Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  April 2014

 BIJBEL TA CAMBIA BIDA DI HENDE

Nan A Uza Bijbel pa Contesta Tur Mi Preguntanan

Nan A Uza Bijbel pa Contesta Tur Mi Preguntanan
  • NACI NA AÑA: 1950

  • PAIS NATAL: SPAÑA

  • SU PASADO: SOEUR CATOLICO

MI PASADO:

Tempo mi a nace, mi mayornan tabatin un boerderij chikito den un pueblito na Galicia, den e parti noordwest di Spaña. Nos ta ocho ruman y ami ta esun di cuater. Nos tabatin un bida di famia feliz. Den e tempo ey na Spaña, tabata comun cu por lo menos un yiu di cada famia ta drenta seminario of convento. Den nos famia, tres di nos a haci esey.

Na edad di 13 aña, mi a join mi ruman muher grandi na un convento na Madrid. Eynan e ambiente no tabata dushi. Amistad no tabata existi—solamente regla, oracion y austeridad. Mainta trempan nos tabata bay den kapel pa medita, aunke hopi biaha ami no por a concentra bon. Despues, nos tabata canta cantica religioso y participa den e sacrificio di misa. Como cu tur cos tabata na Latin, mi no tabata compronde casi nada, y mi a sinti cu Dios tabata leu for di mi. Den e convento casi nos no tabatin mag di papia. Hasta ora ami cu mi ruman tabata topa otro, di baina nos por a bisa otro “Ave María purísima.” E soeurnan tabata laga nos papia cu otro solamente pa mei ora despues di come. Ki un gran diferencia for di e bida di famia feliz cu mi tabatin na cas! Hopi biaha mi tabata sinti mi mi so y mi tabata yora hopi.

Aunke nunca mi a sinti cu mi tabatin un bon relacion cu Dios, toch cu 17 aña mi a cumpli cu mi promesa di bira soeur. Eigenlijk, mi tabata djis haci loke nan a spera di mi, pero no a dura mucho cu mi a cuminsa duda si realmente Dios a scoge ami pa haci esaki. E soeurnan tabata bisa cu esnan cu tin e duda ey lo bay fierno. Toch mi a keda duda. Mi sa cu Hesucristo no a isola su mes, mas bien e tabata ocupa cu e trabou di siña hende y yuda nan. (Mateo 4:23-25) Na edad di 20 aña, mi no a mira pakico mi tabatin cu sigui sirbi como soeur. Pa mi sorpresa, e madre superiora a bisa mi cu si mi no ta sigur cu mi kier sigui sirbi como soeur, lo ta mihor pa mi sali mas pronto posibel. Pesey mi a sali for di e convento. Mi ta pensa cu e tabatin miedo cu lo mi influencia e otronan.

 Ora mi a yega cas, mi mayornan a mustra hopi consideracion na mi. Pero como cu no tabatin trabou den nos pueblo, mi a bay biba na Alemania caminda un di mi ruman hombernan tabata biba. E tabata pertenece na un grupo comunista di inmigrante di Spaña. Como cu nan tabata bringa pa derecho di trahador y emancipacion di hende muher, mi tabata sinti mi comodo cu nan. Pesey mi a bira un comunista, y despues mi a casa cu un miembro di e grupo aki. Mi a sinti mi util pasobra mi tabata parti pamfleta comunista y participa den marchanan di protesta.

Sinembargo, cu tempo, mi a bolbe sinti mi decepciona pasobra e comunistanan ey hopi biaha no a practica loke nan a predica. E dudanan ey a bira mas fuerte ora cu na aña 1971 algun miembro hoben di nos grupo a kima e edificio di embahada di Spaña na Frankfurt. Nan a haci esaki pa protesta contra e inhusticia cu tabata tuma luga bou di e gobierno dictatorial di Spaña. Pero ami a haya cu no ta corecto pa expresa rabia di e forma ey.

Ora cu nos prome yiu a nace, mi a bisa mi esposo cu mi ta bay stop di asisti na e reunionnan comunista. Mi tabata sinti mi mi so pasobra ningun di mi amigonan di e grupo comunista ey a bishita ami cu mi baby. Pesey mi a cuminsa puntra mi mes si bida tin proposito. A caso ta bale la pena pa haci esfuerso pa drecha mundo?

BIJBEL A CAMBIA MI BIDA:

Na aña 1976, un pareha casa cu ta testigo di Jehova a bati na nos porta y mi a acepta algun literatura basa riba Bijbel cu nan a ofrece mi. Na e di dos bishita, mi a cuminsa bombardia nan cu pregunta tocante sufrimento, prehuicio y inhusticia. Mi a keda sorprendi cu nan a uza Bijbel pa contesta tur mi preguntanan. Di biaha mi a acepta un estudio di Bijbel.

Na principio mi tabata studia djis pasobra mi tabata siña cosnan nobo. Pero cos a cambia ora ami cu mi esposo a cuminsa asisti na e reunionnan di testigonan di Jehova na Salon di Reino. Na e tempo ey, nos tabatin dos yiu homber. E Testigonan tabata pasa busca nos y tabata yuda nos wak pa e yiunan durante reunion. Mi a cuminsa stima e Testigonan.

Asina mes, ainda mi tabatin algun duda. Mi a dicidi di bishita mi famia na Spaña. Mi omo cu ta un pastoor a purba convence mi pa stop di studia Bijbel. Pero e Testigonan a yuda mi hopi bon. Nan a uza Bijbel pa contesta mi preguntanan, mescos cu e Testigonan na Alemania. Pesey mi a dicidi cu lo mi sigui cu mi estudio di Bijbel ora mi regresa Alemania. Aunke mi esposo a dicidi di stop di studia Bijbel, ami si a sigui studia. Na aña 1978, mi a batisa como un testigo di Jehova.

E BENEFICIONAN:

E conocemento exacto di Bijbel cu mi a haya a duna mi berdadero proposito den bida. Por ehempel, 1 Pedro 3:1-4 ta anima esposanan pa “sea sumiso” na nan esposonan cu “respet profundo” y pa cultiva un “spirito suave ..., loke ta di gran balor den bista di Dios.” E principionan ey a yuda mi bira un bon esposa y mama.

Ya mi tin 35 aña como Testigo. Mi ta sinti mi feliz cu mi ta sirbi Jehova como parti di un berdadero hermandad mundial y cu cuater di mi cinco yiunan tambe ta sirbiele.