Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  April 2014

Thomas Emlyn—Un Defensor di e Berdad of un Blasfemador?

Thomas Emlyn—Un Defensor di e Berdad of un Blasfemador?

KEN Thomas Emlyn tabata? Kico a motiv’e pa tuma un posicion firme pa e berdad? Y kico anos por siña for di dje?

Pa contesta e preguntanan ey, nos mester bay Inglatera y Irlanda y bay bek den tempo te na e ultimo parti di siglo 17 y e prome parti di siglo 18. E tempo ey e Iglesia Anglicano di Inglatera tabatin hopi poder. Cierto hende individual y varios grupo protestant tabatin un conflicto cu e Iglesia Anglicano.

KEN EMLYN TABATA?

Ta bou di e circunstancianan ey Thomas Emlyn a nace riba 27 di mei 1663, na Stamford, Lincolnshire, Inglatera. Tempo e tabatin 19 aña, el a duna su prome predicashi. Cu tempo el a sirbi como kapelaan pa un condesa cu tabata biba na London; anto despues di tempo el a muda bay Belfast, Irlanda.

Na e stad ey, el a sirbi como sacerdote di un parokia. Y a traves di tempo, el a sirbi na diferente otro luga, entre otro na Dublin.

DICON NAN A ACUS’E DI A COMETE BLASFEMIA?

Durante e tempo ey, Emlyn a haci un estudio profundo di Bijbel. Debi na e estudio ey, el a cuminsa duda den e doctrina di Trinidad. Anto ora cu el a analisa e Evangelionan, el a haya prueba convencente cu e doctrina ey no ta cuadra cu Bijbel.

Emlyn no a revela di biaha loke el a descubri. Sinembargo, algun hende di su misa na Dublin a ripara cu e no tabata menciona e doctrina di Trinidad den su predicashi. Sabiendo cu otro hende lo no keda contento cu loke el a descubri, el a skirbi: “Mi sa cu unabes cu mi revela mi punto di bista, mi no por sigui sirbi den e funcion cu mi tin actualmente.” Na juni 1702, dos compañero di dje a acerc’e pa puntr’e dicon e no tabata menciona e doctrina di Trinidad den su predicashi. Emlyn a admiti cu e no tabata kere den e doctrina ey mas, y el a entrega su renuncia.

Den e publicacion aki, Emlyn a duna prueba convencente for di Bijbel dicon Hesus no por ta e Dios Supremo

Despues di algun dia, el a bay Inglatera. Sinembargo, despues di dies siman el a regresa Dublin pa regla algun asunto eynan como cu e kier a bay biba permanentemente na London. Mientras e tabata eynan, el a saca e publicacion An Humble Inquiry Into the Scripture-Account of Jesus Christ pa defende su punto di bista. Den e publicacion ey, el a uza e Scritura pa duna prueba bon cla dicon Hesus no por ta e Dios Supremo. Como resultado, e miembronan di e misa na Dublin caminda Emlyn a sirbi anteriormente a bira furioso, y nan a entrega un keho oficial contra dje.

Riba 14 di juni 1703, Emlyn a wordo aresta y mester a presenta dilanti tribunal na Dublin. Den e buki True Narrative of the Proceedings (E Berdadero Historia di e Huicio) Emlyn ta bisa: “Nan a acusa mi di a skirbi y publica un buki den cua, segun algun hende, mi a blasfema pasobra mi a insinua na un manera malicioso cu Hesucristo no ta igual  na Dios Tata.” E caso den corte a resulta di ta un inhusticia di marca mayor. Shete obispo di e Iglesia di Irlanda a sinta banda di e huesnan di corte. Y Emlyn no tabatin mag di defende su mes. E famoso abogado Richard Levins a bisa Emlyn cu nan lo persigui Emlyn manera un animal, sin ley of regla. Na final di e huicio, Richard Pyne, e presidente di e tribunal di Irlanda, a recorda e miembronan di hurado cu e “obisponan tabata eynan”, kisas pa duna di compronde cu si nan no yega na e veredicto cu ta ser spera di nan, nan lo ricibi e castigo mereci.

“Mi ta sufri pa loke mi ta pensa cu ta e berdad tocante Dios y su gloria.”—Thomas Emlyn

Ora hues a declara Emlyn culpabel, e abogado general a duna Emlyn e oportunidad pa hala atras. Pero Emlyn a rechasa e oferta. Nan a dun’e un boet y sentenci’e na un aña di castigo den prizon. Como cu e no por a paga e boet, e mester a keda dos aña den prizon te ora un amigo di dje a convence autoridadnan pa reduci su castigo. El a haya su libertad riba 21 di juli 1705. E humiliacion cu el a pasa aden a pon’e bisa e palabranan menciona anteriormente: “Mi ta sufri pa loke mi ta pensa cu ta e berdad tocante Dios y su gloria.”

Emlyn a bay biba na London; cu tempo el a bira amigo di William Whiston, un otro experto riba tereno di Bijbel cu a ser rechasa pasobra el a publica loke el a pensa ta e berdad biblico. Whiston tabatin hopi respet pa Emlyn y a yam’e “‘e prome y principal promotor’ di ‘cristianismo di antiguedad.’”

DICON EL A RECHASA E DOCTRINA DI TRINIDAD?

Mescos cu William Whiston y un otro experto bon conoci, Isaac Newton, Emlyn a descubri cu e doctrina di Trinidad cu e Credo di Atanasio ta papia di dje no ta un siñansa biblico. Emlyn a splica: “Despues di a studia e Santo Scritura y pensa profundamente riba dje, ... mi a haya motibo valido ... pa cambia e punto di bista cu mi tabatin encuanto e doctrina di Trinidad.” El a yega na e conclusion cu “e Dios y Tata di Hesucristo ta e unico Ser Supremo.”

Con Emlyn a yega na e conclusion ey? El a haya hopi texto di Bijbel cu ta mustra e diferencia cu tin entre Hesus y su Tata. Ata aki un par di ehempel (Emlyn su comentarionan riba e textonan di Bijbel ta skirbi cu letter schuin):

  •  Juan 17:3: “Bijbel nunca a bisa cu Cristo ta Dios of e unico Dios.” Ta e Tata so Bijbel ta yama “e unico Dios berdadero.”

  •  Juan 5:30: “E Yiu no ta haci su mes boluntad, ma esun di su Tata.”

  •  Juan 5:26: “Ta su Tata a dun’e bida.”

  •  Efesionan 1:3: “Maske hopi biaha Hesucristo ta ser yama e Yiu di Dios, nunca e Tata ta ser yama e Tata di Dios, pero hopi biaha e ta ser yama e Tata di nos Señor Hesus.”

Despues cu Emlyn a analisa tur evidencia, el a bisa cu enfasis: “No tin ni sikiera un texto den e Scritura santo ... for di cua bo por conclui cu e Tata, e Yiu y e Spirito Santo ta uno y e mesun persona.”

KICO NOS POR SIÑA FOR DI EMLYN?

Hopi hende tin miedo di defende loke e Scritura ta siña nos. Pero Emlyn si a defende e berdad cu tin den Bijbel. El a lanta e pregunta: “Si un hende no por papia tocante e berdadnan di mas importante cu el a descubri claramente den e Scritura santo, ta pakico lo e mester les’e y analis’e?” Emlyn no a sconde e berdad.

E ehempel di Emlyn y otronan mester pone nos pensa si nos ta dispuesto pa defende e berdad ora hende ta desprecia nos pa motibo di nos creencia. Nos tambe por puntra nos mes, ‘Cua ta mas importante: e honor y aprobacion di comunidad of defende e berdad cu tin den e Palabra di Dios?’