Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  February 2014

Bo Tabata Sa?

Bo Tabata Sa?

Kico ta e aloe cu Bijbel ta papia di dje?

Nan tabata saca aloe for di e palo di aguila

Nan tabata uza e aloe cu Bijbel ta papia di dje pa perfuma paña y cama. (Salmo 45:8; Proverbionan 7:17; Cantica di Salomon 4:14) E tabata bin di un palo cu nan sa yama palo di aguila (di e sorto Aquilaria). Segun cu e palo ta seca caba na nada, e ta saca un azeta y un lijm cu ta hole dushi. Nan tabata mula e palo hacie puiro, y esaki nan tabata bende como “aloe.” *

Bijbel ta compara e tentnan di Israel cu “aloe cu SEÑOR a planta.” (Numbernan 24:5, 6) Esaki kisas ta referi na e forma di e palo di aguila, cu ta haya taki hancho y cu por yega na un haltura di 30 meter. E palo aki no ta crece den Israel di awe, pero segun A Dictionary of the Bible, “no ta nada straño cu e tempo ey nan tabata cultiva e palonan aki y otronan, cu awor no ta existi mas [den e region ey], den e vaye prospero y pobla di Jordan.”

Ki sorto di ofrenda tabata aceptabel den e tempel di Jerusalem?

E Seyo di klei aki cu a bin for di e tempel di Jerusalem tin mas o menos 2.000 aña

Segun e Ley di Dios, tur e sacrificionan cu e Hudiunan tabata ofrece den e tempel mester tabata di e mihor calidad posibel. Dios lo no a keda contento cu sacrificionan cu tabatin defecto. (Exodo 23:19; Levitico 22:21-24) Segun Filo, un escritor Hudiu di prome siglo, e sacerdotenan tabata inspecciona e bestianan “di cabes te pia” pa haci sigur cu nan tabata completamente sano y “sin ningun mancha of defecto.”

Segun e academico E. P. Sanders, kisas e oficialnan di tempel “tabata autorisa bendedonan confiabel di bestia y parha pa bende solamente esnan cu e sacerdotenan a inspecciona anteriormente. Si esey tabata e caso, e bendedo lo mester a duna esun cu a cumpra e bestia un comprobante di cu e bestia tabata sin defecto.”

Esey ta precies loke arkeologonan a descubri na 2011 den bisindario di e tempel: un comprobante den forma di un seyo di klei. E ta mes grandi cu un moneda y ta data di entre siglo un prome cu Cristo y aña 70 despues di Cristo. E tin dos palabra Arameo graba riba dje cu algun arkeologo a traduci como “Puro pa Dios.” Probablemente e oficialnan di tempel tabata pega un comprobante asina na producto of bestia cu nan tabata uza pa sacrificio.

^ par. 3 E palabra “aloe” cu Bijbel ta menciona no ta referi na e mata cu nos conoce (Aloe vera).