Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2015

 BIJBEL TA CAMBIA BIDA DI HENDE

Porfin Mi A Haya Contesta pa Mi Preguntanan!

Porfin Mi A Haya Contesta pa Mi Preguntanan!
  • NACI NA AÑA: 1987

  • PAIS NATAL: AZERBAIYAN

  • SU PASADO: TATA MOSLIM Y MAMA HUDIU

MI PASADO:

Mi a nace na Baku, Azerbaiyan. Nos ta dos ruman y ami ta esun di mas chikito. Mi tata tabata moslim, y mi mama tabata hudiu. Nan tabata stima otro hopi y tabata respeta otro su creencianan. Mi mama tabata apoya mi tata ora e tabata yuna durante e fiesta di Ramadan, y mi tata a apoya mi mama ora e tabata celebra e Pasco Hudiu. Na nos cas, nos tabatin Coran, Tora y Bijbel.

Mi tabata considera mi mes moslim. Nunca mi a duda cu Dios ta existi, pero tabatin algun cos cu mi no tabata compronde. Mi tabata puntra mi mes: Dicon Dios a crea hende? Ki sentido tin pa un hende sufri henter su bida y despues ser tormenta den fierno pa semper? Hende ta bisa cu tur cos cu sosode ta boluntad di Dios. Pesey mi tabata puntra mi mes: Acaso nos ta djis marioneta den man di Dios? Dios ta gusta mira hende sufri?

Tempo mi tabatin 12 aña di edad, mi a cuminsa resa namaz, e cinco oracionnan ritual cu moslimnan ta haci diariamente. Den e epoca ey, mi tata a manda ami cu mi ruman muher un scol hudiu. Eynan, nos a siña Hebreo y e tradicionnan di Tora. Tur dia, prome cu les cuminsa, nos mester a haci oracion segun tradicion hudiu. Pues, mainta mi tabata resa namaz na cas y na scol mi tabata participa den oracionnan hudiu.

Mi tabatin hopi pregunta, y mi tabatin hopi gana di haya contesta logico pa nan. Bes tras bes, mi tabata puntra e rabinan na scol: “Dicon Dios a crea hende? Kico Dios ta pensa di mi tata, cu ta moslim? Dicon e ta ser considera un hende impuro siendo cu e ta bon hende? Dicon Dios a cre’e anto?” Pero e poco contestanan cu mi tabata haya no tabata logico ni convencente.

BIJBEL A CAMBIA MI BIDA:

Na aña 2002, algo a sosode cu a pone mi perde fe den Dios. Un siman despues cu nos a  bay biba na Alemania, mi tata a haya un atake celebral y a bay den coma. Pa hopi aña, mi a pidi Dios cuida salud di mi famia. Y como cu mi tabata convenci cu ta e Todopoderoso so tin poder riba bida y morto, tur dia mi tabata rog’e pa e yuda mi tata. Mi tabata pensa: Ta facil pa Dios cumpli cu e deseo di un mucha chikito. Y mi tabata sigur cu lo e scucha mi suplicanan. Pero mi tata a muri.

Mi a pensa cu Dios no tabata interesa den nos, y mi a keda hopi down. Mi a cuminsa pensa cu sea mi no tabata haci oracion bon of Dios no ta existi. Mi tabata asina confundi cu mi no por a ni resa namaz mas. E otro religionnan no tabata atrae mi, pues mi a yega na e conclusion cu Dios no ta existi.

Seis luna despues, testigonan di Jehova a bati na nos porta. Como cu nos no tabata gusta religionnan cu ta kere den Cristo, ami cu mi ruman muher kier a mustra nan na un manera respetuoso cu nan ta siña hende loke ta robes. Nos a puntra nan: “Dicon cristiannan ta adora Hesus, cruz, Maria y otro idolonan siendo cu e Dies Mandamento ta prohibi esey?” E Testigonan a mustra nos prueba convencente for di Bijbel cu cristiannan berdadero no tin mag di adora idolo y cu nos mester haci oracion solamente na Dios. Mi a keda babuca.

Nos a puntra nan: “Awor, kico di e doctrina di Trinidad? Si Hesus ta Dios, con e por a biba riba Tera y ser mata?” Nan a bolbe uza Bijbel pa contesta nos preguntanan y a splica nos cu Hesus no ta Dios ni igual cu Dios. Nan a bisa tambe cu ta pa e motibo ey nan no ta kere den Trinidad. Mi a keda hopi sorprendi, y mi a pensa: E cristiannan aki si ta straño.

Pero, ainda mi tabata kier sa dicon hende ta muri y dicon Dios ta permiti sufrimento. E Testigonan a mustra mi e buki Conocimentu Cu Ta Hiba na Bida Eterno, * cu ta contene capitulonan cu lo a contesta mi preguntanan. Di biaha nan a cuminsa studia Bijbel cu mi.

Durante cada sesion di estudio, mi tabata haya contesta logico basa riba Bijbel. Mi a haya sa cu Dios su nomber ta Jehova y cu su cualidad principal ta amor. (Salmo 83:18; 1 Juan 4:8) Ademas, el a crea hende pa nan tambe disfruta di bida. Mi a bin compronde cu, aunke Dios ta permiti inhusticia, e ta odi’e y cu pronto lo e elimina esaki pa semper. Mi a siña cu e rebelion di Adam cu Eva a trece consecuencianan teribel pa humanidad. (Romanonan 5:12) Un di e consecuencianan ey ta morto di nos sernan keri, manera esun di mi tata. Pero, den e binidero mundo nobo lo no tin sufrimento mas, y Dios lo resucita hende cu a muri.—Echonan 24:15.

Si, Bijbel a contesta tur mi preguntanan, y mi a bolbe cuminsa kere den Dios. Segun cu mi a siña conoce testigonan di Jehova mas mihor, mi a realisa cu nan ta manera un famia internacional. E union cu ta reina entre nan y nan amor pa otro a impresiona mi. (Juan 13:34, 35) Mi a siña asina tanto cos tocante Jehova cu mi tambe kier a sirbie. Pesey, mi a dicidi di bira testigo di Jehova, y mi a batisa dia 8 di januari 2005.

E BENEFICIONAN:

E berdadnan di Bijbel, cu ta logico y convencente, a yuda mi cambia mi manera di mira bida y a duna mi paz mental. Danki na e resureccion cu e Palabra di Dios ta priminti, mi tin e speransa di mira mi tata atrobe; esey ta duna mi gran goso y consuelo.—Juan 5:28, 29.

Mi tin seis aña felizmente casa cu Jonathan, kende tambe ta un Testigo. Nos tur dos a siña cu e Palabra di Dios ta logico y facil pa compronde y cu e ta un tesoro precioso. Pesey, nos ta gusta papia cu otro hende tocante nos fe y nos speransa maraviyoso. Awor mi sa cu testigonan di Jehova no ta cristiannan straño, pero cristiannan berdadero.

^ par. 15 Publica pa Testigonan di Jehova, pero e no ta disponibel mas.

Mas Informacion

Kico Bijbel Ta Siña Realmente?

Kico Ta e Berdad Tocante Dios?

Bo ta kere cu Dios ta interesa den bo? Siña mas tocante su personalidad y con pa hala cerca dje.

DIOS TIN BON NOTICIA PA NOS!

Kico Ta Dios Su Proposito pa Tera?

Bijbel ta splica pakico Dios a crea nos planeta Tera, na ki tempo lo no tin sufrimento mas, kico futuro ta trece cu ne pa planeta Tera y kico ta spera esnan cu lo biba riba dje.