa haci oracion na “Dios”, e Tata, pero semper den nomber di Hesus.Colosensenan 3:17.

Mescos cu e cristiannan di prome siglo, nos por mustra cu nos ta stima Hesus si nos ta obedece su instruccionnan encuanto oracion. (Juan 14:15) Si nos ta haci oracion solamente na Jehova, nos tambe por bisa cu confianza, mescos cu e salmista, “Mi ta stima SEÑOR, pasobra e ta tende mi bos y mi suplicanan ... lo mi sclama na dje tanten cu mi ta biba.” *Salmo 116:1, 2.

^ par. 3 Bijbel ta mustra cu Hesus y Dios no ta mesun persona. Pa mas informacion, wak capitulo 4 di e buki Kico Bijbel Ta Siña Realmente? publica pa testigonan di Jehova.

^ par. 11 Pa nos oracionnan ta aceptabel pa Dios, nos tin cu haci esfuerso pa biba segun Dios su rekisitonan. Pa mas informacion, wak capitulo 17 di e buki Kico Bijbel Ta Siña Realmente?