Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  April 2014

Bo Por Resisti Tentacion!

Bo Por Resisti Tentacion!

“Mi no tabatin ningun intencion di wak pornografia. Pero mi a subi riba Internet y diripiente un propaganda a aparece. Y mi no sa dicon, pero mi a haya mi ta click riba dje.”—CARLOS. *

“Un mucha muher hopi bunita a cuminsa flirt cu mi na trabou. Un dia el a invita mi pa bay hotel cu ne. Mi tabata sa precies kico e ta busca.”—DAVID.

“AMI por resisti tur cos, pero tentacion si no.” E palabranan aki ta mustra bon cla con algun hende ta mira tentacion, esta, como algo cu nan ta anhela den nan curason. Sinembargo, tin hende ta considera tentacion como un enemigo persistente cu nan realmente kier vence. Kico abo ta pensa di tentacion, bo mester resistie of no?

Claro, no ta tur tentacion ta hinca bo den problema grandi. Por ehempel, si bo come un pida bolo ora bo ta na dieet, probablemente esaki lo no haci bo hopi daño. Pero si bo entrega na otro tipo di tentacion, esaki por ta desastroso specialmente ora ta trata di tentacion cu por hiba na inmoralidad sexual. Bijbel ta spierta nos: “Esun cu comete adulterio ... ta falta comprondemento; esun cu haci esaki ta caba cu su mes.”—Proverbionan 6:32, 33.

Kico bo mester haci si diripiente bo haya bo cu e tentacion pa comete inmoralidad sexual? Bijbel ta contesta: “Esaki ta e boluntad di Dios: pa boso ta santo y pa boso abstene di fornicacion. Cada un di boso mester sa con pa domina su mes curpa den santidad y honor.” (1 Tesalonicensenan 4:3, 4) Con bo por desaroya e willpower ey? Considera tres conseho cu por yuda bo.

Di prome: Tene Cuidou cu Loke Bo Ta Wak

Si nos alimenta nos wowo cu cosnan sensual, esaki sigur lo lanta deseo robes den nos. Hesus a mustra cu tin un conexion entre wak y desea ora el a spierta: “Ken cu sigui wak un muher cu pasion, ya caba a comete adulterio cu ne den su curason.” Y uzando un exageracion, el a conseha: “Awor bon, si bo wowo drechi ta pone bo trompica, sac’e tira afo.” (Mateo 5:28, 29) Ta kico Hesus kier a siña nos? Pa nos resisti tentacion, nos mester ta determina pa actua y no wak cosnan sexualmente provocativo.

Ora bo wak algo sexualmente provocativo, bira bo cara

 Pa ilustra esaki: Imagina cu un hende ta welder y bo bista cay riba e rayonan. Lo bo keda wak e rayonan? Claro cu no! Lo bo bira bo cara of lo bo proteha bo bista. Wel, ta mescos si bo bista cay riba algo erotico, sea imprimi, riba screen of en persona, di biaha bo tin cu bira bo cara. Proteha bo mente pa e no ser contamina. Juan ta un ex-adicto na pornografia. Y el a bisa: “Ora mi mira un muher bunita, hopi biaha mi ta haya gana di keda wak. Pesey mi tin cu forsa mi mes pa wak otro caminda, y mi ta bisa mi mes: ‘Mi tin cu haci oracion na Jehova! Anto awor!’ Ora cu mi caba di haci oracion, e deseo ta cuminsa bay.”—Mateo 6:9, 13; 1 Corintionan 10:13.

Laga nos wak un otro ehempel. E homber fiel Job a bisa: “Mi a sera un pakto ku mi wowonan pa nan no fiha ku deseo riba niun muhé.” (Job 31:1, BPK) Bo no ta haya cu nos tambe mester ta determina pa no cay den tentacion?

Purba esaki: Si bo bista cay riba algo erotico, bira bo cara di biaha. Imita e escritor di Bijbel cu a pidi Dios den oracion: “Kita mi bista for di banidad.”—Salmo 119:37.

Di dos: Tene Cuidou cu Loke Bo Ta Pensa

Como cu nos ta imperfecto, tin biaha nos tin cu lucha contra mal deseo. Bijbel ta bisa: “Cada hende ta ser poni na prueba ora e ser atrai y seduci pa su mes deseo. Anto ora nutri e deseo, e ta duna luz na pica.” (Santiago 1:14, 15) Con bo por evita di cay den e trampa ey cu ta sumamente dificil pa libra di dje?

Ora bo haya bo ta pensa riba cosnan inmoral, haci oracion di biaha

Ora bo haya un mal deseo, corda cu abo tin cu dicidi kico bo ta haci. Lucha contra e mal deseo ey. No alimenta e deseo ey, esta no keda pensa riba fantasia inmoral. Sac’e for di bo mente. Troy, kende tabata adicto na pornografia riba internet, a bisa: “Mi a lucha pa saca mal pensamento for di mi mente door di enfoca riba pensamentonan positivo. No tabata facil. Hopi biaha mi tabata cay bek den e bicio. Pero cu tempo mi a logra controla mi pensamentonan.” Elsa, kende tabata lucha contra e tentacion pa comete inmoralidad sexual ora e tabata teenager, a bisa: “Door di mantene mi mes ocupa y  haci oracion na Jehova, mi a logra controla mi mal pensamentonan.”

Purba esaki: Ora bo haya bo ta pensa riba cosnan inmoral, haci oracion di biaha. Lucha contra mal pensamento door di yena bo mente cu “tur loke ta berdadero, tur loke ta digno di consideracion serio, tur loke ta husto, tur loke ta puro, tur loke ta promove stimacion, tur loke hende ta papia bon di dje, tur loke tin virtud y tur loke ta digno di elogio.”—Filipensenan 4:8.

Di tres: Tene Cuidou cu Loke Bo Ta Haci

Ora un hende haya un mal deseo y na mes momento e hay’e cu un tentacion y e oportunidad pa satisface e deseo, e por cay facilmente den problema. (Proverbionan 7:6-23) Con bo por proteha bo mes?

“Mi ta bay online solamente ora tin otro hende rond di mi”

Bijbel ta duna e conseho sabi aki: “Un hende prudente ta mira maldad y ta sconde, ma e simpelnan ta sigui bay, y ta haya castigo pa esey.” (Proverbionan 22:3) Pues, tene cuidou cu loke bo ta haci. Anticipa situacionnan cu por hinca bo den problema y evita nan. (Proverbionan 7:25) Filipe, kende a vence su adiccion na pornografia, a bisa: “Mi a pone e computer di famia caminda tur hende por mir’e, y mi a instala un software pa blokia cierto informacion indeseabel di Internet. Y mi ta bay online solamente ora tin otro hende rond di mi.” Asina tambe, Troy, kende nos a menciona caba den e articulo aki, a bisa: “Mi ta evita di wak peliculanan sexualmente provocativo y di anda cu hende cu ta papia di un manera vulgar tocante sex. Mi no kier hinca mi mes den problema.”

Purba esaki: Examina honestamente kico ta bo debilidadnan, y pensa di antemano con pa evita situacionnan cu por hinca bo den tentacion.—Mateo 6:13.

NO ENTREGA!

Kico si a pesar di bo maximo esfuerso toch bo cay den tentacion? No desanima y no entrega! Bijbel ta bisa: “Un hende husto ta cay shete bes, y ta lanta atrobe.” (Proverbionan 24:16) Si, nos Tata celestial ta anima nos pa “lanta atrobe.” Abo ta acepta su yudansa amoroso? Si ta asina, no cansa nunca di acerc’e den oracion, y fortalece bo fe mediante un estudio di Bijbel y e reunionnan cristian. Y no lubida Dios su promesa: “Lo mi fortalece bo, si, lo mi yuda bo.”—Isaias 41:10.

Carlos, kende nos a menciona caba den e articulo aki, a bisa: “Mi mester a haci hopi esfuerso pa vence mi bicio di pornografia. Varios biaha mi a cay bek den mi bicio, pero Dios a yuda mi, y finalmente mi a logra venc’e.” David, kende tambe nos a menciona caba, a bisa: “Facilmente lo mi por a tene relacion sexual cu mi colega. Pero, mi a para firme y a bis’e: ‘No!’ Bo ta sinti bo hopi bon ora bo tin un consenshi limpi. Y mas importante ainda, mi sa cu Jehova ta orguyoso di mi.”

Ora bo para firme y resisti tentacion, bo por tin sigur cu Dios ta orguyoso di abo tambe!—Proverbionan 27:11.

^ par. 2 A cambia e nombernan den e articulo aki.