Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  May 2014

 TOPICO PRINCIPAL | KEN POR PRONOSTICA FUTURO?

Algun Pronostico Ta Cumpli, Pero Mayoria No

Algun Pronostico Ta Cumpli, Pero Mayoria No

Abo kier sa bo futuro? Mayoria di hende ta sumamente interesa pa haya contesta riba e pregunta aki. Pesey, hopi hende ta purba pronostica futuro, pero tin diferente resultado. Ban wak algun ehempel:

  • CIENTIFICONAN ta uza aparatonan sofistica y ta gasta hopi placa pa pronostica entre otro con contaminacion lo afecta planeta Tera y si awa lo yobe den bo bario mañan.

  • ANALISTANAN PROFESIONAL ta predeci tendencia den mundo di negoshi y politica. Warren Buffett, un di e personanan mas rico na mundo, a ser yama un profeta pasobra e ta bon den pronostica loke lo sosode den mundo di negoshi, y como resultado e ta un inversionista exitoso. Nate Silver, un otro analista, a pronostica a base di estadisticanan ta ken lo gana eleccion na Merca y ta ken ta esnan cu lo gana premio pa mihor pelicula na Hollywood y mucho mas.

  • DOCUMENTONAN DI PASADO a ser interpreta como profecia. Segun algun hende, e cosnan confuso cu Michel de Notredame (Nostradamus) a skirbi den siglo 16 ta cumpli den nos tempo. Y algun hende a interpreta e echo cu un ciclo di e kalender Maya a termina riba 21 di december 2012 como un indicacion cu algo desastroso lo tuma luga riba e dia ey.

  • LIDERNAN RELIGIOSO tin biaha ta predeci cu sucesonan tragico lo tuma luga rond mundo pa spierta humanidad y pa nan haya mas siguidor. Profeta di calamidad, Harold Camping, y su discipelnan a tene un campaña pa spierta hende cu fin di mundo ta bin na aña 2011. Ta bisto cu esey no a sosode.

  • SPIRITISTANAN ta bisa cu nan tin habilidad special pa predeci futuro. Tin algun cos cu tanto Edgar Cayce como Jeane Dixon a predeci cu lo tuma luga den siglo 20, y nan a cumpli. Pero tin hopi cos tambe cu nan a pronostica cu no a cumpli. Por ehempel, Dixon a pronostica cu na 1958 Tercera Guera Mundial lo cuminsa y Cayce a predeci cu meymey di añanan 70 New York lo bay bou di awa.

Ken realmente por predeci futuro? Esaki ta un bon pregunta pasobra si bo sa loke ta bay pasa den futuro, esey por tin un efecto riba bo bida y e decisionnan cu bo ta tuma.