Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2014

Bo Tabata Sa?

Bo Tabata Sa?

Con hende tabata haci contribucion na e tempel den tempo di Hesus?

E cahanan di placa tabata den e Plenchi di Hende Muher. E buki The Temple—Its Ministry and Services ta splica: “Rond di e plenchi tabatin un gang tur na pilar, y parti paden, contra di e muraya tabatin diestres caha of ‘trompet’ [caminda] tabata tira contribucion.”

Nan tabata yama e cahanan trompet debi cu nan tabata smal ariba anto hancho abou. Riba cada caha tabata indica e tipo di ofrenda pa hende por a sa den cua di e cahanan nan mester tira e placa. Pesey, e cen colecta for di cada caha tabatin su uzo specifico. Hesus tabata den e Plenchi di Hende Muher ora el a mira con hende, incluso un viuda den necesidad, tabata tira contribucion.—Lucas 21:1, 2.

Caha 1 cu 2 tabata pa e belasting di tempel di e aña coriente y esun anterior. Caha 3 te cu 7 respectivamente tabata pa cubri costo di tortelduif, paloma, palo, sencia y e scalchinan di oro. Si un hende a resta cen despues di contribui pa su sacrificio, e por a tira e resto di cen den un otro caha. Caha 8 tabata reserva pa cen cu a resta di ofrenda pa pica. Den caha 9 te cu 12 por a tira cen cu a resta di ofrenda pa culpa, ofrenda di parha, di Nazareonan y di hende leproso cu a cura. Anto caha 13 tabata pa contribucion boluntario.

Lucas tabata un historiador confiabel?

Lucas a skirbi dos buki di Bijbel: e Evangelio di Lucas y Echonan di e Apostelnan. El a bisa cu el a “investiga tur cos for di principio cu exactitud”, pero algun experto di Bijbel ta cuestiona su relatonan. (Lucas 1:3) Ken nos tin cu kere awor?

E datonan historico cu Lucas a skirbi di dje ta cosnan cu por ser comproba. Por ehempel, ora el a referi na e oficialnan publico Romano, el a uza varios titulo cu tabata existi den e idioma original. Awendia a traduci e titulonan ey como funcionario civil di Filipo, gobernante di Tesalonica y organisado di fiesta di Efeso. (Echonan 16:20; 17:6; 19:31) Tambe Lucas a menciona cu Herodes Antipas tabata gobernante di districto y cu Sergio Paulo tabata proconsul di Chipre.—Echonan 13:1, 7.

Lucas su uzo corecto di titulo ta remarcabel pasobra ora e status politico di un teritorio Romano a cambia, e titulo di su gobernantenan tambe tabata cambia. Bruce Metzger, un experto biblico, a bisa: “Cada bes e referencianan den e buki di Echonan ta cuadra cu e luga y tempo cu e relato ta papia di dje.” E arkeologo William Ramsay a yama Lucas “un historiador di primera clase.”