Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  September 2014

 TOPICO PRINCIPAL

Hende Lo Caba cu Nos Planeta?

Hende Lo Caba cu Nos Planeta?

“Un generacion ta bay y un generacion ta bin, ma Tera ta permanece pa semper.”—REY SALOMON DI SIGLO 11 PROME CU CRISTO. *

E palabranan aki ta mustra cu bida di hende ta hopi cortico na comparacion cu e existencia eterno di nos planeta. Pa miles di aña, hopi generacion a pasa bay; toch nos planeta Tera a duna prueba di ta resistente y capaz pa sostene bida. Pero pa cuanto tempo mas esaki por sigui?

Despues di Segundo Guera Mundial, mundo a experencia cambionan drastico y rapido. Den apenas 70 aña, hende a mira desaroyonan remarcabel riba tereno di comunicacion, transporte y tecnologia cu a trece cambionan economico hamas bisto. Aworaki, hopi hende ta disfruta di un nivel di bida cu antes nan no por a ni imagina. Durante e 70 añanan ey, e cantidad di habitante di mundo a bira casi tres biaha mas tanto.

Pero tur esaki tin su consecuencianan. Algun cientifico ta bisa cu e dañonan cu actividadnan humano ta causa na Tera ta pone cu pronto e ciclonan di naturaleza lo cuminsa faya y lo no por sostene bida mas. Ademas, segun nan, nos a drenta un era nobo cu nan ta yama antropoceno, debi na e impacto enorme cu actividad humano tin riba nos planeta.

Bijbel a papia di un tempo cu hende lo “caba cu e Tera.” (Revelacion 11:18) Tin hende ta puntra nan mes si ta den e tempo ey nos ta bibando. Cuanto daño mas hende lo causa? Di berdad no tin solucion mas? Hende lo causa daño ireparabel na nos planeta?

 DI BERDAD NO TIN SOLUCION MAS?

E daño na nos planeta ta ireparabel? Algun cientifico ta pensa cu ta dificil pa pronostica ki efecto cambio di clima lo por tin riba nos planeta. Pa e motibo ey nan ta teme cu nos lo por haya nos cu cambionan diripiente y inespera cu lo por trece consecuencianan desastroso.

Por ehempel, pensa riba e capa di ijs na West Antartica. Algun hende ta pensa cu si temperatura di Tera su atmosfera y lama sigui subi, lo yega e momento cu lo no tin nada cu por stroba e capa di ijs ey di smelt. Dicon? Esey ta pasobra e capa di ijs ta refleha e rayonan di solo hopi mas mihor cu e awa di lama. Pero segun cu e capa di ijs ta bira mas fini y mas chikito, e lama bou di dje ta keda exponi na e rayonan di solo. Como cu e superficie scur di lama ta absorba mas calor di solo, e capa di ijs ta smelt mas lihe. Esaki por crea un circulo vicioso. Pa motibo cu e ijs ta smelt, e nivel di lama lo subi y esaki lo por tin consecuencianan desastroso pa miyones y miyones di hende.

NOS “DEBE” ECOLOGICO TA SIGUI AUMENTA

Hende a pensa riba varios strategia pa trata cu e situacion di emergencia cu nos planeta ta aden. Un strategia cu tin hopi tempo caba riba mesa ta e asina yama desaroyo sostenibel, esta, un plan cu ta promove crecemento economico y social sin haci daño na medioambiente. El a duna resultado?

Lamentablemente, mescos cu e crisis financiero mundial, e “debe” ecologico ta sigui aumenta. Hende ta sigui uza e recursonan natural mas lihe cu Tera mes por produci nan bek. Tin algo cu nos por haci? Un ecologo a admiti francamente cu “den un sentido, nos no tin niun idea con pa cuida nos planeta.” E situacion aki ta cuadra precies cu loke Bijbel ta bisa: “No ta keda na hende pa dirigi su pasonan.”—Jeremias 10:23.

Di otro banda, Bijbel ta sigura nos cu nos Creador lo no permiti hende caba cu tur e recursonan di nos planeta y lag’e plan bari. Salmo 115:16 ta bisa nos cu Dios ‘a duna e yiunan di hende e Tera.’ Si, nos planeta ta un “regalo perfecto” di nos Tata celestial. (Santiago 1:17) Acaso e ta duna nos un  regalo cu ta sirbi pa un tempo so, cu ta daña y despues ta stop di traha? Claro cu no. Esaki ta bisto na e manera cu Dios a diseña nos planeta.

PROPOSITO DI E CREADOR

E buki biblico di Genesis ta conta en detaye con Dios a traha nos planeta cuidadosamente. Na principio Tera tabata “sin forma y bashi y tabatin scuridad riba superficie.” Pero tambe e ta menciona “awanan”, cu ta esencial pa por tin bida riba Tera. (Genesis 1:2) Anto Dios a bisa: “Laga tin luz.” (Genesis 1:3) Aparentemente, e rayonan di solo a drenta atmosfera di nos planeta y luz a bira visibel pa prome biaha riba Tera. Bijbel ta describi despues con tera seco y lama a ser forma. (Genesis 1:9, 10) Despues di esey “vegetacion, mata cu ta duna simia segun su sorto, y palo cu ta duna fruta” a aparece. (Genesis 1:12) Pues asina tur e elementonan necesario pa sostene e proceso- y ciclonan di bida, manera fotosintesis, tabata presente. Cu ki proposito nos Creador a haci tur e preparacionnan aki?

Isaias, un profeta di antiguedad, a describi Dios como Esun “kende a forma Tera y a trah’e; el a establec’e, y no a crea esaki pa e keda bashi, ma el a form’e pa e wordo habita.” (Isaias 45:18) Ta bisto anto, cu e Creador su proposito ta pa Tera ser habita pa semper.

Lastimamente hende a haci mal uzo di Dios su regalo precioso y casi ta cabando cu ne. Pero e Creador su proposito no a cambia. Un homber di antiguedad a bisa: “Dios no ta hende, cu e lo gaña, ni yiu di hende, cu e lo arepenti. Acaso el a bisa, y e lo no hacie? Of el a papia, y e lo no cumpli?” (Numbernan 23:19) Dios no ta bay laga hende ruina e Tera aki. Mas bien, e dia pa Dios “caba cu esnan cu ta caba cu e Tera” lo yega pronto.—Revelacion 11:18.

TERA LO TA NOS HOGAR PA SEMPER

Den su famoso Sermon Riba Sero, Hesus a bisa: “Feliz ta esnan cu tin un genio suave, ya cu nan lo haya e Tera.” (Mateo 5:5) Mas despues den e mesun sermon ey, Hesus a revela con e Tera lo ser rescata di ruina. El a siña su siguidornan pa pidi den oracion: “Laga bo Reino bin. Laga  bo boluntad sosode, mescos cu den cielo, tambe riba Tera.” Si, e Reino of gobierno di Dios lo cumpli cu e proposito di Dios pa Tera.—Mateo 6:10.

Tocante e cambionan remarcabel cu e Reino ey lo trece, Dios ta declara: “Tende! Mi ta traha tur cos nobo.” (Revelacion 21:5) Esaki ta nifica cu Dios lo reemplasa nos planeta cu un nobo? No, no ta nos planeta ta e problema, mas bien ta e gobiernonan humano ‘cu ta cabando cu e Tera aki’ y esnan cu ta responsabel pa e crisis ecologico. Bijbel ta bisa cu Dios lo caba cu nan y lo e reemplasa nan cu “un cielo nobo”, es decir, un gobierno celestial nobo, e Reino di Dios, cu lo goberna riba “un tera nobo”, esta humanidad obediente na Dios.—Revelacion 21:1.

Pa elimina e “debe” cu hende tin cu e planeta aki Dios lo restaura e recursonan natural di e Tera pa asina pone e ciclonan di naturaleza bek den balansa. Bou di inspiracion, e salmista a duna un descripcion di loke Dios lo haci: “Bo a kuida tera i a muh’é, B’a hasié riku.” Unabes e clima bira normal bek, y mas importante ainda cu Dios su bendicion, Tera lo bira un paradijs cu lo produci cuminda na abundancia.—Salmo 65:9-13BPK.

Segun Pyarelal, secretario di e difunto guia spiritual di India Mohandas Gandhi, a yega di bisa: “Tera ta produci suficiente pa satisface cada hende su necesidadnan, pero no su ambicionnan.” E Reino di Dios lo yega na raiz di e problemanan di nos planeta. Con asina? Door di cambia curason di hende. Profeta Isaias a bisa cu bou di e gobernacion di e Reino hende “lo no causa daño ni destruccion” na otronan ni na e planeta aki. (Isaias 11:9) De echo, awendia miyones di hende di tur nivel di bida ya caba ta siñando tocante Dios su normanan eleva. Nan ta siña stima Dios y nan prohimo, pa ta agradecido, pa cuida nos medioambiente, pa conserva recursonan natural y pa biba na harmonia cu Dios su proposito pa nos planeta. Esaki ta prepara nan pa biba den un paradijs riba Tera.—Eclesiastes 12:13; Mateo 22:37-39; Colosensenan 3:15.

Nos planeta ta mucho precioso pa Dios laga hende ruin’e

E relato di creacion den Genesis ta caba bisando: “Dios a mira tur loke el a traha, y ata, tur cos tabata masha bon.” (Genesis 1:31) Sin duda, nos planeta ta mucho precioso pa e caba na ruina. Pesey, ta un consuelo pa sa cu e futuro di nos planeta ta den man di Jehova Dios, nos Creador bondadoso. E ta priminti nos: “E hustonan lo hereda e Tera, y lo biba den dje pa semper.” (Salmo 37:29) Bo tambe por ta entre “e hustonan” cu lo yama Tera nan hogar.

^ par. 3 Saca for di Eclesiastes 1:4.