Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2013

 HALA CERCA DIOS

Dios Ta Recompensa Hende Cu Ta Busc’e

Dios Ta Recompensa Hende Cu Ta Busc’e

Jehova ta balora e esfuerso di hende cu ta trata di agrad’e? Algun hende ta bisa cu no, pasobra segun nan Dios no ta interesa den nos. Pero e punto di bista ey ta demostra cu nan no conoce Dios bon. Su Palabra, Bijbel, ta sigura nos cu Jehova ta interesa den e esfuerso sincero di cada un di su sirbidornan. Analisa e palabranan di apostel Pablo cu nos ta haya na Hebreonan 11:6.

Kico nos tin cu haci pa agrada Jehova? Pablo a skirbi: “Sin fe ta imposibel pa agrada Dios.” Tuma nota cu Pablo no ta bisa cu sin fe ta dificil pa agrada Dios, sino cu ta imposibel pa agrada Dios. Cu otro palabra, pa hende por agrada Dios, nan mester tin fe.

Pero kico fe den Dios ta encera? E ta encera basicamente dos cos. Na prome luga, nos “mester kere cu e ta existi.” Pasobra con nos por agrada Dios si nos ta duda cu e ta existi? Pero kere so no ta suficiente, pasobra hasta e demoñonan ta kere cu Dios ta existi. (Santiago 2:19) Nos fe cu Dios ta existi mester motiva nos pa hiba un bida cu ta agrad’e.—Santiago 2:20, 26.

Na di dos luga, nos “mester kere cu” Dios ta “recompensa” hende. Un hende cu tin berdadero fe ta plenamente convenci cu su esfuerso pa agrada Dios lo no ta envano. (1 Corintionan 15:58) Con nos por agrada Jehova si nos ta duda den su capacidad of deseo pa recompensa nos? (Santiago 1:17; 1 Pedro 5:7) Pues, si nos ta pensa cu Dios no ta interesa den nos, cu e no ta balora nos y cu e no ta generoso, nos no conoce e Dios cu Bijbel ta papia di dje.

Ken Jehova ta recompensa? Pablo a bisa: “Esnan cu ta haci esfuerso pa busc’e.” Un buki di consulta pa traductornan di Bijbel ta bisa cu e palabra Griego traduci como “haci esfuerso pa busc’e” no ta nifica simplemente “bay busca” Dios. Mas bien, e ta nifica acerca Dios “pa ador’e.” Un otro buki di consulta ta splica cu e verbo Griego aki ta encera intensidad y esfuerso vigoroso. Si, Jehova ta recompensa tur hende cu ta laga nan fe motiva nan pa sirbie cu celo y un amor intenso.—Mateo 22:37.

Con nos por agrada Jehova si nos ta duda den su capacidad of deseo pa recompensa nos?

Ki recompensa Jehova ta ofrece hende cu ta sirbie fielmente? El a priminti nan un futuro briyante: bida eterno den un paradijs aki riba tera. Esta un muestra di su gran amor y generosidad! (Revelacion 21:3, 4) Pero for di awor, tur hende cu ta haci esfuerso pa busca Jehova ta ricibi hopi bendicion. Cu yudansa di su spirito santo y e sabiduria cu tin den su Palabra, nan ta disfruta di un bida feliz y yen di satisfaccion.—Salmo 144:15; Mateo 5:3.

En berdad, Jehova ta un Dios cu ta balora e sirbishi fiel di hende cu ta devoto na dje. Awor cu bo sa esaki, bo no ta sinti un deseo di hala cerca Dios? Nos ta anima bo anto pa siña mas tocante con bo por desaroya e clase di fe cu Jehova ta recompensa ricamente.

PA LUNA DI NOVEMBER NOS TA RECOMENDA BO LESA

Tito 1Santiago 5