Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  May 2014

Bo Tabata Sa?

Bo Tabata Sa?

Dicon nan tabata kibra pia di criminal colga na staca?

E Evangelio di Juan ta bisa cu ora Hesus y e otro dos criminalnan tabata colga na staca, “e Hudiunan a pidi Pilato pa laga kibra pia di e hombernan y baha e curpanan.”—Juan 19:31.

Tin un ley hudiu cu ta bisa cu curpa di un criminal condena na morto “no mester keda colga henter anochi na e palo.” (Deuteronomio 21:22, 23) E Hudiunan aparentemente tabata aplica e mesun ley na esnan cu e Romanonan a sentencia na morto. Den e caso aki, si nan lo a kibra pia di Hesus y e hombernan, nan lo a muri mas lihe y nan lo por a dera nan prome cu Sabbat, esta prome cu solo baha.

Hopi biaha nan tabata claba man y pia di un persona condena na morto na un staca. Ora nan tabata hisa e staca na halto, e criminal tabata sinti un dolor inmenso como cu tur su peso tabata baha riba e clabonan. E persona lo mester a pres cu su pianan riba e clabonan pa e hisa su curpa pa asina e por a hala rosea. Pero si nan a kibra su pianan, e ora ey lo ta imposibel pa e hisa su curpa y lo no a dura hopi cu e ta stik, drenta den shock y muri.

Con nan tabata uza slinger di tira piedra den guera di antiguedad?

E arma cu David a uza pa mata e gigante Goliat tabata un slinger di tira piedra. Aparentemente David a siña uza e arma aki tempo cu e tabata un cuidador di carne.—1 Samuel 17:40-50.

E escultura aki ta mustra con e Asirionan a uza slinger pa ataca un stad hudiu

Bo por mira den obranan di arte di tempo biblico cu tanto e Egipcionan como e Asirionan tabata uza slinger. E arma aki tabata consisti di un pida cuero of paña chikito cu tabata pega na dos strep of cabuya. E hende cu tabata tira e slinger tabata hinca un piedra lizo of rondo den e pida cuero chikito ey. E piedra tabata mas o menos 5 pa 8 centimeter y e tabata pisa un 250 gram. E ora ey, e tabata zwaai e slinger na halto y laga un di e cabuyanan bay pa e piedra sali cu un velocidad halto y logra dal e victima.

Den Medio Oriente nan a coba saca un gran cantidad di piedra cu soldaatnan tabata uza den gueranan di antiguedad. Ora un guerero habil tabata tira e piedranan ey, probablemente nan tabata alcansa un velocidad di entre 160 pa 240 kilometer pa ora. Expertonan no ta sigur si bo por mik cu un slinger mes bon cu bo por mik cu un flecha, pero definitivamente e slinger por mata un hende.—Huesnan 20:16.