Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  December 2013

 HALA CERCA DIOS

“Tende! Mi Ta Traha Tur Cos Nobo”

“Tende! Mi Ta Traha Tur Cos Nobo”

Abo ta desea di por tin un bon salud y un bida largo, tanto pa bo mes como pa bo famia? Bo ta anhela pa biba den un mundo caminda no tin dolor, sufrimento y morto? Esaki no ta djis un soño. Al contrario, Jehova a priminti cu esey lo bira realidad pasobra pronto lo e trece un husto mundo nobo. Wak con e promesa aki lo cumpli segun Revelacion 21:3-5.—Les’e.

[Dios] lo ... seca tur lagrima for di nan wowo.” (Revelacion 21:4) Ki sorto di lagrima lo e seca? No ta lagrima di alegria, ni lagrima cu ta proteha nos wowo. Mas bien, Dios ta priminti di kita tur lagrima di dolor y tristeza. Lo e no kita e lagrimanan aki so; lo e kita tambe e dolor y sufrimento cu ta causa e lagrimanan aki.

“Lo no tin morto mas.” (Revelacion 21:4) Acaso tin algo cu a causa mas tanto lagrima cu morto, nos enemigo? Jehova lo libra hende obediente for di e gara di morto. Con? Door di elimina e berdadero causa di morto: e pica cu nos a hereda for di Adam. (Romanonan 5:12) A base di e sacrificio di rescate di Hesus, Jehova lo haci hende obediente perfecto. * Esey lo “caba” cu morto, e ultimo enemigo. (1 Corintionan 15:26) E ora ey hende fiel lo por biba pa semper den salud perfecto—manera tabata Dios su proposito.

“Ni dolor lo no tin mas.” (Revelacion 21:4) Ki sorto di dolor lo no tin mas? Tur dolor fisico, mental y emocional cu pica y imperfeccion a produci, y cu a pone miyones y miyones di hende sufri, lo disparce.

Pronto un mundo sin lagrima, morto y dolor lo bira realidad. Kisas bo ta puntra bo mes: ‘Pero unda esaki lo sosode? Acaso Dios kiermen bida den cielo?’ No. Dicon no? Wel, na prome luga, e texto ta bisa cu “e tent di Dios lo ta cu humanidad”, y humanidad ta biba riba tera. (Revelacion 21:3) Di dos, e texto ta papia di un mundo caminda “lo no tin morto mas”—un mundo caminda morto tabata existi un tempo, pero cu na e tempo ey lo no t’ey mas. Nunca no tabatin morto den cielo, pero riba tera si e tin un historia largo. Pa e motibo aki anto, ta logico pa conclui cu Dios su promesa di un mihor bida lo cumpli aki mes riba tera.

Dios lo seca e gran cantidad di lagrima cu hende a drama pa motibo di tristeza y sufrimento

Jehova kier pa nos tin fe den su promesa di un husto mundo nobo. Net despues cu el a describi e bendicionnan di futuro, e ta duna nos e siguiente garantia: “Tende! Mi ta traha tur cos nobo.” Anto el a agrega: “E palabranan aki ta digno di confianza y berdad.” (Revelacion 21:5) Nos ta invita bo pa siña con abo cu bo famia por ta entre e hendenan feliz cu lo mira e promesa di Dios bira realidad.

PA LUNA DI DECEMBER NOS TA RECOMENDA BO LESA

1 Pedro 1Revelacion 22

^ par. 5 Si bo kier sa mas tocante Cristo su sacrificio di rescate, wak capitulo 5 di e buki Kico Bijbel Ta Siña Realmente? publica pa Testigonan di Jehova.