Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2013

 CONSEHO PA UN BIDA DI FAMIA FELIZ

Papia cu Bo Yiu Adolescente sin Discuti cu Ne

Papia cu Bo Yiu Adolescente sin Discuti cu Ne

“Tempo mi yiu muher tabatin 14 aña, el a cuminsa pusta boca cu mi. Si mi a bis’e: ‘Bo ta bin come?’, e tabata contesta: ‘Mi ta come ora mi kier.’ Si mi a puntr’e si el a caba di haci su trabounan di cas, e tabata bisa: ‘Stop di cansa mi!’ Hopi biaha nos tabata halsa bos y grita otro.”—MAKI, JAPON. *

Si bo tin un yiu adolescente, un di e cosnan di mas dificil cu bo por haya bo aden como mayor ta ora bo haya un conflicto cu ne. Tambe e por pone bo pasenshi na prueba. Maria, mama di un hoben di 14 aña di Brazil, a bisa: “Ora mi yiu muher reta mi autoridad, e ta pone mi sanger herbe. Nos ta bira asina frustra te cu nos ta cuminsa grita otro.” Carmela, di Italia, ta enfrenta un reto similar. El a bisa: “Ami cu mi yiu homber sa discuti fuertemente cu otro, y ta te ora e bay cera su curpa den camber, e cos ta caba.”

Pakico algun adolescente ta gusta pusta boca cu nan mayornan? Mester culpa e personanan di nan mes edad? Kisas. Bijbel ta bisa cu un persona su amigonan por tin un gran influencia riba dje, sea bon of malo. (Proverbionan 13:20; 1 Corintionan 15:33) Ademas, hopi di e entretenimento cu tin awe pa hobennan ta promove e idea cu no ta nada malo si un adolescente ta rebelde.

Pero tin otro factornan cu bo tin cu tene cuenta cu ne. Ta factornan cu no ta dificil pa trata cu ne unabes cu bo compronde ki efecto nan por tin riba bo yiu. Laga nos wak algun ehempel.

E TA DESAROYANDO SU “CAPACIDAD DI PENSA”

Apostel Pablo a skirbi: “Tempo mi tabata mucha, mi tabata papia manera mucha, pensa manera mucha, rasona manera mucha; pero awor cu mi a bira hende grandi, mi a pone cos di mucha un  banda.” (1 Corintionan 13:11) Manera e palabranan aki ta indica, mucha no ta pensa manera hende grandi ta pensa. Den ki manera?

Mucha tin e tendencia di pensa cu un cos ta sea bon of malo; na moda di papia, sea blanco of preto. En cambio, hende grandi hopi biaha ta mas capaz pa mira e areanan shinishi y analisa asuntonan mas a fondo pa nan por yega na un conclusion of tuma decision. Por ehempel, hende grandi ta para keto na e partinan etico di un asunto y ta pensa riba ki efecto nan accionnan por tin riba otro hende. Kisas nan tin e custumber di pensa asina, mientras cu adolescentenan ta den e proceso di siña pensa asina.

Bijbel ta anima hobennan pa desaroya nan “discernimento”, of, capacidad di pensa. (Proverbionan 1:4) En realidad, Bijbel ta anima tur cristian pa uza nan “capacidad di pensa.” (Romanonan 12:1, 2; Hebreonan 5:14) Pero tin biaha bo yiu adolescente por uza su capacidad di pensa pa discuti cu bo, hasta riba cosnan hopi insignificante. * Of kisas e ta expresa un punto di bista cu ta refleha un falta di madurez. (Proverbionan 14:12) Den un situacion asina, con bo por rasona cu bo yiu en bes di discuti cu ne?

PURBA ESAKI: Podise bo yiu simplemente ta purba di uza su habilidad nobo di rasona, y kisas ainda e no tin un punto di bista firme riba un asunto. Pa bo haya sa kico e ta kere realmente, elogi’e prome pa su manera di rasona riba e asunto. Por ehempel, bo por bis’e: “Aunke mi no ta di acuerdo cu bo riba tur punto, mi ta gusta e manera cu bo ta analisa cosnan.” Anto, yud’e evalua su forma di pensa. Bo por bis’e: “Bo ta kere cu loke bo a caba di bisa mi ta conta den tur situacion?” Bo por keda sorprendi con bo yiu ta reevalua su opinionnan y despues refina nan.

Pero tene cuidou! Ora bo ta rasona cu bo yiu, no kere cu ta abo mester tin e ultimo palabra. Hasta ora bo pensa cu loke bo bisa ta drenta un banda di horea y sali for di e otro banda, probablemente bo yiu lo keda corda mas di loke bo ta kere, of di loke e ta dispuesto pa reconoce. No keda sorprendi si despues di un par di dia, bo yiu acepta bo punto di bista of hasta pretende cu e idea tabata di dje.

“Tin biaha ami cu mi yiu homber ta discuti tocante cualkier coy kens, por ehempel, p’e no dispidi cos of p’e stop di tenta su ruman muher. Pero mayoria di biaha, tur loke e tabata kier ta pa mi puntr’e su opinion, pa mi trata di comprond’e y pa mi bisa algo manera: ‘Awor mi ta compronde’ of ‘Ta esey ta loke bo ta pensa.’ Ora mi wak bek, mi ta realisa cu si mi a djis bisa algo den e direccion ey, nos lo por a evita hopi discusion.”—Kenji, Japon.

E TA FORMANDO SU MES OPINIONNAN

Mayornan sabi ta crea un ambiente den cua nan yiunan por expresa nan opinion

Un parti importante den lantamento di un yiu ta pa prepar’e pa e dia cu e ta bay biba riba su mes. (Genesis 2:24) Parti di e proceso ey ta encera yud’e forma su propio identidad, esta, su cualidadnan, su opinionnan y su norma- y balornan den bida cu ta determina ki tipo di hende e ta. Ora e haya su mes bou di presion pa haci malo, e echo cu e sa kico e kier den bida ta yud’e pensa riba e consecuencianan di su accionnan. Tambe lo e puntra su mes: ‘Ki tipo di hende mi ta? Kico ta mi norma- y balornan? Kico un persona cu tin e norma- y balornan ey lo haci den e situacion aki?’—2 Pedro 3:11.

Bijbel ta conta nos tocante Jozef, un yoncuman cu tabatin su propio identidad. Por ehempel, ora e esposa di Potifar a insisti pa e drumi cu ne, Jozef a contesta: ‘Con mi por haci e maldad grandi aki y peca contra Dios?’ (Genesis 39:9) Aunke ainda e Israelitanan no tabatin un ley cu a prohibi adulterio, Jozef por a compronde kico Dios a pensa di e asunto. Ademas, ora el a bisa ‘con mi por’, el a demostra cu e tabata pensa manera Dios, esta, cu ta asina e mes tambe tabata.—Efesionan 5:1.

Bo yiu adolescente tambe ta formando su propio identidad. Esey ta bon, pasobra su conviccionnan lo yud’e enfrenta presion di personanan di su mes edad. (Proverbionan 1:10-15) Di otro banda, e mesun sentido di identidad ey por pon’e lanta contra bo. Si esey sosode, kico bo por haci?

PURBA ESAKI: En bes di cuminsa discuti cu bo yiu, simplemente ripiti su palabranan. “Laga mi haci sigur si mi a compronde bo bon. Bo ta bisando mi cu ...?” Anto hacie pregunta manera: “Dicon bo  ta pensa asina?” of “Kico ta pone bo yega na e conclusion ey?” Stimula bo yiu pa e papia. Lag’e duna su opinion. Si e diferencia di opinion ta djis un asunto di preferencia y no un asunto di principio, mustra bo yiu cu bo por respeta su punto di bista, hasta ora bo no ta completamente di acuerdo cu ne.

Ora un yiu ta desaroya su propio identidad, acompaña pa conviccionnan firme, esey no ta solamente normal sino tambe probechoso. Al fin y al cabo, Bijbel ta bisa cu cristiannan no mester ta manera mucha chikito cu ta ser ‘benta tur caminda pa ola y hiba p’aki p’aya pa tur biento di siñansa.’ (Efesionan 4:14) Pues, permiti y hasta anima bo yiu pa e desaroya su propio identidad.

“Ora mi mustra mi yiu muhernan cu mi ta dispuesto pa scucha nan, nan ta mas inclina na tene cuenta cu mi opinion, incluso si e ta diferente for di esun di nan. Ademas, mi ta tene cuidou pa mi no obliga nan pensa manera ami ta pensa, sino ta laga nan forma nan propio opinion.”—Ivana, Republica Checo.

FIRME, ALABES FLEXIBEL

Algun adolescente ta gusta haci loke mucha sa haci. Nan a siña e arte di keda papia riba un asunto cu e intencion di cansa nan mayornan pa nan sede. Si esey ta sosode cu frecuencia den bo hogar, tene cuidou. Aunke bo por haya alivio un rato si bo sede, bo yiu por haya e impresion cu pa e haya su kier, e tin cu keda insisti. Kico ta e solucion? Sigui e conseho di Hesus: ‘Laga bo “si” ta si, y bo “no”, no.’ (Mateo 5:37) Si bo yiu sa cu bo ta consistente, lo e ta menos inclina na insisti riba un punto.

Na mes momento, sea rasonabel. Por ehempel, laga bo yiu splica bo pakico e ta pensa cu e por yega cas mas laat na cierto ocasion. Si bo bisa si den un caso asina, esey no ta nifica cu ta sede bo ta sede na presion, sino bo ta simplemente sigui e conseho di Bijbel: ‘Laga tur hende mira ki rasonabel bo ta.’—Filipensenan 4:5.

PURBA ESAKI: Tene un reunion cu e famia den cua bo ta papia riba ki ora bo yiunan mester ta na cas y riba otro reglanan di cas. Mustra nan cu bo ta dispuesto pa scucha y pa evalua tur factor envolvi prome cu bo tuma un decision. Roberto, un tata di Brazil, a bisa: “Un yiu mester por mira cu su mayornan ta dispuesto pa sede ora ningun principio di Bijbel ta ser viola.”

Claro cu ningun mayor no ta perfecto. Bijbel ta bisa: “Nos tur ta trompica hopi biaha.” (Santiago 3:2) Si bo ta haya cu bo tambe tabata culpabel pa un discusion entre abo cu bo yiu, no keda sin pidie despensa. Ora bo admiti bo fayo, bo ta duna un ehempel di humildad, y esey lo siña bo yiu actua na e mesun manera.

“Un biaha, mi a discuti fuertemente cu mi yiu. Ma despues cu mi a logra trankilisa mi mes, mi a pidie despensa pa loke a pasa. Como resultado, e tambe a calma y tabata mas facil pa e scucha mi.”—Kenji, Japon.

^ par. 3 A cambia e nombernan den e articulo aki.

^ par. 10 E principionan cu nos ta analisa den e articulo aki ta conta tanto pa mucha homber como mucha muher.

PUNTRA BO MES ...

  • Den ki maneranan mi mes ta causando discusion cu mi yiu adolescente?

  • Con mi por uza e informacion den e articulo aki pa compronde mi yiu mihor?

  • Kico mi por haci pa papia cu mi yiu sin discuti cu ne?