Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2014

Ki Speransa Tin pa Nos Antepasadonan?

Ki Speransa Tin pa Nos Antepasadonan?

ALGUN tempo pasa, The Chosun Ilbo, un corant Koreano, a publica un articulo interesante titula: “‘E Maraviyoso Shim Cheong’, un Muher Cu No Tabata Sa Nada di Hesus—Ta Fierno El A Bay?”

E titulo aki tabata un poco controversial pasobra segun un cuenta Koreano, Shim Cheong ta un mucha muher hopi stima cu ta sacrifica su bida pa yuda su tata ciego. Den transcurso di añanan el a ricibi hopi elogio. De echo, na Korea, Shim Cheong ta ser mira como un ehempel di un yiu muher dedica.

Pa hopi hende, e idea cu un persona asina por ser castiga den fierno djis pasobra e no tabata un cristian batisa a parce inhusto of hasta ofensivo. Al fin y al cabo, e historia supuestamente lo mester a tuma luga hopi tempo prome cu e mensahe tocante Cristo a yega na e pueblo caminda Shim Cheong tabata biba.

E articulo a inclui un entrevista cu un pastoor. Nan a puntr’e si tur hende cu muri sin haya chens di conoce Hesus ta condena pa bay fierno. Kico el a contesta? “Nos no sa. Nos ta djis asumi cu Dios lo mester tin un proposito of destino [pa e tipo di hendenan ey].”

BAUTISMO TA NECESARIO PA HAYA SALBACION

Catisashi di Iglesia Catolico ta bisa: “Señor mes ta afirma cu Bautismo ta necesario pa salbacion. ... Iglesia no conoce niun otro manera sino Bautismo cu ta sigura entrada den felicidad eterno.” Pa e motibo aki, tin hende ta pensa cu si un hende muri sin cu el a batisa, e ta ser tira den fierno di candela of ta sufri di un manera of otro despues di morto.

Pero pa hopi otro hende, e idea aki ta absurdo. Miyones y miyones di hende a muri sin cu nan a haya conocemento di Bijbel. Nan merece tormento eterno? Kico Bijbel ta bisa tocante e asunto aki?

E SPERANSA CU BIJBEL TA DUNA

Bijbel ta mustra bon cla cu Dios no ta castiga hende cu a biba sin cu nan a haya sa kico el a rekeri di nan. Echonan 17:30 ta sigura nos: “Dios a laga e temponan ey cu hende tabata ignorante pasa numa.” Ki speransa Bijbel ta ofrece pa hende cu a muri sin haya chens di siña tocante Dios?

Kico Hesus tabata kiermen ora el a priminti: “Lo bo ta cu mi den Paradijs”?

Nos por haya e contesta den loke Hesus a bisa un di e malhechornan cu a muri banda di dje. E homber a bisa Hesus: “Corda riba mi ora bo drenta bo Reino.” Kico Hesus a contest’e? “Di berdad mi ta bisa bo awe: Lo bo ta cu mi den Paradijs.”—Lucas 23:39-43.

Acaso Hesus a priminti e homber cu lo e bay cielo? No, pasobra e homber no a “nace di nobo” di awa y di spirito. Esaki ta algo necesario pa drenta e Reino di cielo. (Juan 3:3-6.) Mas bien, Hesus a primintie cu lo e biba atrobe den Paradijs. Como Hudiu, lo e mester tabata sa di e Paradijs—e Hofi di Eden—cu un tempo tabata existi riba Tera y cu e prome buki di Bijbel ta papia di dje. (Genesis 2:8) Hesus su promesa a duna e homber speransa di resucita den Paradijs riba Tera.

De echo, Bijbel ta priminti “cu lo bay tin un resureccion di tanto hende husto como inhusto.” (Echonan 24:15) E palabra “inhusto” ta referi na tur esnan cu no a haya oportunidad pa cumpli cu Dios su normanan husto pasobra nunca nan no a haya sa di nan. Hesus lo resucita e malhechor inhusto cu el a papia cu ne y miyones y miyones di otro hende cu a muri den nan ignorancia. Anto den Paradijs riba Tera nan lo siña kico Dios ta rekeri di nan, y nan lo haya e oportunidad pa demostra cu nan ta stim’e y kier obedece su mandamentonan.

 ORA E INHUSTONAN RESUCITA

Ora e inhustonan resucita, nan lo ser husga a base di loke nan a haci den pasado? No. Romanonan 6:7 ta bisa: “Esun cu muri ta keda absolve di su pica.” E inhustonan a paga pa nan picanan ora cu nan a muri. Pues, nan lo ser husga a base di loke nan haci despues cu nan ser resucita y no a base di loke nan a haci den nan ignorancia prome cu nan a muri. Kico esaki lo nifica pa nan?

Despues di e resureccion, e inhustonan lo haya oportunidad pa siña di e leynan di Dios, cu lo keda revela den bukinan simbolico. E ora ey nan lo ser husga “segun nan obranan”, es decir, a base di si nan ta obedece Dios su leynan of no. (Revelacion 20:12, 13) Pa hopi hende inhusto esaki lo no ta e di dos, sino e prome biaha cu nan lo haya oportunidad pa siña haci Dios su boluntad y haya bida eterno riba Tera.

E siñansa di Bijbel aki a yuda hopi hende bolbe haya fe den Dios. Yeong Sug tabata un di nan. El a ser lanta como un catolico devoto. Algun di su famianan hasta tabata pastoor. El a drenta un convento cu e speransa di bira soeur. Mas despues, el a sali pasobra e cosnan cu el a mira pasa eyden a desapunt’e. Ademas, e no por a acepta e doctrina di fierno di candela pasobra e idea di tortura hende den candela di fierno tabata parc’e algo cruel y inhusto.

E ora ey, un testigo di Jehova a mustra Yeong Sug e siguiente palabranan den Bijbel: “E bibonan sa cu nan lo muri, ma e mortonan no sa nada, ni nan no tin recompensa mas, pasobra ningun hende no ta corda mas riba nan.” (Eclesiastes 9:5) E Testigo a yud’e compronde cu su antepasadonan no ta ser tormenta den fierno. Mas bien, nan ta drumi den morto, wardando riba resureccion.

Sabiendo cu hopi hende nunca a yega di tende di e berdad di Bijbel, Yeong Sug a tuma na pecho e palabranan di Hesus na Mateo 24:14: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.” Awe, e ta predica e bon noticia y ta comparti cu otro hende su speransa maraviyoso basa riba Bijbel.

“DIOS NO TA HACI DISTINCION DI PERSONA”

Bijbel ta bisa: “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.” (Echonan 10:34, 35) Esaki ta e husticia perfecto cu nos tur por spera di Dios, kende ta “stima husticia y huicio.”—Salmo 33:5.