Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2014

 TOPICO PRINCIPAL | KICO DIOS TA PENSA DI HUMAMENTO?

Un Epidemia Mundial

Un Epidemia Mundial

Humamento ta un asesino cruel.

  • El a mata 100.000.000 hende den e ultimo siglo.

  • E ta caba cu 6.000.000 bida pa aña.

  • E ta mata un promedio di un persona cada seis seconde.

Y no ta parce cu e situacion aki lo cambia tampoco.

Autoridad riba tereno di salubridad ta calcula cu si e situacion aki sigui asina, pa aña 2030, e promedio anual di morto causa pa humamento lo surpasa 8.000.000. Ademas, nan ta pronostica cu pa fin di siglo 21 humamento lo caba cu bida di 1.000.000.000 hende.

No ta hende cu ta huma so ta bira victima di tabaco. Nan famia tambe ta bira victima, ya cu nan ta sufri daño emocional y ta keda perhudica financieramente. Ademas, tur aña 600.000 hende ta muri pa motibo di e huma cu nan ta hala aden di otro hende cu ta huma. En realidad, ta tur hende ta paga pa e consecuencianan pasobra e gastonan di cuido medico tambe ta subi.

Na contraste cu otro epidemianan cu ta pone dokternan haci hopi esfuerso pa haya un cura, e problema di humamento aki ta facil pa resolve y su solucion ta bon conoci. E director general di e Organisacion Mundial di Salud, Dr. Margaret Chan, a bisa: “Ta hende mes ta causa e epidemia di tabaco; pero si gobierno y comunidad uni nan esfuersonan, nan lo por soluciona e problema aki.”

Nunca prome tabatin asina tanto esfuerso di parti di paisnan rond mundo pa combati e problema serio di salud aki. For di augustus 2012, mas o menos 175 pais a bay di acuerdo pa tuma medida pa limita uzo di tabaco. * Sinembargo, forsanan poderoso ta sigui promove e epidemia aki. Tur aña e industria di tabaco ta gasta miles di miyones di dollar na propaganda pa atrae cliente nobo, specialmente hende muher y adulto hoben cu ta biba den paisnan den desaroyo. Ademas, como cu tabaco ta crea un adiccion asina fuerte, e cantidad di hende cu ta muri di humamento, entre e mil miyon humadornan, ta keda halto. Si nan no stop di huma, e cantidad di morto lo aumenta considerablemente den e siguiente cuater decadanan.

Propaganda pa humamento y adiccion na nicotina ta pone cu hopi hende ta keda pega na un habito cu nan ta desea di vence. Esaki ta precies loke a pasa cu Naoko, kende a cuminsa huma for di jong. E manera cu medionan di comunicacion ta pinta humamento a lag’e kere cu e ta masha cos. Aunke tanto su mama como su tata a muri di cancer di pulmon, toch el a sigui huma mientras cu e tabata lanta su dos yiu muhernan. Naoko a admiti: “Mi tabatin miedo di haya cancer y mi tabata preocupa pa e salud di mi yiunan, pero toch mi no por a laga e sigaria. Mi a kere cu nunca lo mi por a stop di huma.”

A pesar di esey, Naoko a stop di huma. El a haya e motivacion pa vence su habito di huma for di e mesun fuente cu a yuda miyones di otro hende keda liber di tabaco. Ki fuente esaki ta? Wak e siguiente articulo.

^ par. 11 E medidanan aki ta entre otro: informa comunidad tocante e peligernan di humamento, limita propaganda cu ta promove humamento, hisa belasting riba tabaco y organisa programanan pa yuda hende stop di huma.