Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2014

 IMITA NAN FE | JOZEF

‘Con Mi Por Haci e Maldad Grandi Aki?’

‘Con Mi Por Haci e Maldad Grandi Aki?’

JOZEF a sinti e brisa cayente y a hole e aroma di leli y otro mata di awa. E caravana di comerciante cu a bay cu Jozef tabata crusa e sabananan di e extenso boca di Riu Nilo. Purba di imagina con e fila di homber ey ta cana cu nan camelnan banda di awa rumbo pa un otro pueblito Egipcio, y cu de bes en cuando un garabet of un bubi ta spanta bula bay. Jozef a bolbe pensa riba su cas den e seronan di Hebron, cientos di kilometer leu. Awor e tabata den full un otro mundo.

Halto den e palonan di figo y dadel tabatin macaco ta grita y haci desordo. Pa Jozef, e idioma di e hendenan cu nan tabata pasa riba caminda lo mester tabata zona mesun straño den su horea. Kisas el a purba di capta algun palabra of frase pa e cuminsa siña nan idioma. Manera cos tabata bayendo, ta parce cu lo e no mira su cas nunca mas.

Jozef tabatin apenas 17 of 18 aña, pero ya caba el a enfrenta problemanan cu lo a intimida hopi hende grandi. Su propio rumannan tabata jaloers riba dje pasobra e tabata e yiu mas stima di su tata. Nan a plania pa mat’e, pero despues nan a dicidi di bend’e cu e comerciantenan aki. (Genesis 37:2, 5, 18-28) Despues di varios siman di biahe, e beis di e comerciantenan a cuminsa drecha pasobra porfin nan tabata yegando na e stad grandi caminda nan por a bende Jozef y tambe nan mercancianan valioso y saca hopi ganashi. Kico Jozef a haci pa no laga desesperacion y desanimacion podera di dje? Y con nos awe por evita cu problema- y obstaculonan ta caba cu nos fe? Nos por siña hopi for di e relato di Jozef.

‘JEHOVA TABATA CU JOZEF’

Bijbel ta conta: “Awor nan a hiba Jose [of, Jozef] Egipto, y Potifar, un oficial Egipcio di Farao, capitan di guardia, a cumpr’e cerca e Ismaelitanan, kendenan a hib’e ayanan.” (Genesis 39:1) Lo mester tabata un humiliacion pa Jozef cu nan a bolbe bend’e. Nan a trat’e manera cu ta mercancia e ta! Purba di imagina Jozef, canando tras di su doño nobo, un oficial Egipcio. Nan a pasa meymey di e stad cu su cayanan druk, yen di stand di mercancia, bayendo den direccion di Jozef su cas nobo.

Su cas nobo ta totalmente diferente for di e cas cu e tabata biba aden. El a lanta den un famia nomada cu tabata biba den tent y tabata muda di un luga pa otro mientras cu nan tabata cuida nan tounan di carne. Aki na Egipto, hendenan rico manera Potifar tabata biba den casnan elegante, geverf cu colornan bibo. Segun arkeologonan, e Egipcionan di antiguedad tabata gusta hardinnan berde bunita, cera cu muraya, cu palonan cu ta duna sombra y vijver pa cultiva leli, mata di papiro y otro matanan di awa. Algun di e casnan tabata completamente rondona pa hardin. Nan tabatin veranda caminda hende por a disfruta di e brisa suave, bentana halto pa ventilacion y hopi camber, entre nan un comedor grandi y camber pa e sirbientenan.

Tur e cosnan luhoso aki a impresiona Jozef? Probablemente cu no. Mas cu tur cos, kisas el a  sinti un soledad inmenso. E idioma, e manera di bisti y di cuida apariencia, y vooral e religion di e Egipcionan tabata straño p’e. Nan tabata adora un gran variedad di dios, practica spiritismo y magia, y tabata obsesiona cu morto y bida despues di morto. Pero tabatin un cos cu a yuda Jozef y a pone cu soledad no a caba cu ne. Kico esey tabata? Bijbel ta bisa: ‘Jehova tabata cu Jozef.’ (Genesis 39:2) Casi sigur Jozef a desahoga su mes na su Dios. Salmo 145:18 ta sigura nos cu Jehova “ta cerca di tur esnan cu ta sclama na dje.” Kico mas Jozef a haci pa hala cerca di su Dios?

Jozef no a laga tristeza podera di dje y tabata determina pa haci su trabou lo mihor cu e tabata por. Pues Jehova tabatin bon motibo pa bendicion’e, y no a dura mucho cu Jozef a bira un esclavo stima pa su doño nobo. Potifar por a mira cu Jehova, e Dios di Jozef su famia, tabata bendiciona su sirbiente hoben y e bendicionnan aki sin duda a trece mas prosperidad pa Potifar su cas. Cu tempo, Jozef a gana mas confianza di su doño, y el a laga tur loke e tabatin na encargo di e hoben capaz aki.—Genesis 39:3-6.

Jozef ta un excelente ehempel pa hobennan cu ta sirbi Dios awe. Tin biaha, na scol nan por sinti nan straño, comosifuera nan ta den un otro mundo, un mundo obsesiona cu spiritismo y cu no tin niun speransa pa futuro. Si bo ta sinti bo asina, corda cu Jehova no a cambia. (Santiago 1:17) Ainda e ta cerca di hobennan cu ta leal y cu ta traha duro pa agrad’e. E ta bendiciona nan ricamente y lo e bendiciona abo tambe.

Mientrastanto, añanan a pasa, y segun e relato Jozef a madura. El a bira un homber cu “bon tipo y bon apariencia.” E palabranan ey ta indica cu por tin peliger na caminda, ya cu hopi biaha personanan cu tin un apariencia atractivo ta hala atencion di hende cu mal intencion.

E casa di Potifar no por a kita su bista for di Jozef

JOZEF “NO TABATA SCUCH’E”

Na contraste cu e casa di Potifar, Jozef si tabata un persona leal. Bijbel ta bisa cu “e esposa di su shon tabata wak [Jozef] cu deseo y el a bisa: ‘Drumi cu mi.’” (Genesis 39:7) Acaso Jozef a sinti e tentacion pa acepta e proposicion inmoral di e muher pagano aki? Wel, Bijbel no ta duna nos ningun motibo pa kere cu Jozef no tabata sinti e deseonan normal di hubentud. Tampoco Bijbel no ta bisa cu e muher aki tabata mahos. Jozef lo por a pensa cu su doño nunca lo no haya sa? Ademas, un relacion cu e casa di un oficial rico y poderoso lo por a dun’e beneficionan material. Acaso esey a tent’e pa acepta e proposicion di e muher aki?

 En realidad, nos no sa kico a pasa den Jozef su cabes. Pero, loke si nos sa ta loke tabatin den su curason. Esaki nos por mira claramente na loke el a contesta e muher: “Mira, cu mi akinan mi shon no ta preocup’e cu nada den cas, y el a pone tur loke cu e tin na mi encargo. No tin ningun hende mas halto den e cas aki cu ami, y e no a nenga mi nada sino abo so, pasobra abo ta su esposa. Con anto mi por haci e maldad grandi aki y peca contra Dios?” (Genesis 39:8, 9) Nos por imagina cu Jozef a papia e palabranan ey cla y raspa. Djis pensa so riba loke e muher aki tabata kier pa e haci a molestia su consenshi. Dicon?

Manera Jozef mes a bisa, su doño tabata confi’e. Potifar a laga tur cos di su cas den man di Jozef, cu excepcion di su casa. Con Jozef por a traiciona su confianza asina? E tabata odia e idea ey. Pero tabatin algo cu a molesti’e mas ainda: e idea di peca contra su Dios, Jehova. Jozef a siña for di su mayornan kico Dios ta pensa di matrimonio y lealtad. Jehova mes a institui e prome matrimonio y a bisa bon cla kico e ta exigi di parehanan casa. Nan mester a keda hunto y bira “un carni.” (Genesis 2:24) Hende cu a purba di kibra e union ey a core e riesgo di lanta e rabia di Dios. Por ehempel, e hombernan cu por poco a drumi cu e casa di Isaak y cu e casa di Abraham, Jozef su wela y su bisawela, a hera haya nan mes den hopi problema. (Genesis 20:1-3; 26:7-11) Jozef a compronde e principio tras di e sucesonan ey y tabata determina pa biba di acuerdo cu ne.

E casa di Potifar no a gusta niun tiki loke el a tende. Djis imagina con e catibo aki a nenga su proposicion y hasta a bisa cu esey ta un “maldad grandi”! A pesar di esey, e muher a sigui insisti. Kisas el a sintie ofendi y esey a haci cu el a bira mas dicidido ainda pa haya loke e tabata kier. Esey ta e mesun actitud cu Satanas tabatin. E tambe a faya ora el a purba di laga Hesus cay den tentacion, y en bes di laga e asunto para, Satanas a djis warda pa “un otro momento oportuno.” (Lucas 4:13) Pues, hende fiel mester ta determina pa keda firme, mescos cu Jozef. Aunke e situacion a sigui “dia tras dia”, Jozef no a entrega. Bijbel ta bisa cu Jozef “no tabata scuch’e pa drumi cu ne.” (Genesis 39:10) Pero Potifar su casa tabata determina pa seducie.

El a scoge un momento cu niun di e sirbientenan no tabata na cas. E tabata sa cu Jozef mester bin paden pa haci su trabounan. Ora el a drenta, e casa di Potifar a haya su chens. El a coy Jozef su paña tene y a rog’e un biaha mas: “Drumi cu mi!” Jozef a reacciona mesora. El a purba di kita bay, pero e muher tabatin su paña duro teni. Jozef a ranca su mes for di su garanan y a core bay pafo. E muher a keda cu e paña den su man.—Genesis 39:11, 12.

Esaki ta laga nos corda riba e conseho inspira cu apostel Pablo a duna: “Huy di fornicacion.” (1 Corintionan 6:18) Esta un bon ehempel Jozef a pone pa tur cristian berdadero. Tin biaha, den bida nos por haya nos obliga pa trata cu hende cu no ta worry cu e leynan moral di Dios. Pero esey no kiermen cu nos tin cu entrega na mal influencia. Nos tin cu huy di esey, cueste loke cueste.

Den caso di Jozef, su determinacion a cost’e hopi. E casa di Potifar tabata kier venganza. Mesora el a cuminsa grita y pone e otro sirbientenan core bin wak kico a pasa. El a bisa nan cu Jozef a purba di viol’e y despues a core bay ora cu el a grita. E muher a keda cu e paña di Jozef como prueba y a warda su casa yega cas. Ora Potifar a yega, e muher a ripiti e mesun mentira y riba dje a bisa Potifar cu tabata su fout pasobra ta e a trece e stranhero ey den nan cas. Con Potifar a reacciona? Nos ta lesa: “Su rabia a lanta”! Y el a coy Jozef ser’e den prizon.—Genesis 39:13-20.

NAN A BOEI SU PIANAN

Nos no sa mucho con cos tabata bay den e prizonnan na Egipto den e temponan ey. Arkeologonan a haya diferente ruina, y nos sa cu e prizonnan tabata un tipo di forti y cu nan tabatin cel y cachotnan bou di tera. Jozef a describi e luga cu e palabra “prizon”, cu literalmente tabata nifica buraco, loke ta laga nos pensa riba un luga scur cu ta haci bo deprimi. (Genesis 40:15) De echo, e buki di Salmo ta bisa cu Jozef a sufri mas maltrato. Nos ta lesa: “Nan a lastima su pianan cu boei, y su nek nan a cera den hero.” (Salmo 105:17, 18)  Tin biaha e Egipcionan tabata mara e elleboognan di e presonan tras di nan lomba, y otro presonan nan tabata mara cu un banchi di hero na nan garganta. Pober Jozef mester a sufri asina tanto sin cu el a haci nada pa merece e castigonan ey.

E cos pio ta cu esaki no tabata djis un contratiempo temporal. E relato ta sigui bisa cu Jozef a keda “ayanan den prizon.” Pues, el a pasa hopi aña den e luga horibel ey! * Y Jozef no tabata sa si algun dia lo e haya su libertad. Segun cu e dianan a para bira simannan, y despues lunanan, kico a yud’e cu e no a bira desespera y perde speransa?

E relato ta duna nos e contesta alentador aki: ‘Jehova tabata cu Jozef y a mustr’e misericordia.’ (Genesis 39:21) Ningun muraya di prizon, ni boei, ni cachot scur por a stroba Jehova di demostra su amor leal na su sirbidornan. (Romanonan 8:38, 39) Nos por imagina con Jozef a desahoga su curason na su Tata celestial stima y cont’e tur su angustia den oracion, y con despues el a sinti e paz y trankilidad cu e “Dios di tur consuelo” so por duna. (2 Corintionan 1:3, 4; Filipensenan 4:6, 7) Kico mas Jehova a haci pa Jozef? Bijbel ta bisa cu el a yuda Jozef gana confianza di e hefe di prizon.

Aparentemente, e presonan tabata haya trabou pa haci, y Jozef a haci su best. Un biaha mas Jehova tabatin motibo pa bendiciona Jozef. El a traha duro pa cumpli cu tur trabou cu nan a dun’e y a laga e resto di e asunto den man di Jehova. Cu Jehova su bendicion, Jozef a logra gana e respet y confianza di e hefe di prizon, mescos cu ora e tabata traha na cas di Potifar. Bijbel ta bisa: “E hefe di prizon a pone tur e presonan cu tabata den prizon bou di encargo di [Jozef], asina cu e tabata responsabel pa tur loke tabata pasa ayanan. E hefe di prizon no tabata atende cu nada cu tabata bou di encargo di [Jozef], pasobra SEÑOR tabata cu ne; y kico cu e tabata haci, SEÑOR tabata haci prospera.” (Genesis 39:22, 23) Esta un consuelo Jozef mester a sinti ora e tabata mira cu Jehova tabata percura p’e!

Jozef a traha duro den prizon, y Jehova a bendicion’e

Nos por topa situacionnan dificil den bida, kisas hasta algun inhusticia cruel, pero nos por siña for di e fe di Jozef. Jehova lo bendiciona nos si nos acudi regularmente na dje den oracion, keda fiel na su mandamentonan y traha duro pa haci loke ta bon den su bista. Den e caso di Jozef, Jehova tabatin hasta mas bendicion p’e na caminda, manera nos lo mira den e siguiente articulonan di e serie aki.

^ par. 23 Bijbel ta indica cu Jozef tabatin mas o menos 17 pa 18 aña di edad ora el a bay traha na Potifar su cas y a keda eynan suficiente tempo, kisas algun aña, te cu el a bira un adulto. E tabatin 30 aña di edad ora cu el a sali for di prizon.—Genesis 37:2; 39:6; 41:46.