Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2014

Resureccion—Speransa pa e Mortonan

Resureccion—Speransa pa e Mortonan

Abo ta kere den loke Bijbel ta priminti tocante resureccion? * E idea di bolbe mira nos sernan keri cu a muri ta zona masha bunita, pero e ta algo realistico? Pa yuda nos contesta e pregunta ey, ta bon pa nos analisa e ehempel di e apostelnan di Hesucristo.

E apostelnan a kere firmemente den resureccion. Dicon? Wel pa por lo menos dos motibo. Pa di prome, nan speransa tabata basa riba e echo cu Dios a lanta Hesus for di morto. E apostelnan, y “mas cu 500 ruman pareu”, a mira Hesus despues cu el a resucita. (1 Corintionan 15:6) Ademas, manera e cuater Evangelionan ta mustra, e resureccion di Hesus tabata bon conoci y acepta tur caminda.—Mateo 27:62–28:20; Marco 16:1-8; Lucas 24:1-53; Juan 20:1–21:25.

Di dos, e apostelnan a mira Hesus efectua por lo menos tres resureccion—un na Nain, un na Capernaum y un na Betania. (Lucas 7:11-17; 8:49-56; Juan 11:1-44) E ultimo ey, esun na Betania, cu nos a menciona na cuminsamento di e revista aki, tabata di un miembro di un famia cu tabata hopi pega cu Hesus. Pues, ban sigui wak kico a pasa.

“AMI TA E RESURECCION”

“Bo ruman lo lanta for di morto.” Ora Hesus a bisa Marta e palabranan ey, Lazaro, ruman di Marta, tabatin cuater dia morto. Na prome instante Marta no a compronde kico Hesus tabata kiermen. Pesey el a bisa Hesus: “Mi sa cu lo e lanta”, pensando cu esey lo tuma luga den futuro. Hesus a bis’e: “Ami ta e resureccion y e bida”, anto caba el a resucita Lazaro. Imagina con sorprendi Marta lo a keda.—Juan 11:23-25.

Unda Lazaro tabata durante e cuater dianan cu e tabata morto? E no a bisa ni duna e impresion cu e tabata na un otro luga durante e tempo ey. Lazaro no tabatin un alma inmortal cu a bay cielo. Hesus tampoco no a hal’e for di e presencia di Dios y trec’e bek na tera. Pues, ta na unda e tabata anto? Drumi den su graf.—Eclesiastes 9:5, 10.

 Corda, Hesus a compara morto cu un soño cu hende ta lanta for di dje ora e resucita. Segun e relato, el a bisa: “‘Nos amigo Lazaro ta drumi, pero mi ta bay eynan pa lant’e.’ Anto su discipelnan a bis’e: ‘Señor, si ta drumi e ta, lo e bira bon.’ Hesus tabata papia di Lazaro su morto, ma nan a kere cu e tabata kiermen cu Lazaro tabata gewoon na soño. Pesey, Hesus a bisa nan francamente: ‘Lazaro a muri.’” (Juan 11:11-14) Hesus a lanta Lazaro for di morto y entreg’e na su rumannan. Esta un bunita regalo Hesus a duna e famia ey!

E resureccionnan cu Hesus a haci tempo e tabata riba tera ta djis un demostracion chikito di loke e lo haci den futuro como Rey di e Reino di Dios. * Durante e tempo cu Hesus lo goberna e tera, e lo lanta e hendenan cu ta drumi den graf. Ta pesey el a bisa: “Ami ta e resureccion.” Purba di imagina con feliz lo bo ta ora bo mira bo sernan keri atrobe y con contento esnan resucita lo ta!—Lucas 8:56.

Purba di imagina con feliz lo bo ta ora bo mira bo sernan keri atrobe!

FE CU TA DUNA BIDA ETERNO

Hesus a bisa Marta: “Esun cu pone fe den mi, maske e muri, lo bolbe biba; y tur cu ta bibo y cu pone fe den mi, lo no muri nunca.” (Juan 11:25, 26) Esnan cu Hesus resucita durante su gobernacion di mil aña tin chens di biba pa semper, basta nan pone fe den Hesus.

“Esun cu pone fe den mi, maske e muri, lo bolbe biba.”Juan 11:25

Despues di bisa e cosnan remarcabel ey tocante resureccion, Hesus a bira puntra Marta: “‘Abo ta kere esaki?’ Marta a contest’e: ‘Si, Señor; mi ta kere cu abo ta Cristo, e Yiu di Dios, Esun cu mester a bin na mundo.’” (Juan 11:26, 27) Kico di abo? Lo bo kier tin e mesun fe cu Marta tabatin den resureccion? E prome paso cu bo tin cu dal ta di siña conoce kico ta Dios su proposito pa humanidad. (Juan 17:3; 1 Timoteo 2:4) E conocemento ey lo duna bo fe. Pakico no pidi un testigo di Jehova mustra bo kico Bijbel ta siña tocante e topico ey? Gustosamente lo e splica bo e bunita speransa di resureccion.

^ par. 2 Wak e articulo “Morto No Ta Fin di Tur Cos!” na pagina 6 di e edicion aki.

^ par. 9 Pa mas informacion tocante loke Bijbel ta priminti di e resureccion den futuro, wak capitulo 7 di e buki Kico Bijbel Ta Siña Realmente? publica pa testigonan di Jehova.