Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  August 2014

 BIJBEL TA CAMBIA BIDA DI HENDE

Mi Tabata Bringa Mi Mes Guera Contra Violencia y Inhusticia

Mi Tabata Bringa Mi Mes Guera Contra Violencia y Inhusticia
  • NACI NA AÑA: 1960

  • PAIS NATAL: LIBANO

  • SU PASADO: EXPERTO DEN KUNG FU

MI PASADO:

Mi a lanta den un area cu yama Rmeich, cerca di e frontera entre Israel y Libano, durante un guera civil. Mi ta corda cla cla e explosionnan di mina (explosivo dera bou di tera) y e victimanan inocente cu a perde man y pia. Bida tabata duro. Crimen y violencia tabata reina tur caminda.

Nos famia tabata miembro di Iglesia Maronita, un di e iglesianan catolico oriental. Mi tata semper tabata druk pasobra e tabatin cu percura materialmente pa nos famia cu tabata consisti di 12 miembro. Pero mi mama semper tabata percura pa nos bay misa. Cu tempo, mi a cuminsa sinti cu ni iglesia ni comunidad en general no tabata apoya esnan cu mas tabatin mester di yudansa.

Tempo cu mi tabata teenager, mi a cuminsa gusta kung fu. Mi tabata train pisa y mi a bira habil den tira mokete, drop kick y den uza diferente arma di arte marcial. Mi tabata pensa cu si mi no por a caba cu guera, por lo menos mi por a purba di para violencia. Asina cu mi a mira dos hende bringa, mi tabata bula aden y purba di stop nan. Mi no tabata tuma nada for di niun hende y cualkier cos tabata pone mi rabia. Hopi hende den zuid di Libano tabatin miedo di mi pasobra mi tabata bringa mi mes guera contra violencia y inhusticia.

Na 1980 mi a join un ekipo di kung fu na Beirut. Tur dia bom, raket y misil tabata cay, pero esey no a stroba mi di bay train. Mi bida tabata draai rond di come, drumi y biba manera Bruce Lee, un actor Mericano naci na China y campeon di kung fu. Mi tabata peña mi cabey mescos cu ne, cana mescos cu ne y grita mescos cu ora e tabata bringa. Nunca mi tabatin un smile riba mi cara.

BIJBEL A CAMBIA MI BIDA:

Mi meta tabata pa bira un profesional di kung fu na China. Un anochi cu mi tabata train pisa preparando pa mi biahe pa China, mi a tende un hende bati na porta. Luga tabata un amigo di mi cu a bin cu dos testigo di Jehova. Mi tabatin un trainingspak preto bisti y mi  tabata papa soda. Mi a bisa nan: “Mi no sa nada di Bijbel.” Mi no por a imagina cu for di e momento ey mi bida tabata bay cambia.

E Testigonan a mustra mi den Bijbel dicon hende lo no por elimina violencia y inhusticia riba nan mes. Nan a splica mi cu ta Satanas e Diabel ta e causante di e tipo di problemanan aki. (Revelacion 12:12) Mi a keda masha impresiona di e manera trankil cu nan a papia cu mi y e conviccion cu nan a demostra. Anto loke a conmove mi mas ainda ta ora mi a siña cu Dios tin un nomber. (Revelacion 4:11) Tambe nan a mustra mi e texto di 1 Timoteo 4:8, cu ta bisa: “Entrenamento fisico ta yuda cu algo; pero devocion na Dios ta probechoso pa tur cos, ya cu e ta inclui e promesa di bida tanto pa awor como pa futuro.” E palabranan ey tabatin un impacto grandi riba mi bida.

Lamentablemente, mi a perde contacto cu e Testigonan pasobra mi famia a bisa nan pa no bin mas. A pesar di esey, mi a dicidi di stop di practica kung fu y cuminsa studia Bijbel. Mi rumannan no a gusta e idea ey, pero mi tabata determina pa haya e testigonan di Jehova atrobe pa mi studia Bijbel cu nan.

Mi a sigui busca e testigonan sin por a haya nan. Den e mesun temporada ey mi tabata hopi tristo pa motibo di e morto di mi tata y otro golpinan di bida den famia. Mi a cuminsa traha na un compania di construccion y un dia un colega di trabou cu yama Adel a puntra mi dicon mi ta asina tristo. El a cuminsa papia tocante e speransa di resureccion den Bijbel. E Testigo amabel aki tabatin e pasenshi di studia Bijbel cu mi pa e siguiente nuebe lunanan.

Mas mi tabata siña for di Bijbel, mas mi a mira e necesidad di haci cambionan grandi den mi personalidad. No tabata facil. Semper mi tabata disgusta y tabata cla pa rabia. Pero Bijbel a siña mi con pa controla mi beis y pa mi no laga delaster un cos traha riba mi nervionan. Por ehempel, Hesus a duna e siguiente conseho na Mateo 5:44: “Sigui stima boso enemigonan y haci oracion pa esnan cu ta persigui boso.” Y Romanonan 12:19 ta spierta nos: “No tuma venganza, ... pasobra ta para skirbi: ‘Venganza ta di mi; ami lo paga bek, Jehova ta bisa.’” E textonan aki y tambe otronan a yuda mi pocopoco pero sigur pa logra haya paz di paden.

E BENEFICIONAN:

Aunke na principio mi famia a bay contra mi decision di studia Bijbel cu testigonan di Jehova, nan a cuminsa respeta e Testigonan. De echo, un di mi ruman hombernan tambe a cuminsa adora Jehova y mi mama a defende nos fe te na su morto.

Tambe Dios a bendiciona mi cu un casa fiel y precioso cu yama Anita, kende ta mi compañera stima den sirbishi di tempo completo. For di aña 2000, ami cu Anita ta biba na Eskilstuna, Suecia. Eynan nos ta dedica nos mes na siña hende cu ta papia Arabier tocante Bijbel.

Ainda mi ta sinti pa esnan cu ta sufri pa motibo di violencia. Pero, mi ta haya berdadero goso y paz pasobra mi sa pakico tin tanto sufrimento y mi sa cu pronto Dios lo caba cu ne.—Salmo 37:29.

Ami cu mi casa ta gusta siña otro hende tocante Jehova. E ta haci nos hopi feliz

Mas Informacion

DIOS TIN BON NOTICIA PA NOS!

Dicon Dios Ta Permiti Maldad y Sufrimento?

Con maldad a cuminsa y dicon Dios ta permiti maldad? Lo yega un dia cu no tin maldad y sufrimento mas?