Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  February 2014

 TOPICO PRINCIPAL | E GUERA CU A CAMBIA MUNDO

E Berdadero Causante di Guera y Sufrimento

E Berdadero Causante di Guera y Sufrimento

Prome Guera Mundial a termina dia 11 di november 1918. Negoshinan a keda cera y tabatin fiesta riba caya. Pero e euforia no a dura mucho. Un otro tragedia, cu a causa mas tanto morto cu arma di guera mes, a sigui un poco despues di e guera mundial.

Na juni 1918, e soldaatnan na Francia a pega cu un maleza cu yama grip Spaño. E maleza aki a resulta di ta mortal. Por ehempel, denter di algun luna, e maleza aki a mata mas tanto soldaat Mericano na Francia cu esnan cu a muri den bataya. Despues di e guera, esnan infecta cu e grip a bay nan pais bek, y asina e grip a plama rond mundo.

E añanan despues di guera tabata marca tambe pa hamber y miseria economico. Na momento cu guera a termina na 1918, hopi hende na Europa tabata muriendo di hamber. Na 1923, e moneda Aleman a perde casi tur su balor. Seis aña despues, economia mundial a cay den otro. Finalmente, na 1939 Segundo Guera Mundial a dal aden; den cierto sentido e tabata un continuacion di e prome conflicto mundial. Kico tabatin tras di e serie di suceso desastroso aki?

E SEÑAL DI E ULTIMO DIANAN

Profecianan di Bijbel ta yuda nos compronde e berdadero nificacion di sucesonan historico, y esaki ta conta specialmente pa Prome Guera Mundial. Hesucristo a profetisa di un tempo cu ‘nacion lo lanta contra nacion’ y cu lo tin pest y scarsedad di cuminda rond mundo. (Mateo 24:3, 7; Lucas 21:10, 11) El a bisa su discipelnan cu e calamidadnan  aki hunto lo forma e señal di e ultimo dianan. E buki di Revelacion ta duna mas detaye y ta relaciona e “ay” riba tera cu un guera cu a tuma luga den cielo.—Wak e cuadro  “Guera Riba Tera y Guera den Cielo.”

E mesun buki di Bijbel aki ta describi cuater coredo di cabay. Tres di e cuater coredonan di cabay aki ta simbolisa e mesun desasternan cu Hesus a papia di dje mas prome, esta, guera, hamber y pest. (Wak e cuadro  “Di Berdad e Cuater Coredonan di Cabay Ta Coriendo?”) No tin duda cu Prome Guera Mundial tabata comienso di un era di sufrimento cu a sigui te den nos tempo. Y Bijbel ta mustra cu Satanas ta esun cu, na moda di papia, a los e prome tiro. (1 Juan 5:19) Lo yega un fin na su poder un dia?

E buki di Revelacion ta sigura nos tambe cu a keda Satanas “masha poco tempo.” (Revelacion 12:12) Ta pesey e ta yen di rabia y ta causa asina tanto angustia aki riba tera. E problemanan cu nos ta mira anto ta indica cu Satanas su tempo ta cerca di caba.

 PRONTO E OBRANAN DI DIABEL LO CABA NA NADA

Prome Guera Mundial tabata un suceso cu a cambia rumbo di historia. E tabata comienso di un era di guera, revolucion y tambe desconfianza den lidernan humano. Tambe e ta duna prueba palpabel cu Satanas a ser saca for di cielo. (Revelacion 12:9) E gobernante invisibel di e mundo aki a reacciona manera un dictador malbado cu sa cu su dianan ta conta. Ora su dianan yega na nan fin, e problemanan cu Prome Guera Mundial a ocasiona tambe lo yega na nan fin.

Profecianan di Bijbel ta sigura nos cu pronto Hesucristo, nos Rey celestial, lo “destrui e obranan di Diabel.” (1 Juan 3:8) Rond mundo, miyones di hende ta resa pa e Reino di Dios bin. Abo tambe ta pidi esey? Mediante e Reino ey, porfin hende fiel lo mira Dios su boluntad, no di Satanas, sosode riba tera. (Mateo 6:9, 10) Bou di Dios su Reino nunca mas lo tin un guera mundial, ni niun otro guera! (Salmo 46:9) Nos ta anima bo pa siña mas tocante e Reino ey, y asina biba den un mundo caminda pa semper lo tin paz!—Isaias 9:6, 7.