Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  September 2013

 STORIA DI BIDA

Pober Materialmente Pero Rico Spiritualmente

Pober Materialmente Pero Rico Spiritualmente

Mi a nace na december 1939 na Cotiujeni, un pueblo di campesino na e parti noord di loke aworaki ta Moldova. Ey mi welo y mi tata tabata biba den un cas cu nan no por a caba di construi. Na cuminsamento di añanan ’30, nan a bira Testigo di Jehova. Mi mama tambe a bira un Testigo despues cu el a bin realisa cu mi welo tabata sa mas di Bijbel cu e pastoor di e pueblo.

Tempo mi tabatin tres aña di edad, autoridadnan a deporta mi tata, mi omo y mi welo pa motibo di nan posicion neutral como cristian pa bay traha den campamento di trabou forsa. Mi tata ta e unico cu a sobrevivi. Na 1947, despues di Segundo Guera Mundial, el a bolbe cas cu un fractura na su lomba. Aunke e tabata fisicamente na werki, su fe si tabata fuerte.

CAMBIONAN DRASTICO DEN NOS BIDA

Tempo mi tabatin nuebe aña, autoridadnan a deporta mi famia y cientos di otro Testigo di Jehova di Moldova pa Siberia. Dia 6 di juli 1949, nan a prop nos den wagon pa transporta bestia. Despues di un biahe di 12 dia y mas cu 6.400 kilometer nos a yega na e stacion di trein na Lebyazhe. Ey autoridadnan local tabata warda riba nos. Nan a parti nos den diferente grupo chikito y a manda nos mesora na diferente luga den e area ey. Nos grupo a haya alohamento den un scol chikito cu tabata bashi. Nos tabata cansa y desanima. Un señora di edad cu tabata hunto cu nos a cuminsa neurie (hum) un cantica cu Testigonan di Jehova a compone durante Segundo Guera Mundial. Un poco despues nos tur a cuminsa canta hunto cu ne e palabranan di e cantica:

“Hopi ruman a ser deporta pa luganan leu.

Nan a manda nan noord y oost.

Pa motibo cu nan a sirbi Dios, nan a sufri hopi y tabatin cu wanta pruebanan mortifero.”

Cu tempo nos por a cuminsa asisti na reunionnan cristian tur diadomingo na un cas cu tabata keda 13 kilometer leu for di caminda nos tabata biba. Hopi biaha nos mester a sali mainta trempan den dianan scur di winter ora temperatura tabata 40 grado Celsius bou di cero y cana den sneeuw cu tabata yega te na nos cintura. Nos tabata reuni cu mas of menos 50 of mas hende den un camber chikito. Nos tabata cuminsa e reunion cantando un, dos of tres cantica. Despues di haci un oracion di curason, nos tabata considera preguntanan basa riba Bijbel pa mas o menos un ora. Despues nos tabata canta otro canticanan y considera mas pregunta basa riba Bijbel. Esey a fortalece nos fe masha hopi mes.

PRUEBANAN NOBO PA ENFRENTA

Na stacion di trein di Dzhankoy, rond di aña 1974

Na 1960, e Testigonan den exilio a haya mas libertad. Maske nos tabata pober, mi por a bishita Moldova caminda mi a conoce Nina, kende su mayornan y su welanan tambe tabata Testigo. Pronto nos a casa y a muda bay Siberia bek, caminda nos yiu muher  Dina a nace na 1964 y nos yiu homber Viktor na 1966. Dos aña despues nos a muda bay Ucrania y a bay biba den un cas chikito na Dzhankoy, un stad cu ta keda mas o menos 160 kilometer for di Yalta, riba e peninsula di Crimea.

E obra di Testigonan di Jehova na Crimea tabata prohibi, mescos cu na henter Union Sovietico. Pero nos trabou no tabata completamente restringi, ni nos no tabata ser persigui abiertamente. Pesey algun Testigo a cuminsa baha man na actividad cristian. Nan tabata rasona cu despues cu nan a sufri asina tanto na Siberia, awor tabata tempo pa nan traha duro pa logra algun cos material.

DESAROYONAN EMOCIONANTE

Dia 27 di maart 1991, nos trabou na loke e tempo ey tabata Union Sovietico a haya reconocemento legal. Mesora e rumannan a traha plan pa celebra shete congreso special di dos dia den henter e pais. Nos mester a asisti na esun cu lo a ser teni na Odessa, Ucrania, cuminsando dia 24 di augustus. Mi a bay un luna prome pa yuda prepara e stadion grandi di futbol pa e congreso.

Nos tabata traha henter dia y hopi biaha nos tabata drumi anochi riba e bankinan di stadion. Grupo di rumannan muher a haci e parke rond di e stadion limpi. Nos a saca mas of menos 70 ton di sushi. Esnan encarga cu e departamento di alohamento a busca den henter e stad pa asina haya luga di keda pa e 15.000 delegadonan cu nan tabata spera. Pero diripiente nos a haya un mal noticia.

Dia 19 di augustus, net cinco dia prome cu e congreso mester a cuminsa, nan a aresta Mikhail Gorbachev, kende e tempo ey tabata presidente di Union Sovietico, durante su vakantie cerca di Yalta, no mucho leu for di caminda nos tabata. Autoridadnan a cancela nos permit pa tene e congreso. E delegadonan a cuminsa yama na e oficina di congreso y puntra kico nan tabatin cu haci cu nan reservacion di bus y trein. Despues di haci oracion ferviente, e rumannan encarga cu e organisacion di e congreso a bisa nan: “Bin numa!”

A sigui cu e preparacionnan y a sigui haci oracion. E departamento di transport a cuminsa ricibi delegadonan cu tabata yega for di hopi parti di Union Sovietico y tabata hiba nan na nan luganan di keda. Tur mainta e miembronan di e Comite di Congreso tabata bay cerca e autoridadnan di e stad. Y tur anochi nan tabata bolbe bek sin bon noticia.

CONTESTA PA NOS ORACIONNAN

Diahuebs dia 22 di augustus, dos dia prome cu e congreso mester a cuminsa, e miembronan di e Comite di Congreso a bin bek cu bon noticia: Nos a haya luz berde pa e congreso sigui! Ora nos a canta e cantica di apertura y habri cu oracion, nos a sinti un gran alegria. Despues di e sesion final di diasabra, nos a keda te laat ta combersa cu nos amigonan di antes cu nos a topa. Tabata trata aki di cristiannan fiel cu a demostra un fe inkebrantabel.

Congreso na Odessa na 1991

Durante e mas di 22 añanan despues di e congreso ey, e obra a crece na un manera fenomenal. A construi Salonnan di Reino den henter Ucrania y e cantidad di ruman cu ta predica e bon noticia di Reino a aumenta di 25.000 na 1991 te na mas cu 150.000 awor.

KETO BAY RICO SPIRITUALMENTE

Nos famia ta biba keto bay den e mesun cas na Dzhankoy, cu awor ta un stad di mas of menos 40.000 habitante. Tabatin masha poco Testigo aki na Dzhankoy ora nos a yega for di Siberia na aña 1968, pero awor tin seis congregacion.

Mi famia tambe a crece. Awor tin cuater generacion cu ta sirbi Jehova; ami cu mi casa, nos yiunan, nos nietonan y nos bisanietonan.