Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2014

 TOPICO PRINCIPAL | DI BERDAD DIABEL TA EXISTI?

Nos Mester Tin Miedo di Diabel?

Nos Mester Tin Miedo di Diabel?

Diabel ta mescos cu koolmonoxide: invisibel y hopi peligroso

Tin un gas cu no ta facil pa detecta. E no tin holo ni color. E ta mata su victimanan sin cu nan sa mes. E gas aki yama koolmonoxide. Segun calculo, mas cu mitar di e cantidad di hende cu muri venena, a muri debi na e gas aki. Pero bo no mester di drenta den panico. Tin maneranan pa bo detecta e gas aki y proteha bo mes. Hopi hende ta instala alarma cu ta detect’e y nan ta actua di biaha ora cu e alarma zona.

Diabel ta mescos cu koolmonoxide; e tambe ta invisibel, su influencia ta dificil pa detecta y e ta hopi peligroso. Pero bo no mester tene miedo di Diabel, ya cu Dios ta ofrece nos varios yudansa. Laga nos considera algun di nan.

E capacidad di scoge. Santiago 4:7 ta bisa nos: “Opone Diabel, y lo e huy for di boso.” Aunke Satanas ta poderoso, e no por obliga bo di haci algo cu bo no kier haci. Ta abo tin cu scoge. Na 1 Pedro 5:9 nos ta lesa: “Tuma boso posicion contra dje [Diabel], firme den fe.” Corda cu Diabel a bay laga Hesus despues cu el a rechasa e tres tentacionnan rotundamente. (Mateo 4:11) Bo tambe por scoge pa rechasa e intentonan di Satanas.

Amistad cu Dios. Santiago 4:8 ta anima nos pa “hala cerca Dios.” Jehova ta invita bo personalmente pa bo cera un amistad cu ne. Con bo por haci esey? E mihor manera pa cuminsa ta di siña mas tocante Jehova mediante Bijbel. (Juan 17:3) Mas bo siña di Jehova, mas lo bo stim’e, y e amor ey lo motiva bo pa haci su boluntad. (1 Juan 5:3) Con bo Tata celestial lo reacciona riba bo esfuerso pa hala mas cerca di dje? Santiago ta bisa cu ‘lo e hala cerca bo.’

Jehova ta ofrece yudansa spiritual pa proteha bo

Dios su proteccion. Proverbionan 18:10 (NW) ta bisa: “E nomber di Jehova ta un toren fuerte. E husto ta core drenta den dje y ta haya proteccion.” Ta claro cu esaki no ta nifica cu e nomber personal di Dios riba su mes ta un tipo di amuleto. Mas bien, esaki ta nifica cu hende cu tin un respet profundo pa e nomber ey por pidi Dios pa proteha nan ki ora cu nan tin mester di esey.

Un ehempel di Bijbel. Echonan 19:19 ta conta nos algo interesante cu algun habitante di Efeso cu a caba di bira cristian a haci. E versiculo ta bisa cu “un cantidad grandi di esnan cu tabata practica magia a trece nan bukinan hunto y a kima nan dilanti di tur hende. Y nan a calcula e balor di tur e bukinan y a yega na un total di 50.000 moneda di  plata.” * E cristiannan ey a destrui tur obheto cu tabatin di haber cu spiritismo, sin importa cuanto placa nan tabata costa. Awe nos por siña hopi for di nan ehempel. E mundo aki ta hopi envolvi cu spiritismo y cosnan oculto. Hasta obhetonan y practicanan spiritista cu por parce inocente por trece nos bou di influencia di demoño. Pesey, ta hopi importante pa tene e tipo di cosnan ey leu for di bo, cueste loke cueste.—Deuteronomio 18:10-12.

Pa 50 aña largo, Rogelio, menciona den e prome articulo di e serie aki, no tabata kere cu Diabel ta existi. Pero na dado momento su punto di bista a cambia. Dicon? Rogelio ta bisa: “Pa prome biaha den mi bida mi a haya un Bijbel den mi man. Loke mi a lesa den Bijbel a convence mi cu Diabel ta existi. E conocemento ey ta yuda mi proteha mi mes contra di su influencia.”

“Loke mi a lesa den Bijbel a convence mi cu Diabel ta existi. E conocemento ey ta yuda mi proteha mi mes contra di su influencia”

Abo lo kier mira e dia cu Satanas di berdad lo no existi mas? Bo por. Bijbel ta profetisa cu aki un poco tempo Diabel, kende ta gaña asina tanto hende, lo ser “benta den e lago di candela y suafel.” (Revelacion 20:10) Ta claro cu candela y suafel literal no por haci daño na un ser spiritual invisibel. Pues, e lago di candela mester ta algo simbolico: e ta representa destruccion eterno. Satanas lo disparce pa semper. Esaki si lo ta un tempo di alegria pa tur hende cu ta stima Dios.

Mientrastanto, sigui siña tur loke bo por tocante Jehova y su manera di pensa. * Si bo haci esey, lo bo mira e dia cu di berdad nos por bisa: “Satanas no ta existi!”

^ par. 8 Si e moneda di plata tabata un denario Romano, un trahador lo tabatin cu traha 50.000 dia pa gana e suma ey. Esey si lo tabata un suma astronomico.

^ par. 11 Pa mas informacion tocante Satanas y Dios su punto di bista di spiritismo, wak capitulo 10 di e buki Kico Bijbel Ta Siña Realmente? Bo por pidi un testigo di Jehova un ehemplar di e buki aki.