Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  August 2014

 IMITA NAN FE | JOZEF

“Por Fabor, Scucha e Soño Aki”

“Por Fabor, Scucha e Soño Aki”

JOZEF a keda mira yen di anhelo den direccion oost, cu gana di huy for di e caravana pa e bay cas bek. Su cas na Hebron no tabata keda mucho leu for di e seronan. Na e momentonan ey, su tata Jacob lo tabata preparando pa bay drumi sin sa kico a sosode cu su yiu stima. Pero no tabatin manera di haci; Jozef a pensa cu nunca mas lo e mira e cara di su tata stima. E comerciantenan tabata vigil’e mientras cu nan tabata guia nan camelnan riba e camindanan mas druk bayendo direccion zuid. Awor cu nan tabata doño di Jozef, nan no kier a kita bista for di dje. Pa nan, e hoben aki tabata manera un carga di gran balor di balsamo y azeta perfuma, mercancia cu por a duna nan hopi ganashi leu aya na Egipto.

Jozef lo tabatin rond di 17 aña di edad. Imagina bo con Jozef tabata wak cu hopi dificultad den direccion west, segun cu solo tabata baha na horizonte di Lama Grandi. Ainda e no por a compronde con henter su mundo por a cay den otro asina. Tabata duro pa Jozef kere con su mes ruman hombernan a hera mat’e y despues a bend’e como catibo. Lo mester tabata dificil pa e contene su lagrimanan. E no por a imagina su mes kico tabata ward’e.

Jozef a perde su libertad pero no su fe

Con bin Jozef a hay’e den un situacion horibel asina? Kico nos por siña for di e fe di e hoben aki cu a sufri maltrato y rechaso di parti di su mes miembronan di famia?

UN FAMIA COMPLICA

Jozef a lanta den un famia grandi, pero nan no tabata uni ni feliz. Bijbel ta laga nos mira bon cla e efectonan negativo cu poligamia tabatin riba Jacob su bida di famia. Poligamia ta un custumber cu raiz profundo cu Dios a tolera pa un tempo den su pueblo te ora cu Hesus a restaura Jehova su principio original di monogamia, esta, cu un homber por tin un esposa so. (Mateo 19:4-6) Jacob tabatin por lo menos 14 yiu cu cuater diferente hende muher: su dos esposanan Lea y Raquel, y nan crianan Bilha y Zilpa. For di comienso Jacob tabata gusta e mucha muher bunita Raquel. Nunca e no tabata sinti mucho cos pa Lea, e ruman muher grandi di Raquel, cu kende el a ser engaña pa casa cu ne. Tabatin un rivalidad amargo entre e dos ruman muhernan aki. E envidia aki a afecta e yiunan y nan tambe a cuminsa envidia otro.—Genesis 29:16-35; 30:1, 8, 19, 20; 37:35.

 Pa hopi tempo Raquel no por a haya yiu, y ora cu finalmente el a duna luz na Jozef, Jacob a duna e yiu aki cu el a haya den su biehes un trato special. Por ehempel, ora e famia tabata riba caminda pa un encuentro peligroso cu Esau, e ruman di Jacob kende un tempo kier a mat’e, Jacob a haci sigur cu Raquel y nan yiu homber chikito Jozef a haya e luga di mas safe te patras di e grupo. E dia tenso ey lo mester a haci un impacto grandi riba Jozef. Imagina bo con Jozef lo mester a sintie e mainta ey. E lo mester a puntra su mes con bin su tata, un homber di edad pero ainda yen di energia, tabata cococha. E mester a keda sorprendi di tende cu esaki a pasa pasobra su tata a bringa cu un angel poderoso henter anochi. Dicon? Pasobra Jacob tabata kier un bendicion di Jehova. Como recompensa, Jehova a cambia su nomber y a yam’e Israel. Henter un nacion lo a carga su nomber! (Genesis 32:22-31) Cu tempo, Jozef a siña cu e yiunan di Israel lo mester a bira tata di e tribunan di e nacion ey.

Despues, Jozef a experencia un golpi di bida ora cu e persona mas keri di dje a bay sosega. Su mama a fayece ora cu e tabata dunando luz na su ruman mas chikito, Benjamin. Su tata a sufri hopi pa motibo di e perdida aki. Imagina con Jacob tabata seca Jozef su lagrimanan y consol’e cu e mesun speransa cu a consola Abraham, welo di Jacob. Jozef lo mester a keda sumamente conmovi ora cu el a siña cu un dia su mama lo lanta for di morto. Kisas pesey Jozef a haya un amor hasta mas grandi pa e “Dios ... di e bibonan.” (Lucas 20:38; Hebreonan 11:17-19) Despues cu Jacob a perde su esposa, semper el a keda cu un cariño special pa e dos yiunan cu el a haya cu Raquel.Genesis 35:18-20; 37:3; 44:27-29.

Hopi mucha lo a bira malcria cu un trato special asina, pero Jozef no. El a siña hopi di e bunita cualidadnan di su mayornan y a desaroya un fe fuerte. Ademas, el a echt siña distingui loke ta bon y loke ta malo. Tempo cu e tabatin 17 aña, e tabata cuida carne y tabata yuda su ruman hombernan mas grandi. Den e temporada ey el a cuminsa ripara cu nan tabata haci malo. Kisas el a sinti cu e mester a keda keto djis pa e keda bon cu su rumannan? En todo caso, el a haci loke ta corecto. El a informa su tata di e asunto. (Genesis 37:2) Kisas e acto ey a confirma dicon Jacob tabatin un bon impresion di Jozef. Esta un bon ehempel pa hobennan cristian pensa ariba! Si bo sinti bo tenta pa tapa pica di un otro hende, sea di bo ruman of di un amigo, lo ta sabi pa bo imita Jozef y haci sigur cu esaki ta yega na horea di esnan cu por yuda e persona cu a haci malo.—Levitico 5:1.

Tambe nos por siña un les for di e bida di famia di Jozef. Aunke awe cristiannan no ta practica poligamia, loke si tin ta hopi famia di crianza cu tin entre otro mayor-, yiu- y rumannan di crianza.  Loke nos tur por siña for di Jacob su famia ta cu faboritismo ta trece desunion den famia. Mayornan sabi cu ta parti di un famia di crianza ta haci tur loke nan por pa convence tanto nan yiunan como nan yiunan di crianza cu nan stima cada un di nan. Ademas, cada yiu tin su puntonan fuerte y por contribui na e felicidad di nan famia.—Romanonan 2:11.

JALOEZIE TA SACA RAIZ

Jacob tabatin cariño special pa Jozef pasobra e tabata fiel y husto

Kisas Jacob a honra Jozef pasobra el a mustra curashi y a para firme pa loke ta corecto. Aparentemente ta pa e motibo ey el a manda traha un paña special pa su yiu. (Genesis 37:3) Tabata trata aki di un “tunica” yen di color, kisas un mantel largo y elegante cu manga largo y cu tabata yega te abou na su pia. Probablemente e tabata e tipo di mantel cu un prins of un hende prominente tabata bisti.

Sigur Jacob a haci esaki cu bon intencion, y Jozef lo mester a keda hopi contento cu e gesto di aprecio y cariño aki di parti di su tata. Pero e paña aki a duna Jozef hopi problema. Pa cuminsa, nos tin cu corda cu e hoben aki tabata un wardador di carne, un trabou cu no tabata facil. Ya nos por imagina Jozef ta cana cu e paña elegante aki cu dificultad den yerba halto, subi pasa riba baranca of purba di libra un carne perdi for di un mata di sumpiña. Pio ainda, con e muestra di cariño special aki di Jacob lo a afecta e relacion cu Jozef tabatin cu su rumannan?

Bijbel ta contesta: “Su ruman hombernan a mira cu nan tata tabata stim’e mas cu tur su otro ruman hombernan; pesey nan a odi’e y no por a papia cu ne cu cariño.” * (Genesis 37:4) Pero aunke e jaloezie di e rumannan di Jozef tabata comprendibel, nan no mester a laga esaki domina nan si. (Proverbionan 14:30; 27:4) Abo a yega di envidia un hende pasobra el a haya e atencion of e honor cu abo tabata desea? Corda riba e rumannan di Jozef. Nan envidia a pone cu nan a comete actonan cu nan a lamenta hopi despues. Nan ehempel ta corda cristiannan cu ta mas sabi pa “alegra cu esnan cu ta alegra.”—Romanonan 12:15.

Jozef sigur a sinti e odio di parti di su ruman hombernan. Pero, acaso e tabata sconde e bunita mantel pa su rumannan no mir’e ora nan tabata banda di dje? Kisas lo e tabatin gana di haci esey. Pero corda cu Jacob tabata kier pa e mantel ta un muestra di amor pa su yiu. Jozef tabata kier haci su best pa e keda cu e confianza di su tata y pesey semper el a bistie. Su ehempel ta hopi probechoso pa nos. Maske nos tata celestial no ta haci distincion di persona, tin biaha e ta duna algun di su sirbidornan fiel un trato special. Ademas, e ta spera di su sirbidornan pa demostra cu nan ta diferente  for di e mundo inmoral y corupto aki. E conducta di cristiannan berdadero ta haci nan diferente for di tur hende rond di nan, mescos cu e paña special di Jozef. Tin biaha, e conducta aki por provoca jaloezie y hasta odio. (1 Pedro 4:4) Pero esey mester pone un cristian sconde su berdadero identidad como un sirbidor di Dios? Claro cu no, mescos cu Jozef tampoco no a sconde su mantel.—Lucas 11:33.

E SOÑONAN DI JOZEF

Un poco tempo despues, Jozef a haya dos soño extraordinario. Den su prome soño Jozef a mira su mes y su rumannan ta mara trigo na boshi. Pero, e boshinan di trigo di su rumannan a bin para tur rond y buig pa Jozef su boshi di trigo mientras esun di dje a keda para stret. Den su di dos soño, solo, luna y 11 strea tabata buig pa Jozef. (Genesis 37:6, 7, 9) Kico Jozef mester a haci cu e soñonan straño y alabes hopi real aki?

E soñonan aki a bin di Jehova Dios. Nan tabata soñonan cu mensahe profetico, y Dios tabata kier pa Jozef pasa esakinan na otro hende. Den un sentido, Jozef tabatin cu haci loke e profetanan lo a haci mas despues na momento cu Dios a manda nan declara su mensahe y huicio na Su pueblo desobediente.

Cu tacto, Jozef a bisa su rumannan: “Por fabor, scucha e soño aki cu mi tabatin.” Su rumannan a compronde kico e soño a nifica, pero nan no a gust’e niun tiki. Pesey nan a reclam’e: “Ta reina bo ta bay reina riba nos?” E relato ta sigui bisa: “Nan a odi’e mas ainda pa motibo di su soñonan y pa motibo di su palabranan.” Ora cu Jozef a conta su tata tocante su di dos soño, mescos cu su rumannan, su tata tampoco no a keda mucho contento. “Su tata a reprend’e y a bis’e: ‘Ta kico e soño cu bo tabatin aki? Kiermen anto cu ami, bo mama y bo ruman hombernan lo bin buig te na suela pa bo?’” Pero Jacob a keda pensa riba e asunto. Acaso ta Jehova ta comunicando cu Jozef?—Genesis 37:6, 8, 10, 11.

Jozef no tabata e unico sirbidor di Jehova cu tabatin cu hiba un mensahe profetico cu no a cay den bon tera y cu hasta a hiba na persecucion. Hesus tabata e predicador principal di mensahenan asina. Anto el a bisa su siguidornan: “Si nan a persigui mi, nan lo persigui boso tambe.” (Juan 15:20) Cristiannan di tur edad por siña hopi di e fe y curashi cu e hoben Jozef a mustra.

MAS MOTIBO AINDA PA ODIA JOZEF

No mucho tempo despues, Jacob a manda Jozef biaha bay noord, cerca di Sikem, caminda su rumannan mayo tabata cuidando nan tounan di carne. Poco tempo prome, na e mesun luga ey nan a haya algun enemigo feroz. Ta di compronde cu Jacob lo mester tabata preocupa pa su yiu hombernan y pesey el a manda Jozef bay wak con ta cu nan. Bo por imagina bo con Jozef lo a sinti su mes? E tabata sa cu su rumannan tabata odi’e mas cu nunca! Kico su ruman hombernan lo a pensa ora cu ta net e nan tata a manda pa tira un bista riba nan? Asina mes Jozef a obedece su tata y a bay.Genesis 34:25-30; 37:12-14.

Jozef su biahe tabata un bon pida pasobra en total e lo mester a cana cuater of cinco dia. Sikem tabata keda un 80 kilometer noord di Hebron. Pero, na Sikem Jozef a haya sa cu su ruman hombernan a bay Dotan, cu tabata keda un 22 kilometer mas na noord. Ora Jozef su rumannan a mir’e ta bin for di un distancia, nan sanger a cuminsa herbe. “Nan a bisa otro: ‘Ata e soñado ta bin! Awor anto, ban laga nos mat’e y tir’e den un di e posnan; y nos lo bisa: “Un bestia salbahe a devor’e.” Anto laga nos mira kico ta para di su soñonan!’” Pero, Ruben a convence su ruman hombernan pa tira Jozef bibo den un pos, cu e intencion pa e mes bin sac’e despues.—Genesis 37:19-22.

Sin sa cu nan tabatin plan pa mat’e, Jozef a bay cerca su rumannan cu e speransa di topa cu nan na un manera pacifico. Pero en bes di esey, mesora nan a atac’e! Nan a ranca su mantel na un manera bruto, lastr’e y bent’e den un pos seco. Segun cu el a recupera di e caida, el a lucha pa lanta para. Pero e no por a sali afo riba su mes forsa. Jozef a sclama na su rumannan y a roga nan pa sac’e, pero nan a ignor’e y pocopoco nan stemnan tabata  zona mas leu. E unico cos cu e por a wak for di den e pos tabata e cielo blauw. Sin tene ningun compasion cu ne, su rumannan a bay sinta come ey banda mes. Ora cu Ruben mester a bay pa un of otro motibo, nan a bolbe cuminsa pensa con pa mat’e. Pero en bes di esey, Juda a convence nan pa bend’e cu e comerciantenan cu tabata pasa ey banda. Dotan tabata keda cerca di e ruta comercial pa bay Egipto y no a tarda mucho pa e caravana di e Ismaelita- y Madianitanan pasa caminda nan tabata. Pa ora Ruben a bin bek, ya caba su rumannan a bende Jozef como catibo pa 20 ciclo. *Genesis 37:23-28; 42:21.

Jozef a para firme pa loke ta corecto, pero toch su rumannan tabata odi’e

Awor nos ta haya nos mes bek caminda e relato aki a cuminsa. Segun cu nan tabata hiba Jozef riba caminda pa Egipto, a parce cu el a perde tur cos. Nan a separ’e completamente di su famia y pa añanan el a keda sin sa nada di nan. E no tabata sa di Ruben su angustia ora Ruben a bolbe y haya sa cu nan a bend’e. Tampoco e no tabata sa di Jacob su tristeza ora cu nan a gañ’e cu su yiu stima, Jozef, tabata morto. E no tabatin niun idea tampoco si su welo Isaak tabata na bida ainda y kico lo a para di su ruman homber mas chikito Benjamin, kende Jozef tabata sinti su falta hopi. Pero di berdad Jozef a perde tur cos?Genesis 37:29-35.

Ainda Jozef tabatin algo cu su ruman hombernan hamas por a kita for di dje: su fe. E tabata sa hopi tocante su Dios, Jehova. Nada no por a kita esey for di dje; ni e echo cu el a perde su cas, ni e dificultadnan cu el a pasa aden durante e biahe largo pa Egipto y ni sikiera e humiliacion di ser bendi como catibo na Potifar, un Egipcio rico. (Genesis 37:36) E dificultadnan cu Jozef a pasa aden a haci su fe y su determinacion pa keda cerca di su Dios bira mas fuerte. Den un proximo articulo nos lo mira con Jozef su fe a yud’e bira mas util pa Jehova y pa su famia. Jozef su ehempel di fe ta digno pa imita!

^ par. 15 Algun experto ta bisa cu posiblemente Jozef su rumannan a pensa cu e regalo cu Jacob a duna Jozef a indica cu Jacob a dun’e e derecho di primogenito. Nan tabata sa cu Jozef tabata e prome yiu di Jacob su kerida esposa, Raquel, cu kende e tabatin e intencion di casa prome. Ademas, Jacob su yiu mayo, Ruben, a drumi cu concubina di su tata. Esaki a deshonra su tata y pesey el a perde su derecho di primogenito.—Genesis 35:22; 49:3, 4.

^ par. 25 Documentonan di e mesun tempo ey ta mustra cu e prijs normal pa catibo na Egipto tabata 20 ciclo. Pues hasta den e detaye chikito aki Bijbel ta mustra di ta exacto.

Mas Informacion

E TOREN DI VIGILANCIA

‘Con Mi Por Haci e Maldad Grandi Aki?’

Con Jozef a logra resisti e casa di Potifar su esfuerso pa seducie?