Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  March 2014

 STORIA DI BIDA

Mi Ta Haya Fortaleza, Aunke Mi Ta Debil

Mi Ta Haya Fortaleza, Aunke Mi Ta Debil

Ken cu mira mi lo pensa cu mi no ta fuerte ya cu mi ta den un rolstoel, y mi ta pisa solamente 29 kilo (65 liber). Pero segun cu mi curpa ta bira mas y mas debil, mi ta sigui haya fortaleza. Laga mi conta ki efecto esaki tabatin riba mi bida.

Tempo mi tabatin cuater aña

Ora mi pensa riba mi niñez, mi ta corda e tempo dushi cu mi a pasa cu mi mayornan. Nos tabata biba na un cas den cunucu den e parti zuid di Francia. Mi tata a traha un schommel pa mi, y mi tabata gusta core rond den hardin. Na 1966, testigonan di Jehova a bin nos cas, y nan tabatin un combersacion largo cu mi tata. Despues di shete luna, el a dicidi di bira un Testigo. No a dura hopi cu mi mama tambe a bira Testigo, y nan a lanta mi den un ambiente di hopi amor y cariño.

Mi problemanan a cuminsa un poco despues cu nos a bay biba na Spaña, caminda mi mayornan a nace. Mi a cuminsa sinti dolor fuerte na mi mannan y na mi enkelnan. Nos a bay hopi dokter, y despues di dos aña nos a bin haya un specialista di reumatismo, kende a bisa tur preocupa: “Nos no por haci mucho cos mas.” Mi mama a cuminsa yora. E dokter a bisa mi mayornan cu mi tin artritis cronico y cu mi sistema inmunologico ta ataca y destrui tehido saludabel di mi curpa, y como consecuencia mi jointnan ta hincha y mi ta haya hopi dolor. Como un mucha di dies aña mi no a compronde mucho bon loke el a bisa, pero loke si mi a compronde ta cu mi tabatin algo hopi malo.

E dokter a sugeri pa mi bay un sanatorio di mucha pa haya tratamento. Ora mi a yega na e edificio straño ey, mi a sinti hopi miedo. Eynan tabatin regla hopi estricto. E soeurnan a corta mi cabey y bisti mi un uniform mahos. Cu awa na wowo, mi a pensa: ‘Con lo mi por sobrevivi den e luga aki?’

MI A SINTI CON JEHOVA TABATA CUIDA MI

Como cu mi mayornan a siña mi sirbi Jehova, mi a nenga di participa den e ritonan catolico den e sanatorio. E soeurnan no por a compronde dicon mi a nenga di participa. Mi a roga Jehova pa no bandona mi, y no a dura hopi cu mi a sinti comosifuera Jehova su brasa tabata proteha mi mescos cu e brasa di un tata amoroso ta proteha su yiu.

Mi mayornan tabatin mag di bishita mi un rato so riba diasabra. Pa mi fortalece mi fe, nan tabata trece publicacionnan basa riba Bijbel pa mi lesa. Normalmente, mucha no tabatin mag di tin nan  propio bukinan, pero e soeurnan a laga mi keda cu e publicacionnan y cu mi Bijbel; mi tabata les’e tur dia. Ademas, mi tabata papia cu e otro mucha muhernan tocante mi speransa di biba pa semper den Paradijs riba Tera, caminda ningun hende lo bira malo. (Revelacion 21:3, 4) A pesar cu tin biaha mi tabata sinti mi tristo y mi so, mi tabata contento cu mi fe y confianza den Jehova tabata bira mas y mas fuerte.

Despues di seis luna largo, e dokternan a laga mi bay cas. Mi salud no a mehora, pero mi tabata contento cu mi tabata cerca mi mayornan atrobe. Mi jointnan tabata sigui deforma, y mi tabata haya mas dolor. Ora mi a bira teenager, mi tabata hopi zwak. Pero toch mi a batisa na edad di 14 aña, y mi tabata determina pa sirbi mi Tata celestial lo mihor posibel. Sinembargo, tin biaha mi tabata sinti cu Dios a decepciona mi. Ora mi tabata haci oracion, mi tabata puntra Dios: “Dicon ta net ami? Por fabor cura mi. Bo no ta mira cuanto mi ta sufri?”

E temporada di adolescencia tabata hopi dificil pa mi. Mi mester a acepta cu mi salud lo no mehora, pero mi tabata compara mi mes cu mi amiganan cu tabata bon di salud y yen di bida. Pesey mi tabata sinti mi inferior y a cuminsa aleha mi mes for di otro hende. Sinembargo, mi famia y amigonan tabata yuda mi. Mi tin grato recuerdo di Alicia. El a bira un bon amiga di mi aunke e ta 20 aña mas grandi cu mi. El a yuda mi pa mi no keda enfoca riba mi maleza, sino pa mi mustra interes den otro hende.

LOKE A YUDA MI HAYA MAS SATISFACCION DEN BIDA

Ora mi tabatin 18 aña, mi a sufri un recaida severo, y hasta ora mi tabata asisti na e reunionnan cristian, mi tabata keda morto cansa. A pesar di esey, mi a haci bon uzo di tur e tempo cu mi tabatin na cas pa studia Bijbel mas profundo. E buki di Job y e Salmonan a yuda mi compronde cu no ta tur ora Jehova Dios ta proteha nos di daño fisico, pero den e sentido spiritual si e ta percura pa nos haya e animacion y consuelo cu nos tin mester. Mi tabata haci hopi oracion, y como resultado mi a haya “e poder cu ta surpasa esun di hende” y “e paz di Dios cu ta surpasa tur comprondemento.”—2 Corintionan 4:7; Filipensenan 4:6, 7.

Na edad di 22 aña, mi mester a cuminsa uza rolstoel, locual no tabata facil pa mi acepta. Mi tabatin miedo cu hende ta cuminsa wak mi como e pobercito muher enfermo riba rolstoel en bes di mira ken mi ta realmente. Sinembargo, e rolstoel a yuda mi depende menos di otro hende, y loke cu ami a pensa lo tabata un maldicion a bira un bendicion. Un amiga di mi cu yama Isabel a anima mi pa pone meta pa traha 60 ora den e trabou di predica hunto cu ne pa un luna.

Na prome instante mi a haya e idea ey absurdo. Pero mi a pidi Jehova pa yuda mi, y cu sosten di mi famia y amigonan, mi a logra. E luna druk ey a pasa lihe, y mi a logra vence mi miedo y mi no ta sinti berguensa mas. Mi a disfruta asina tanto di e trabou di predica cu na 1996 mi a dicidi di bira pionero regular (un persona cu tabata dedica 90 ora tur luna den e trabou di predica). Esey tabata un di e mihor decisionnan cu mi a yega di tuma ya cu mi a hala mas cerca di Dios y esaki hasta tabatin un bon efecto riba mi salud. E trabou di predica a yuda mi comparti mi fe cu hopi hende, y mi a logra yuda algun di nan bira amigo di Dios.

JEHOVA A SIGUI DUNA MI FORTALEZA

Den zomer di 2001, mi a haya un accidente di auto, y mi a kibra tur dos pia. Ora mi tabata den hospital, mi tabatin hopi dolor. Pesey mi a pidi Dios den silencio: “Por fabor Jehova, no bandona mi!” Di biaha, un señora cu tabata drumi riba un cama banda di mi a puntra mi: “Bo ta un testigo di Jehova?” Mi no tabatin forsa pa contest’e, pesey mi a djis sacudi mi cabes. Anto el a bisa mi: “Mi sa ken boso ta! Tur ora mi ta lesa boso revistanan.” E palabranan ey tabata un gran animacion pa mi. Hasta den e condicion lamentabel ey, mi ehempel a yuda cu otro hende por a haya un bon testimonio tocante Jehova. Esta un honor!

Ora mi salud a cuminsa mehora, mi a dicidi di predica un poco mas. Cu mi dos pianan den gips, mi mama tabata hiba mi riba rolstoel cerca e hendenan den hospital. Tur dia, nos tabata bishita algun  pashent, puntra nan con ta bay y laga literatura basa riba Bijbel cu nan. Ora nos caba, mi tabata keda na werki, pero Jehova a duna mi e forsa necesario.

Ami cu mi mayornan na 2003

Durante e ultimo añanan, mi dolor a intensifica y loke a haci e asunto mas duro ainda ta cu mi tata a fayece. A pesar di tur cos, mi ta purba keda positivo. Kico ta yuda mi? Ki ora cu ta posibel, mi ta purba di ta den compania di famia y amigonan, esey ta yuda mi pa no pensa riba mi problemanan. Y ora mi ta mi so, mi ta lesa, studia Bijbel of predica via telefon.

Hopi biaha mi ta cera mi wowo pa imagina con bida lo ta den e mundo nobo cu Dios a priminti

Ademas, mi ta purba disfruta di cosnan chikito, manera entre otro di e brisa cu ta pasa caricia mi cara of di e holo dushi di flornan. E cosnan aki ta duna mi motibo pa ta agradecido na Dios. Un otro cos cu ta yuda mi ta un bon sentido di humor. Por ehempel, un dia ora nos tabata predica, mi amiga, kende tabata pusha mi rolstoel, dado momento a para un rato pa skirbi algo. Nos tabata na un bahada y diripiente e rolstoel a cuminsa core bay abou, y mi a dal den un auto cu tabata staciona. Na prome instante, nos tur dos a spanta, pero ora nos a mira cu nada malo no a pasa, nos a hari bariga yen.

Tin hopi cos den bida cu mi no por haci. Pa ami e cosnan aki lo bira realidad den futuro. Hopi biaha mi ta cera mi wowo pa imagina con bida lo ta den e mundo nobo cu Dios a priminti. (2 Pedro 3:13) Mi ta imagina con mi ta cana rond bon di salud y ta disfruta plenamente di bida. Y loke a haci un impacto riba mi ta e palabranan di Rey David: “Spera riba SEÑOR; sea fuerte y e lo fortalece bo curason.” (Salmo 27:14) Maske mi curpa ta birando mas y mas debil, Jehova ta fortalece mi. Si, mi ta sigui haya fortaleza a pesar di mi debilidad.