Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  August 2014

 NOS LECTORNAN TA PUNTRA ...

Ken A Traha Dios?

Ken A Traha Dios?

Imagina un tata ta papia cu su yiu homber di shete aña. E tata ta bis’e: “Hopi tempo pasa, Dios a traha Tera y tur cos cu tin riba dje. Tambe el a traha luna, solo y e streanan.” E yiu ta pensa un rato riba esaki y despues e ta puntra su tata: “Papi, anto ta ken a traha Dios?”

E tata ta contest’e: “Niun hende no a traha Dios. Semper el a existi.” E contesta simpel ey ta suficiente pa e yiu na e momento ey. Sinembargo, segun cu e yiu ta crece, e pregunta ey ta bolbe lanta su curiosidad. E ta haya e concepto cu semper Dios a existi dificil pa compronde pasobra hasta universo tin un comienso. E ta puntra su mes: ‘Di unda Dios a bin anto?’

Kico Bijbel ta bisa? Basicamente, loke e ta bisa ta mescos cu loke e tata den nos ehempel menciona ariba a bisa. Moises a skirbi: “SEÑOR, ... prome cu e seronan a nace, y cu bo a forma Tera y mundo, si, for di eternidad te na eternidad, abo ta Dios.” (Salmo 90:1, 2) Asina tambe profeta Isaias a declara: “Bo no sa? Bo no a tende? E Dios Eterno, e SEÑOR, [ta] e Creador di e finnan di Tera!” (Isaias 40:28) E carta di Judas tambe ta referi na Dios como esun cu ta existi ‘pa tur eternidad.’Judas 25.

E textonan ey ta mustra cu Dios ta “e Rey di eternidad”, manera apostel Pablo a yam’e. (1 Timoteo 1:17) Esaki ta nifica cu maske con leu nos wak bek, semper Dios a existi y lo sigui existi den futuro. (Revelacion 1:8) Cu otro palabra, e no tin principio ni fin; esey ta un di su caracteristicanan personal.

Dicon nos ta haya e idea aki dificil pa compronde? Debi cu nos bida ta asina cortico, nos concepto di tempo ta totalmente diferente for di esun di Jehova. Como cu Dios ta eterno, 1.000 aña ta manera un dia p’e. (2 Pedro 3:8) Laga nos ilustr’e asina aki: Un tiracochi adulto cu ta biba apenas un 50 dia asina por compronde nos bida di 70 of 80 aña? Claro cu no! Pero Bijbel ta splica cu na comparacion cu nos Gran Creador, nos ta manera tiracochi. Hasta nos capacidad di compronde cosnan ta casi nada na comparacion cu esun di dje. (Isaias 40:22; 55:8, 9) No ta nada straño anto cu tin cierto aspectonan di Jehova cu mente humano no por compronde.

Aunke e concepto di un Dios eterno por ta dificil pa compronde, nos por mira su logica si. Si un otro persona lo a crea Dios, e ora ey e otro persona ey lo tabata e Creador. Sinembargo, manera Bijbel ta splica, Jehova ta esun cu “a crea tur cos.” (Revelacion 4:11) Ademas, nos sa cu no ta semper universo a existi. (Genesis 1:1, 2) Di unda el a bin? Esun cu a cre’e mester a existi prome cu ne. E Creador tabata existi tambe prome cu tur ser inteligente, entre otro su prome Yiu y e angelnan. (Job 38:4, 7; Colosensenan 1:15) Ta claro anto cu Dios tabata existi su so prome. E no por a ser crea pasobra no tabatin nada prome cu ne cu por a cre’e.

Nos mes existencia y esun di henter universo ta duna prueba cu ta existi un Dios eterno. Esun cu a pone nos inmenso universo den movecion y Esun cu a establece leynan cu ta control’e, mester tabata existi semper. Ta e so por a duna tur otro criatura e rosea di bida.Job 33:4.

Mas Informacion

Kico Bijbel Ta Siña Realmente?

Kico Ta e Berdad Tocante Dios?

Bo ta kere cu Dios ta interesa den bo? Siña mas tocante su personalidad y con pa hala cerca dje.

Hala Serca Yehova

“Señor Ta . . . Grandi den Poder”

Acaso e poder cu Dios tin mester pone nos haya miedo di dje? Si y no.