Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  October 2014

 TOPICO PRINCIPAL | KICO E REINO DI DIOS POR HACI PA BO?

Dicon e Reino di Dios Ta Importante pa Hesus?

Dicon e Reino di Dios Ta Importante pa Hesus?

Durante Hesus su sirbishi riba Tera, el a papia tocante varios topico. Por ehempel, el a siña su siguidornan con pa haci oracion, con pa agrada Dios y con pa haya berdadero felicidad. (Mateo 6:5-13; Marco 12:17; Lucas 11:28) Pero e topico cu mas Hesus a gusta papia riba dje y cu mas el a papia di dje tabata e Reino di Dios.Lucas 6:45.

Manera e articulo anterior a mustra, Hesus su bida tabata draai rond di su meta pa ‘predica y anuncia e bon noticia di e Reino di Dios.’ (Lucas 8:1) El a haci hopi esfuerso pa cana cientos di kilometer den henter Israel pa predica tocante e Reino di Dios. Hesus su sirbishi a keda registra den e cuater Evangelionan, cu ta haci referencia na e Reino mas cu 100 biaha. Mayoria di e referencianan aki ta palabranan cu Hesus mes a papia y toch nan ta djis un parti chikito di tur loke el a bisa tocante e Reino di Dios.—Juan 21:25.

Dicon Hesus tabatin asina tanto interes den e Reino tempo e tabata riba Tera? Pa cuminsa, Hesus tabata sa cu Dios a scoge pa e bira gobernante di e Reino ey. (Isaias 9:6; Lucas 22:28-30) Pero Hesus no tabata busca poder of gloria pa su mes. (Mateo 11:29; Marco 10:17, 18) E no a promove e Reino pa motibonan egoista. Hesus tabata y te ainda ta interesa principalmente den e Reino di Dios * pa motibo di tur e cosnan bon cu e Reino lo haci pa esnan cu e ta stima, esta, su Tata celestial y su fiel siguidornan.

LOKE E REINO LO HACI PA HESUS SU TATA

Hesus tin un cariño profundo pa su Tata celestial. (Proverbionan 8:30; Juan 14:31) E ta admira e cualidadnan bunita di su Tata, manera Su amor, Su compasion y Su husticia. (Deuteronomio 32:4; Isaias 49:15; 1 Juan 4:8) Pesey, Hesus ta odia tur e mentiranan cu ta ser plama tocante su Tata, entre otro, cu Dios no ta interesa den e sufrimento di hende y cu ta e mes kier pa nos sufri. Esaki ta un di e motibonan pakico Hesus tabata ansioso pa predica “e bon noticia di Reino.” E tabata sa cu pronto e Reino lo limpia e nomber di su Tata. (Mateo 4:23; 6:9, 10) Con e lo haci esey?

Mediante e Reino, Jehova lo haci cambionan drastico cu lo beneficia e famia humano. “Lo e seca tur lagrima” for di wowo di hende fiel. Jehova lo elimina e causa di e lagrimanan ey y asina haci sigur cu “lo no tin morto mas, ni tristeza, ni sclamacion, ni dolor.” (Revelacion 21:3, 4) Pa medio di e Reino, Dios lo caba cu tur sufrimento di hende. *

 No ta nada straño anto cu Hesus tabata asina ansioso pa conta hende tocante e Reino. E tabata sa cu e Reino lo demostra con poderoso y compasivo su Tata realmente ta. (Santiago 5:11) Hesus tabata sa tambe cu e Reino lo beneficia otro personanan cu e stima, esta, hende obediente.

LOKE E REINO LO HACI PA HENDE OBEDIENTE

Hopi tempo prome cu Hesus a bin riba Tera, e tabata biba den cielo hunto cu su Tata. E Tata a uza e Yiu pa crea tur cos; for di e strea- y galaxianan incontabel y increiblemente asombroso hunto cu nos bunita planeta Tera y su naturaleza. (Colosensenan 1:15, 16) Di tur esakinan, Hesus a bisa cu su “delicia tabata den” humanidad.—Proverbionan 8:31.

Loke a resalta den Hesus su sirbishi tabata su amor pa hende. For di principio, el a bisa bon cla cu el a bin riba Tera pa “declara bon noticia” na tur esnan den necesidad. (Lucas 4:18) Pero Hesus a haci mas cu djis papia tocante yuda hende. Bes tras bes el a mustra cu e ta stima hende. Por ehempel, ora cu un grupo grandi di hende a bin hunto pa scuch’e, el “a haya duele di nan y a cura nan hendenan malo.” (Mateo 14:14) Na un otro ocasion, ora un homber cu tabata sufri di un enfermedad doloroso a bisa cu e tabatin fe cu Hesus lo por a cur’e basta e tabata kier, Hesus a sinti compasion p’e. Motiva pa su amor pa e homber, el a cur’e, bisando: “Mi kier. Sea cura.” (Lucas 5:12, 13) Ora Hesus a mira cu Maria tabata yora e morto di su ruman homber, Lazaro, Hesus “a suspira profundamente”, “a keda masha conmovi” y “awa tabata basha for di Hesus su wowo.” (Juan 11:32-36) Anto e ora ey el a haci algo cu niun hende no por a kere. Hesus a resucita Lazaro aunke e tabatin cuater dia morto caba.—Juan 11:38-44.

Claro cu Hesus tabata sa cu e alivio cu el a duna nan tabata temporal. El a realisa cu tardi of trempan tur hende cu el a cura lo a bira malo atrobe y cu tur esnan cu el a resucita lo a bolbe muri. Sinembargo, Hesus tabata sa tambe cu e Reino di Dios lo trece un solucion permanente pa e problemanan ey. Pesey Hesus no a djis haci milager so, sino tabata anuncia “e bon noticia di Reino” cu entusiasmo. (Mateo 9:35) Su milagernan tabata un muestra chikito di loke e Reino di Dios lo haci pronto na un escala mundial. Laga nos wak kico Bijbel ta priminti pa e tempo ey.

  •  Lo no tin problema di salud mas.

    “E ora ey wowo di e ciegonan lo mira, y horea di e sordonan lo tende. Anto e cohonan lo bula manera bina, y lenga di e mudo lo grita di alegria.” Ademas, “ningun habitante lo no bisa: ‘Mi ta malo.’”—Isaias 33:24; 35:5, 6.

  • Lo no tin morto mas.

    “E hustonan lo hereda e Tera, y lo biba den dje pa semper.”—Salmo 37:29.

    “E lo traga morto pa semper, y SEÑOR Dios lo seca awa di wowo for di tur cara.”—Isaias 25:8.

  • E mortonan lo bolbe biba.

    “Tur esnan cu ta den graf lo tende su stem y lo sali afo.”—Juan 5:28, 29.

    “Lo bay tin un resureccion.”—Echonan 24:15.

  • Tur hende lo tin un luga di biba y lo no tin desempleo mas.

    “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come ... [Nan] lo disfruta di e obra di nan mannan pa hopi tempo.”—Isaias 65:21, 22.

  •  Lo no tin guera mas.

    “E ta haci gueranan stop te na e fin di Tera.”—Salmo 46:9.

    “Nacion lo no lanta spada contra nacion, y nunca mas nan lo train pa guera.”—Isaias 2:4.

  • Lo tin suficiente cuminda pa tur hende.

    “Tera a duna su fruta; Dios, nos Dios, ta bendiciona nos.”—Salmo 67:6.

    “Lo tin abundancia di maishi den e Tera, riba cabes di e seronan.”—Salmo 72:16.

  • Lo no tin pobreza mas.

    “Esun den necesidad lo no keda lubida pa semper.”—Salmo 9:18.

    “E lo libra esun den necesidad ora cu e sclama pa yudansa, esun afligi tambe y esun cu no tin ningun hende pa yud’e. E lo tin compasion di e pober y di esun den necesidad, y e lo salba bida di esnan den necesidad.”—Salmo 72:12, 13.

Ora bo pensa riba e promesanan aki tocante e Reino di Dios, bo por compronde dicon e Reino ta asina importante pa Hesus? Tempo e tabata riba Tera, e tabata ansioso pa papia tocante e Reino di Dios cu ken cu tabata dispuesto pa scuch’e pasobra e tabata sa cu e Reino lo bay caba cu tur e problemanan cu ta afligi hende awe.

E promesanan di Bijbel ta atrae bo? Si ta asina, con bo por siña mas tocante e Reino? Y kico abo mes por haci pa ta sigur cu bo tambe lo por beneficia di tur su bendicionnan? E ultimo articulo di e serie aki lo contesta e preguntanan aki.

^ par. 5 E articulo aki ta referi na Hesus su sintimentonan di tanto den pasado como den presente pasobra Hesus ta bibo den cielo aworaki y for di dia cu el a bay cielo bek, sin duda e Reino a keda algo sumamente importante p’e.—Lucas 24:51.

^ par. 8 Pa informacion tocante dicon Dios ta permiti hende sufri pa un tempo, wak capitulo 11 di e buki Kico Bijbel Ta Siña Realmente? publica pa testigonan di Jehova.