Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2014

 TOPICO PRINCIPAL | KICO DIOS TA PENSA DI HUMAMENTO?

Kico Dios Ta Pensa di Humamento?

Kico Dios Ta Pensa di Humamento?

Naoko, kende a ser menciona den e articulo anterior, ta conta con el a logra stop di huma: “Mi a logra cambia mi bida pasobra mi a siña e berdad tocante Dios su cualidadnan y proposito.” Loke el a siña ta para den Bijbel. Aunke Bijbel no ta menciona e palabra tabaco, e ta yuda nos compronde si kico Dios ta pensa tocante humamento. * E conocemento aki a duna hopi hende e motivacion cu nan tabatin mester pa resisti e gana di cuminsa huma of hasta stop. (2 Timoteo 3:16, 17) Laga nos considera tres efecto dañino di humamento y mira kico Bijbel ta bisa tocante nan.

HUMAMENTO TA CREA ADICCION

Tabaco ta contene nicotina, locual ta un di e substancianan di mas adictivo cu ta existi. Nicotina tin un efecto stimulante of trankilisante. Cada biaha cu un hende hala huma aden, su curpa ta hiba un dosis di nicotina hopi lihe na su celebro. Pues, si e ta huma un promedio di un paki di sigaria pa dia, e ta inhala mas o menos 200 dosis di nicotina. Esey ta un dosis mucho mas halto cu cualkier otro droga, locual ta haci nicotina un substancia sumamente adictivo. Unabes cu un persona bira adicto na nicotina, si e no satisface su gana di huma, su curpa ta drenta un ansha pa haya e substancia aki.

“Boso ta esclavo di esun cu boso ta obedece.” —Romanonan 6:16

Bo por bisa cu di berdad bo ta obedece Dios si bo ta adicto na tabaco?

Bijbel ta yuda nos haya e punto di bista corecto tocante humamento. E ta bisa: “Boso no sa cu si boso sigui presenta boso mes na un hende como esclavo obediente, boso ta esclavo di esun cu boso ta obedece?” (Romanonan 6:16) Ora un persona laga su gana di huma domina su pensamento y accionnan, e ta bira un esclavo di e bicio degradante aki. Pero, Dios, kende su nomber ta Jehova, kier pa nos ta liber no solamente di bicionan cu por contamina nos curpa sino tambe di esnan cu por causa daño na nos “spirito”, esta, nos actitud y manera di pensa. (Salmo 83:18; 2 Corintionan 7:1) Pues, segun cu un persona su aprecio y respet pa Jehova ta crece, e ta reconoce cu Jehova merece lo mihor. Pero e no por duna Jehova esey tanten cu e ta adicto na un habito mortal. Ta ora e realisa esaki, e por haya e motivacion necesario pa resisti mal deseo.

Olaf, kende ta biba na Alemania, a cuminsa huma tempo cu e tabatin 12 aña. Pero el a logra vence su adiccion na sigaria despues cu el a huma 16 aña largo. Olaf a pensa cu humamento no ta peligroso, pero durante e añanan cu a pasa, su adiccion a bira incontrolabel. El a bisa: “Un biaha cu mi sigarianan a caba, mi a bira asina desespera cu mi a piki tur e cabitonan di sigaria for di un asbak, coba e resto di tabaco for di nan y lora nan den un pida corant. Ora mi corda  so kico mi a haci, mi ta haya berguensa.” Con el a logra stop di huma? Olaf ta bisa: “E factor di mas importante tabata mi deseo di haci Jehova contento. Jehova su amor pa humanidad y e speransa cu e ta ofrece hende a duna mi e forsa pa libra mi mes di e adiccion aki.”

HUMAMENTO TA HACI DAÑO NA BO CURPA

Segun e buki The Tobacco Atlas: ‘Ta cientificamente proba cu humamento di sigaria ta afecta casi tur organo den nos curpa y ta pone cu nos ta core mas risico di bira malo y muri.’ Ta bon conoci cu humamento ta causa malezanan no-contagioso manera cancer, problema di curason y di pulmon. Pero segun e Organisacion Mundial di Salud, humamento tambe ta un di e causanan mas grandi di malezanan contagioso manera tuberculosis.

“Stima Jehova bo Dios cu henter bo curason, cu henter bo alma y cu henter bo mente.” —Mateo 22:37

Bo ta mustra cu bo ta stima y respeta Dios si bo tin un bicio cu ta haci daño na bo curpa?

Jehova ta siña nos den su Palabra con nos tin cu mira nos bida, curpa y mente. Su yiu, Hesus, a enfatisa esaki ora el a bisa: “Stima Jehova bo Dios cu henter bo curason, cu henter bo alma y cu henter bo mente.” (Mateo 22:37) Ta bisto anto cu Dios kier pa nos respeta nos curpa y biba manera e kier pa nos biba. Segun cu nos ta conoce Jehova mihor y tambe su promesanan, nos ta siña aprecia y balora tur loke el a haci pa nos. Esaki ta motiva nos pa keda liber di tur loke por contamina nos curpa.

Jayavanth, un dokter na India, a huma 38 aña largo. El a bisa: “Mi a siña tocante e peligernan di humamento den revistanan medico. Mi tabata sa cu e ta malo y mi a conseha mi pashentnan pa stop di huma. Pero mi mes no por a stop, aunke mi a purba di haci esey cinco of seis biaha.” Kico a yud’e stop? E ta conta: “Mi a stop di huma pasobra mi a cuminsa studia Bijbel. Mi deseo pa agrada Jehova a duna mi e motivacion pa stop di huma mesora.”

HUMAMENTO TA AFECTA OTRO HENDE

Tanto e huma di sigaria cu ta keda atras como e huma cu un humador ta saca ta toxico. Ora otro hende hala e huma aki aden, nan por haya cancer y otro malezanan. Tur aña, 600.000 hende cu no ta huma mes, specialmente hende muher y mucha, ta perde nan bida. Segun un informe di e  Organisacion Mundial di Salud, hasta ora hende hala un tiki so di e huma aki aden, nan no ta scapa di e consecuencianan.

“Stima bo prohimo mescos cu bo mes.” —Mateo 22:39

Bo ta mustra cu bo ta stima bo prohimo y bo famia si bo humamento ta causa daño na nan salud?

Hesus a bisa cu e mandamento mas importante despues di stima Dios ta cu nos tin cu stima nos prohimo, esta, nos famia, amigonan y otro hende rond di nos. El a bisa: “Stima bo prohimo mescos cu bo mes.” (Mateo 22:39) Si nos tin un custumber cu ta haci daño na e hendenan rond di nos, nos no ta mustra amor pa prohimo. Amor di curason ta motiva nos pa sigui e conseho di Bijbel: “Laga cada hende sigui busca, no su mes beneficio, sino esun di e otro persona.”—1 Corintionan 10:24.

Armen, cu ta biba na Armenia, ta corda: “Mi famia a roga mi pa mi no huma pasobra esey tabata afecta nan. Pero mi no kier a acepta cu esey por tabatin un mal efecto riba nan.” E ta splica kico a pon’e cambia su punto di bista: “Mi conocemento di Bijbel y amor pa Jehova a yuda mi stop di huma y acepta cu di berdad esaki tabata haci daño tanto na mi mes como na hende rond di mi.”

UN DIA LO NO TIN HUMAMENTO MAS

Conocemento di Bijbel a yuda Olaf, Jayavanth y Armen stop cu e bicio di huma cu tabata causa daño tanto na nan mes como na otro hende. Nan a logra stop, no djis pasobra nan tabata sa cu humamento ta malo sino pasobra nan a siña stima Jehova y kier a hacie contento. E texto di 1 Juan 5:3 ta enfatisa con importante e amor ey ta: “Amor pa Dios ta nifica cu nos ta cumpli cu su mandamentonan; sinembargo, su mandamentonan no ta pisa.” No ta semper facil pa sigui e principionan di Bijbel. Pero ora un hende ta stima Dios, obediencia lo no ta dificil p’e.

Jehova Dios ta yudando miyones di hende pa libra nan mes di adiccion na nicotina y keda liber di dje mediante un campaña mundial di educacion biblico. (1 Timoteo 2:3, 4) Pronto Jehova lo destrui e sistema comercial haragan aki cu ta sclavisa miyones di hende na tabaco. E lo haci esaki pa medio di su Reino celestial cu Hesucristo como Rey. Jehova lo caba cu e epidemia mundial di humamento pa semper y e lo percura pa tur hende obediente por tin un curpa y mente sano atrobe.—Isaias 33:24; Revelacion 19:11, 15.

Si bo ta lucha pa stop di huma, no entrega. Abo tambe por haya e motivacion pa stop ora bo siña stima Jehova y compronde kico e ta pensa di humamento. Si bo ta desea, testigonan di Jehova lo ta contento pa yuda bo siña y aplica principionan di Bijbel. Bo por ta sigur cu si bo kier pa Jehova yuda bo libra bo mes di adiccion na tabaco, lo e duna bo e forsa necesario pa logra esey.—Filipensenan 4:13.

^ par. 3 Den e serie di articulo aki, humamento ta referi na entre otro huma sigaria, siga of pipa. Pero, e principionan cu nos lo bay considera den e articulo aki ta aplica tambe na kauw tabaco, snuif tabaco na puiro, uza sigaria electronico cu tin nicotina y tambe otro productonan.