Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  July 2014

Bo Tabata Sa?

Bo Tabata Sa?

Den pasado, con trahadornan di barco tabata haci nan barconan waterproof?

Lionel Casson, un experto riba barconan antiguo, a splica kico trahadornan di barco den tempo Romano tabata haci despues di seal e nachinan meymey di e plankinan di nan barco. Nan tabatin custumber di “yena e nachinan y hasta henter e structura parti pafo di e barco cu breu of un mescla di breu cu wax; parti paden tambe nan tabata hunta cu un capa di breu.” Hopi tempo prome cu e Romanonan, e antiguo Acadio- y Babilonionan tambe tabata uza breu pa haci nan barconan waterproof.

Teranan biblico tabata rico na breu (likido)

E Scritura Hebreo ta referi na un tecnica similar den Genesis 6:14.

Den naturaleza, hende por haya breu den dos forma, esta, den forma likido y solido. Trahadornan di barco di pasado tabata hunta e breu den forma likido directamente riba nan barconan. Unabes cu nan a hunt’e, e breu likido aki tabata seca y bira duro y forma un capa waterproof.

Teranan biblico tabata rico na breu. E Vaye di Sidim, cerca di Lama Morto, “tabata yen di pos di breu.”—Genesis 14:10.

Con nan tabata conserva pisca den pasado?

Pa hopi tempo caba pisca ta un cuminda importante. Prome cu e apostelnan di Hesus a cuminsa biaha cu ne, algun di nan tabata piscador riba Lama di Galilea. (Mateo 4:18-22) Por lo menos un parti di e piscanan cu nan tabata coy eynan tabata ser procesa den “fabricanan” den bisindario.

Un pintura graba riba palo cu ta ilustra e piscadornan Egipcio di antiguedad

E tecnica di conserva pisca cu probablemente nan tabata uza na Galilea ainda ta ser uza na cierto luganan. Prome nan tabata limpia e pisca y lab’e cu awa. E buki Studies in Ancient Technology ta describi e siguiente pasonan: “Nan tabata frega salo grof den e caicay, boca y scamanan. Meymey di cada capa di pisca nan tabata pone salo y nan tabata pone un tela seco riba nan. Despues cu e piscanan aki a para tres pa cinco dia, nan tabata bolter henter e bulto y lag’e para pa e mesun cantidad di dia atrobe. Durante e dianan ey, e piscanan tabata seca y e salo tabata penetra den nan. Despues di esaki nan tabata bira duro y stijf.”

No ta conoci pa cuanto tempo e piscanan tabata keda bon conserva den e manera aki. Pero, e echo cu e Egipcionan di pasado tabata exporta pisca conserva pa Siria ta mustra cu e metodo aki tabata duna bon resultado.