Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  December 2014

Un Hende cu Perspicasia No Ta Rabia Lihe

Un Hende cu Perspicasia No Ta Rabia Lihe

Nan ta kita un coach di basketball for di trabou pasobra e no por controla su rabia.

Un mucha ta sapatia pasobra e no a haya loke e tabata kier.

Un mama ta pleita cu su yiu homber pasobra su camber ta tur bruha.

NOS tur a yega di mira hende rabia, y sin duda nos mes tambe a yega di bira furioso. Maske nos ta considera rabiamento como un emocion cu nos tin cu domina, toch nos tin e tendencia di hustifica nos rabia, specialmente ora un hende haci algo cu segun nos ta inhusto. Un articulo di e Asociacion Mericano di Psicologia ta hasta bisa cu “rabiamento ta un emocion humano completamente normal y, por lo general, saludabel.”

E punto di bista ey por parce rasonabel si compar’e cu loke apostel Pablo a bisa bou di inspiracion divino. El a acepta cu tin biaha hende por rabia y a bisa: “Boso por rabia si, pero no peca; no laga solo baha mientras cu ainda boso ta rabia.” (Efesionan 4:26) Acaso esaki kiermen cu nos mester expresa nos rabia? Of juist nos mester haci nos best pa control’e?

RABIAMENTO TA MALO?

Ora cu Pablo a duna e conseho tocante rabiamento, kisas e tabata pensa riba Salmo 4:4 cu ta bisa: “Rabia, ma no haci pica.” Acaso Pablo tabata anima e cristiannan pa expresa nan rabia? No, al contrario. El a sigui bisa: “Kita tur tipo di amargura malicioso, rabia, furia, gritamento y papiamento di cos ofensivo for di boso, y tambe tur loke ta perhudicial.” (Efesionan 4:31) Ta bon pa nota cu e articulo di e Asociacion Mericano di Psicologia a sigui bisa: “Investigacionnan ta mustra cu, eigenlijk, ora bo expresa bo rabia, bo ta bira mas rabia y agresivo y esey no ta yuda bo ... soluciona e problema.”

Con anto nos por “kita tur tipo di” rabia y evita su consecuencianan? E Rey sabi Salomon di Israel di antiguedad a skirbi: “Prudencia [of, “perspicasia”, NW] di un hende ta haci cu e no ta rabia lihe, y pa laga un ofensa pasa ta su gloria.” (Proverbionan 19:11) Con “perspicasia” por yuda un persona ora e ta sinti cu e ta bay rabia?

PERSPICASIA TA CALMA RABIA

Perspicasia, of inzicht, ta e habilidad di mira kico tin tras di un situacion of compronde un situacion maske cierto detaye no ta completamente  obvio. Con esaki por yuda nos ora nos rabia of ser ofendi?

Ora nos mira un inhusticia tuma luga, nos por bira hopi rabia. Pero si nos keda sin domina nos emocion y reacciona na un manera violento, nos lo por haci daño na nos mes y hasta na otronan. Mescos cu un candela for di control por kima henter un cas, asina tambe rabia descontrola por daña nos reputacion, nos amistad cu otronan y hasta cu Dios. Pues, ora nos ta sinti cu nos ta bay rabia, ta momento pa nos para keto y analisa e situacion. Si nos tin un bista completo di e situacion, esey por yuda nos controla nos emocionnan.

E tata di Salomon, Rey David, a hera asesina un homber cu yama Nabal. Si David no a haya yudansa pa wak mas leu cu e situacion aki, lo e por a bira culpabel di sanger. Wak kico a pasa. David cu su hombernan a proteha e carnenan di Nabal den e desierto di Judea. Ora tabata tempo pa pela e carnenan, David a pidi Nabal dun’e algo di come pa e cu su hombernan. Nabal a contest’e: “Mi mester coge mi pan, mi awa y mi carni cu mi a mata pa mi peladonan di carne, y duna esaki na hombernan cu mi no sa for di unda nan ta bin?” Ki un insulto esaki tabata! Ora David a tende e palabranan ey, e cu su 400 hombernan a sali di biaha pa bay mata Nabal y tur e hombernan di su cas.—1 Samuel 25:4-13.

Abigail, e esposa di Nabal, a tende kico a pasa y a bay contra cu David. Ora Abigail a top’e, el a cay na rudia y a bis’e: “Laga bo sirbiente papia cu bo, y scucha e palabranan di bo sirbiente.” E ora ey Abigail a splica David con bobo Nabal tabata. Tambe el a bisa David cu lo e lamenta si e tuma venganza y drama sanger.—1 Samuel 25:24-31.

Abigail a yuda David compronde algo cu e no a mira prome, y asina el a logra calma e situacion tenso. Na prome luga, David a mira cu Nabal tabata bobo y bruto di naturaleza. Na di dos luga, David a mira cu lo e por a bira culpabel di sanger si e tuma venganza. Mescos cu David, bo tambe por tin motibo pa bira furioso. Kico bo mester haci? Segun un articulo tocante tecnicanan pa controla rabia di Mayo Clinic: “Hala rosea profundo y conta te 10.” Pues, para keto y pensa un rato kico a causa e problema, y kico lo ta e consecuencia di loke bo tin pensa di haci. Uza perspicasia pa calma bo mes y hasta kita bo rabia completamente.—1 Samuel 25:32-35.

Awe tambe hopi hende a haya yudansa pa controla nan rabia. Por ehempel, tempo cu Sebastian tabatin 23 aña y tabata preso na Polonia, el a siña controla su mal caracter y emocionnan fuerte door di tuma un estudio di Bijbel. El a splica: “Prome, mi ta pensa tocante e problema. Despues, mi ta trata di sigui e conseho di Bijbel. Y m’a ripara cu Bijbel ta e mihor guia.”

E consehonan di Bijbel por yuda bo controla bo mes

Setsuo a siña e mesun cos. El a bisa: “Mi tabata grita mi coleganan di trabou ora cu nan tabata fada mi. Awor cu mi sa kico Bijbel ta bisa, mi no ta grita mas, ma mi ta puntra mi mes: Ta ken ta fout eigenlijk? Acaso ta mi mes ta e problema?” E tipo di preguntanan ey a yud’e trankilisa su mes y controla su emocionnan.

Rabia por ta un emocion hopi fuerte, pero e consehonan cu tin den e Palabra di Dios ta mas fuerte ainda. Si bo aplica e bon consehonan ey cu tin den Bijbel y pidi Dios yuda bo, abo tambe lo por haya e perspicasia necesario pa bo no rabia lihe.