Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2014

 UN COMBERSACION INTERESANTE TOCANTE BIJBEL

Dicon Dios Ta Permiti Sufrimento?

Dicon Dios Ta Permiti Sufrimento?

Pa bo haya un idea con testigonan di Jehova ta combersa cu hende, tuma nota di e siguiente dialogo. Imagina cu Marlen, un testigo di Jehova, ta bishita Señora Sonia.

CON DIOS TA SINTI ORA E MIRA NOS SUFRI?

Marlen: Sonia, con ta? Mi ta contento cu nos por a topa atrobe.

Sonia: Mi tambe.

Marlen: Ultimo biaha cu mi a pasa, nos a papia tocante con Dios ta sinti ora e mira nos sufri. * Bo a menciona cu esey ta un pregunta cu bo tabata haci bo mes pa hopi tempo, vooral despues cu bo mama a haya un accidente di auto. Den tur esey, con a sigui cu ne?

Sonia: E ta bay basta bon bo sa. Tin dia ta mas mihor cu otro. Awe e ta basta bon si.

Marlen: Mi ta contento di tende esey. Mi por imagina cu no ta facil pa trata cu un situacion asina.

Sonia: No, e no ta facil. Tin biaha mi ta puntra mi mes cuanto mas e por wanta.

Marlen: Loke bo ta sinti ta algo normal. Biaha pasa, ora nos a caba di papia, m’a puntra bo si bo sa dicon Dios ta permiti sufrimento si e tin poder pa caba cu ne.

Sonia: Si, mi ta corda.

Marlen: Pero prome cu nos wak kico Bijbel ta bisa, laga nos repasa un par di punto cu nos a papia biaha pasa.

Sonia: Ta bon.

Marlen: Nos a lesa den Bijbel di un homber fiel cu a puntra dicon Dios ta permiti sufrimento. Dios no a scual e pa loke el a puntra ni e no a bis’e cu e mester tin mas fe.

Sonia: Esey tabata algo nobo pa mi.

Marlen: Tambe nos a siña cu Jehova no gusta mira nos sufri. Por ehempel, Bijbel ta bisa cu ora e pueblo di Dios tabata pasa den dificultad, “e tabata afligi.” * No ta un consuelo pa sa cu Dios ta sinti duele ora e mira nos sufri?

Sonia: Claro cu si.

Marlen: Na final nos a comproba cuanto poder nos Creador tin, y cu e por caba cu sufrimento na cualkier momento cu e ta desea.

Sonia: Ta e parti ey mi no por caba di compronde. Dicon Dios ta laga tur e cosnan malo aki pasa mientras e tin poder pa caba cu nan?

KEN TABATA PAPIA E BERDAD?

Marlen: Nos por haya e contesta pa e pregunta ey den Bijbel na e buki di Genesis. Bo ta corda e relato di Adam cu Eva y e fruta prohibi?

Sonia: Si, fo’i mucha mi conoce e relato ey. Dios a bisa nan pa no come di un cierto palo, pero nan a come di dje toch.

 Marlen: Esey ta berdad. Pero laga nos wak un rato kico ta e cosnan cu a pone Adam cu Eva peca. Esakinan tin hopi di haber cu e motibo dicon nos ta sufri. Bo por lesa Genesis capitulo 3, versiculo 1 te 5?

Sonia: Oke. “Awor e colebra tabata mas astuto cu tur otro bestia di sabana cu SEÑOR Dios a traha. El a bisa e muher: ‘Di berdad Dios a bisa: “Bo no mag come di ningun palo di e hofi”?’ Y e muher a bisa e colebra: ‘Di fruta di e palonan di e hofi nos por come, ma di fruta di e palo cu ta keda meymey di e hofi, Dios a bisa: “Boso no mester come di dje ni mishi cu ne, pa boso no muri.”’ Y e colebra a bisa e muher: ‘Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.’”

Marlen: Danki. Laga nos analisa e versiculonan aki un rato. Prome, ripara cu ta un colebra a papia cu Eva. Un otro buki den Bijbel ta mustra cu realmente ta Satanas e Diabel a uza e colebra pa papia cu Eva. * Satanas a puntra Eva encuanto e mandamento cu Dios a duna pa no come di un cierto palo. Bo a ripara kico Dios a bisa lo a pasa si Adam cu Eva a come di e palo?

Sonia: Nan lo a muri.

Marlen: Exactamente. Anto, despues di esey Satanas a acusa Dios di un cos masha serio mes. Wak kico el a bisa: “Siguramente boso lo no muri!” Cu otro palabra, Satanas a yama Dios un gañado.

Sonia: Mi no tabata sa esey.

Marlen: Ora Satanas a yama Dios un gañado, el a lanta un cuestion cu a tuma tempo pa resolve. Bo sa ta dicon?

Sonia: Mmm. Pa bisa bo francamente, no.

Marlen: Wel, kisas mi por splica bo asin’aki. Laga nos bisa cu un dia mi ta yega cerca bo anto bisa bo cu mi tin mas forsa cu bo. Con bo por proba cu no ta asina?

Sonia: Wel, nos lo tin cu wak ken tin mas forsa, mi ta supone.

Marlen: Corecto. Talbes nos lo scoge un obheto pisa anto wak cua di nos por his’e. Pues ta facil pa proba ken tin mas forsa.

Sonia: M’a compronde kico bo kiermen.

Marlen: Pero kico si na luga di esey, mi bisa cu bo ta deshonesto? Esey si ta dificil pa proba mesora, no ta berdad?

Sonia: Mi ta kere cu si.

Marlen: En realidad, bo no por midi honestidad cu un competencia.

Sonia: Berdad. Bo tin rason.

Marlen: Si bo wak bon, e unico manera pa proba e asunto aki ta di laga tempo pasa pa hende wak si bo ta honesto of no.

Sonia: Esey ta logico.

Marlen: Awor, wak e relato cu nos a lesa den Genesis atrobe. Satanas a bisa cu e tin mas forsa cu Dios?

Sonia: No.

Marlen: Pasobra si ta asina, lo tabata facil pa Dios proba cu Satanas ta robes, no ta berdad? Pero en bes di esey, Satanas a insinua cu Dios ta deshonesto. En realidad, el a bisa Eva: ‘Ta gaña Dios ta gaña bo. Pero ami ta bisa bo e berdad.’

Sonia: Interesante.

Marlen: Pero Jehova ta un Dios sabi, y el a mira cu e mihor manera pa resolve e acusacion aki ta di laga tempo pasa. Cu tempo lo a bira bisto cua di nan dos tabata papia e berdad.

UN CUESTION IMPORTANTE

Sonia: Pero ora Eva a muri, esey no a proba cu Dios tabata papia e berdad?

Marlen: Bo por bisa cu si. Pero, Satanas a cuestiona mas cos. Wak versiculo 5 atrobe. Kico mas el a bisa Eva?

 Sonia: Cu si e come di e palo su wowo lo habri.

Marlen: Si, y cu Eva lo bira “manera Dios, conociendo bon y malo.” Pues na un manera astuto Satanas a bisa cu Dios tabata sconde algo bon pa hende.

Sonia: M’a compronde.

Marlen: Anto esey tambe tabata un acusacion serio.

Sonia: Con asina?

Marlen: Wel, Satanas a bisa cu sin e guia di Dios cos lo bay hopi mas mihor pa Eva y den un sentido pa tur hende. Jehova tabata sa cu den e caso aki tambe e mihor cos tabata pa laga Satanas proba su punto. Pues el a permiti Satanas goberna nos planeta pa un tempo. Esey ta e motibo dicon nos ta mira asina tanto sufrimento rond di nos. Esun cu ta goberna mundo ta Satanas, no Dios. * Pero mi tin un bon noticia pa bo.

Sonia: Si?

Marlen: Bijbel ta siña nos dos cos masha bunita tocante Dios. Prome, Jehova ta preocupa pa nos ora nos ta sufri. Por ehempel, wak e palabranan di Rey David, skirbi na Salmo 31:7. Den su bida David a pasa den hopi sufrimento, pero wak kico el a bisa den su oracion na Dios. Bo por les’e pa mi por fabor?

Sonia: Ta bon. E ta bisa: “Lo mi regociha y keda contento den bo misericordia, pasobra bo a mira mi afliccion; bo tabata sa di e angustianan di mi alma.”

Marlen: Pues aunke David a sufri, tabata un consuelo p’e sa cu Jehova a mira tur loke el a pasa aden. Sonia, bo no ta haya cu ta un consuelo pa sa cu Jehova ta consciente di tur loke nos ta pasa aden, hasta di nos dolornan emocional di mas profundo cu kisas otro hende no ta compronde?

Sonia: Claro!

Marlen: Di dos, Bijbel ta bisa nos cu Dios lo no permiti pa nos keda sufri pa semper. E ta mustra cu pronto Dios lo caba cu Satanas su mal gobernacion. Anto lo e elimina tur e mal cosnan cu a pasa, hasta e cosnan cu abo y bo mama a pasa aden. Mi por pasa otro siman y mustra bo dicon nos por tin sigur cu pronto Dios lo caba cu tur sufrimento? *

Sonia: Esey ta un bon idea.

Tin un topico di Bijbel en particular cu bo tin gana di sa mas di dje? Bo ta interesa pa sa mas di e creencianan y practicanan religioso di testigonan di Jehova? Si esey ta e caso, no duda pa bisa un testigo di Jehova esey. Lo e ta contento pa considera eseynan cu bo.

^ par. 7 Wak e articulo “Un Combersacion Interesante Tocante Bijbel” den e edicion di 1 di juli 2013. Tambe e ta disponibel na www.jw.org/en.

^ par. 17 Wak Isaias 63:9.

^ par. 26 Wak Revelacion 12:9.

^ par. 55 Wak Juan 12:31; 1 Juan 5:19.

^ par. 61 Pa mas informacion, wak capitulo 9 di e buki Kico Bijbel Ta Siña Realmente? publica pa testigonan di Jehova.

Mas Informacion

Kico Bijbel Ta Siña Realmente?

Nos Ta Bibando den “e Ultimo Dianan”?

Analisa con e actitud y conducta di e hendenan rond di nos ta duna prueba cu nos ta bibando den “e ultimo dianan” cu Bijbel a predeci.