Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  September 2013

Di Berdad Nos Idiomanan A Bin di e “Toren di Babel”?

Di Berdad Nos Idiomanan A Bin di e “Toren di Babel”?

“SEÑOR a plama nan for di eynan riba superficie di henter tera; y nan a stop di traha e stad. Pesey su nomber tabata Babel, pasobra eynan SEÑOR a confundi e idioma di henter tera.”—Genesis 11:8, 9.

TA MANERA Bijbel ta trece dilanti a sosode? Ta berdad cu hende a cuminsa papia diferente idioma diripiente, manera e relato ta mustra? Tin hende ta haci bofon di e relato biblico cu ta splica con idioma a yega di existi y plama riba tera. Un escritor a bisa: “E mito tocante e Toren di Babel definitivamente ta un di e cuentanan di mas absurdo cu hende a yega di conta.” Hasta un rabi hudiu a yam’e un “manera infantil pa splica origen di nacionnan.”

Dicon tin hende ta rechasa e relato di Babel? Simplemente, pasobra e ta contradeci algun teoria tocante e origen di idioma. Por ehempel, algun specialista riba e tereno aki ta bisa cu gruponan di idioma no a aparece diripiente, sino cu nan a desaroya gradualmente for di un idioma original. Otronan ta kere cu diferente idioma a desaroya na un manera independiente for di otro, cuminsando cu zonidonan simpel pa forma bira lenganan culto. E teoria aki y tambe otro ideanan contradictorio a pone hopi hende bay di acuerdo cu Profesor W. T. Fitch, kende a skirbi den su buki The Evolution of Language (E Desaroyo di Idioma): “Ainda nos no tin contesta convencente.”

Kico arkeologonan y investigadornan a descubri encuanto e origen y desaroyo di idioma? Nan descubrimentonan ta apoya algun di e teorianan menciona? Of loke nan a haya ta apoya e relato tocante Babel? Laga nos cuminsa na analisa e relato di Bijbel un tiki mas di cerca.

NA UNDA Y NA KI TEMPO EL A TUMA LUGA?

Bijbel ta bisa cu Dios a confundi e idioma di hende y a plama nan den e “tera di Sinar”, cu despues nan a yama Babilonia. (Genesis 11:2) Na ki tempo esey a tuma luga? Bijbel ta bisa: “E tera [esta, habitantenan di e tera] a keda dividi” den  e dianan di Peleg, kende a nace mas of menos 250 aña prome cu Abraham. Pues, e sucesonan di Babel a tuma luga rond di 4.200 aña pasa.—Genesis 10:25; 11:18-26.

Algun specialista ta bisa cu e idiomanan moderno a bin di un solo idioma cu nan ta pensa cu hende tabata papia un 100.000 aña pasa. * Otronan ta bisa cu e idiomanan di awe a bin di diferente idioma di antes cu hende tabata papia casi 6.000 aña pasa. Pero con linguistanan por reconstrui e desaroyo di idiomanan cu no ta existi mas? E revista Economist ta bisa: “Esey ta dificil pasobra linguistanan no ta manera biologonan cu tin fosil cu por guia nan bay bek den pasado.” E revista ta splica cu un linguista a yega na su conclusionnan pa medio di “speculacionnan matematico.”

Sinembargo, ta existi “fosil linguistico.” Kico e fosilnan aki ta y kico nan ta revela tocante origen di idioma? The New Encyclopædia Britannica ta splica: “E prome registronan di idioma skirbi, esta e unico fosilnan linguistico cu hende por spera di topa, ta di mas cu 4.000 of 5.000 aña pasa.” Na unda arkeologonan a haya e “fosilnan linguistico” of “registronan di idioma skirbi” aki? Na e partinan abou di Mesopotamia—caminda Sinar di pasado tabata situa. * Pues, e unico pruebanan cu nan a haya ta cuadra cu loke Bijbel ta menciona.

DIFERENTE IDIOMA, DIFERENTE MANERA DI PENSA

Bijbel ta bisa di e hendenan di Babel cu Dios a “confundi nan idioma pa nan no compronde otro su idioma.” (Genesis 11:7) Consecuentemente, e trahadornan a “stop di traha e stad” di Babel y a plama “riba superficie di henter tera.” (Genesis 11:8, 9) Pues, Bijbel no ta bisa cu tur idioma moderno ta bin di un solo idioma original. Mas bien, e ta describi con diripiente varios idioma nobo, completamente diferente for di otro y aparentemente cada un completamente desaroya, a yega di existi di tal manera cu hende por expresa tur tipo di pensamento y sintimento.

Un tabla di klei graba di Mesopotamia, tercer milenio Prome cu Cristo

Kico di e diferente grupo of famia di idioma cu ta existi awe? Nan ta basicamente mescos of nan ta diferente? Lera Boroditsky, un specialista riba tereno di desaroyo di habilidadnan mental, a skirbi: “Segun cu linguistanan a profundisa den idiomanan di mundo (mas o menos 7.000, di cua algun so a ser analisa), bastante diferencia cu nan no a verwacht a sali na cla.” Si, maske idiomanan y dialectonan di e mesun famia di idioma, manera Cantones y Hakka na parti zuid di China, por parce otro, nan ta completamente diferente for di un otro famia di idioma, manera por ehempel, e idiomanan Catalan of Valenciano na Spaña.

Idioma ta determina kico hende ta pensa di e mundo rond di nan y con nan ta describi color, cantidad, luga, direccion, etcetera. Por ehempel, den un idioma un hende por bisa: “Tin un bacator riba bo man drechi.” Pero den un otro idioma kisas un hende lo bisa: “Tin un bacator riba bo man zuidwest.” Sin exagera, e diferencianan ey  por confundi hende. No ta nada straño anto cu e trahadornan na Babel no por a sigui cu nan proyecto.

NAN TABATA DJIS SACA ZONIDO OF NAN TABATIN UN IDIOMA CULTO?

Con e prome idioma cu hende a papia tabata? Bijbel ta bisa cu e prome homber, Adam, tabata capaz pa crea palabra nobo ora el a duna tur e bestianan nomber. (Genesis 2:20) Ademas, Adam a traha un poema pa expresa su sintimentonan pa su casa, y su casa a describi bon cla kico Dios a taha nan di haci y e consecuencianan di nan desobediencia. (Genesis 2:23; 3:1-3) Nos por bisa anto cu e prome idioma a permiti hende comunica plenamente cu otro y expresa nan mes na un manera creativo.

E confusion di idioma na Babel a stroba hende di coordina nan esfuersonan. Sinembargo, nan idiomanan nobo, mescos cu e prome idioma, a encera un manera culto di papia. Pesey, den un par di siglo hende tabata capaz pa construi stadnan grandi, reuni ehercitonan poderoso y haci comercio internacional. (Genesis 13:12; 14:1-11; 37:25) Nan lo por a logra esey sin un vocabulario y gramatica extenso? Segun e relato biblico, e idioma original di hende y e idiomanan cu a surgi na Babel no tabata djis un sacamento di zonido sin nificacion, sino idiomanan culto.

Investigacionnan moderno ta confirma e conclusion ey. The Cambridge Encyclopedia of Language ta bisa: “Cada cultura cu a ser investiga, sin importa con ‘primitivo’ e por ta den terminonan cultural, tin un idioma completamente desaroya y compleho, comparabel cu esnan di e asina yama nacionnan ‘civilisa.’” Asina tambe, Steven Pinker, profesor di psicologia di Harvard, a cita den su buki Instinto di Idioma: “No ta existi idioma primitivo no desaroya.”

FUTURO DI IDIOMA

Despues cu nos a analisa e edad y luga di e “fosilnan” linguistico, e diferencianan fundamental entre e gruponan di idioma y e complehidad di idiomanan di antiguedad, na ki conclusion rasonabel nos por yega? Hopi hende ta conclui cu e relato di Bijbel di loke a tuma luga na Babel ta un splicacion cu sin duda nos por kere.

Bijbel ta conta nos cu Jehova Dios a confundi hende su idioma na Babel pasobra nan a rebela contra dje. (Genesis 11:4-7) Sinembargo, el a priminti cu lo e “duna pueblonan e cambio pa un idioma puro, pa nan tur por invoca e nomber di Jehova, pa nan sirbie schouder cu schouder.” (Sofonias 3:9NW) E “idioma puro” aki, esta, e berdad di e Palabra di Dios, ta uni hende di tur parti di mundo awe. Ta logico pa pensa cu den futuro Dios lo uni humanidad mas ainda dunando nan un solo idioma comun y deshaci di e confusion cu a tuma luga na Babel.

^ par. 8 E teorianan tocante idioma ta sali for di e punto di bista cu hende a evoluciona for di macaco. Pa mas informacion tocante e ideanan aki, wak pagina 27-29 di e foyeto na Spaño, El origen de la vida. Cinco cuestiones dignas de análisis, publica pa Testigonan di Jehova.

^ par. 9 Arkeologonan a coba y haya varios tempel den forma di piramid cu tin trapi den bisindario di Sinar. Bijbel ta bisa cu e hendenan cu a traha e toren di Babel a uza bloki, no piedra, y a pega nan na otro cu breu. (Genesis 11:3, 4) The New Encyclopædia Britannica ta bisa cu na Mesopotamia piedra tabata “masha scars of hasta imposibel pa haya”, pero breu si tabatin na granel.