Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  July 2013

 CONSEHO PA UN BIDA DI FAMIA FELIZ

Bo Por Tin Exito den Bo di Dos Matrimonio

Bo Por Tin Exito den Bo di Dos Matrimonio

HERMAN: * “Despues di tabatin 34 aña casa, mi esposa a muri di cancer. Ora m’a bolbe casa, mi esposa Linda semper a sinti cu mi tabata compar’e cu mi prome casa. Pa colmo, hopi biaha mi amigonan tabata papia di con bon hende mi prome casa tabata, y esaki tabata molestia Linda hopi.”

LINDA: “M’a sinti cu mi esposo i otro hende nunca no lo balora mi mes hopi cu Herman su prome casa. E tabata un hende suave cu bon manera y tur hende tabata stim’e. Tin biaha mi tabata puntra mi mes si algun dia lo mi por bira mes bon pa Herman manera su prome esposa tabata.”

Herman cu Linda ta feliz y contento cu nan a topa otro. Linda, kende tabata un muher divorcia, hasta ta yama Herman su “Príncipe Azul.” Sinembargo, manera nan mes ta admiti, un di dos matrimonio por trece reto- y situacionnan cu no tabata existi den e prome matrimonio. *

Si bo a casa pa di dos biaha, con bo ta mira bo di dos matrimonio? Un esposa cu yama Tamara, kende a casa tres aña despues di su divorcio, a bisa: “Ora bo casa pa prome biaha, bo tin e sintimento special cu bo matrimonio lo dura pa semper. Pero den bo di dos matrimonio, kisas bo no ta sinti esey mas pasobra semper bo ta corda cu bo prome matrimonio a termina.”

Sinembargo, hopi pareha a haya berdadero felicidad den nan di dos matrimonio. Nan tabatin exito den nan matrimonio; bo tambe por tin exito! Con?  Laga nos analisa tres dificultad cu un di dos matrimonio por trece cu ne y con principionan di Bijbel por yuda. *

DIFICULTAD 1: E RETO PA BO PROME MATRIMONIO NO AFECTA ESUN ACTUAL.

Ellen cu ta biba na Sur Africa a conta: “Mi no por djis lubida tur e momentonan agradabel di mi prome matrimonio, vooral ora nos biaha bay na e mesun luganan caminda ami cu mi ex-esposo tabata bay den vakantie. Tin biaha, sin cu mi sa, mi ta cuminsa compara mi esposo actual cu mi prome casa.” Di otro banda, si bo casa tabata casa un biaha caba, bo por sinti bo malo si tur ora e ta keda papia tocante su prome matrimonio.

Crea recuerdonan nobo cu por uni boso dos como pareha

SUGERENCIA: Compronde cu no ta realistico pa spera cu abo of bo partner lo djis lubida un prome matrimonio, vooral si el a dura hopi. Algun hende ta admiti cu sin cu nan por a yuda hasta nan a yega di yama nan casa actual na nomber di nan prome casa. Con bo por trata cu e tipo di situacionnan aki? Bijbel ta conseha: “Purba compronde otro.”—1 Pedro 3:8, New Century Version.

No bira jaloers y prohibi bo casa actual di bisa algo di su prome matrimonio. Si e ta sinti gana di papia tocante su matrimonio cu su prome casa, compronde p’e y scuch’e. Y no conclui di biaha cu e ta comparando bo cu su prome casa. Ian, kende a bolbe casa dies aña pasa, a bisa: “Mi esposa Kaitlyn nunca a considera e tema di mi prome matrimonio como tabu. Mas bien, el a mira esey como un oportunidad pa haya sa kico a haci mi e persona cu mi ta awe.” Bo por hasta haya cu e tipo di combersacionnan ey lo yuda bo bira mas pega cu bo casa.

Concentra riba e bunita cualidadnan cu bo casa actual tin. Ta berdad cu bo partner por falta algun cualidad of habilidad cu bo ex-casa tabatin. Pero muy probablemente tin otro areanan den cua bo casa actual ta sobresali. Pesey, traha pa fortalece bo relacion cu bo casa actual, ‘sin compar’e cu otro hende.’ Reflexiona riba loke bo ta gusta di bo casa y duna balor na esey. (Galationan 6:4) Un homber cu yama Edmond, kende a casa dos biaha, a splic’e asin’aki: “Mescos cu bo no ta haya dos amistad cu ta mescos, asina tampoco bo no ta haya dos matrimonio cu ta mescos.”

Con bo por balansa e bunita recuerdonan di bo prome matrimonio cu e bida cu bo a cuminsa cu bo casa nobo? Jared a bisa: “Un biaha mi a splica mi esposa cu mi prome matrimonio tabata manera un bunita buki cu ami cu mi prome casa a skirbi. De bes en cuando lo mi por habrie, les’e y reflexiona riba nos bon experencianan. Pero mi no ta biba den e buki ey. Mas bien, ami cu mi esposa ta skirbiendo nos propio buki hunto y aki ta caminda mi ta biba felizmente awor.”

PURBA ESAKI: Puntra bo partner si e ta sintie malo ora bo ta papia tocante bo prome matrimonio. Determina ki ora lo ta mihor pa no papia tocante bo prome matrimonio.

DIFICULTAD 2: AMIGONAN NO SA CON PA TRATA BO CASA NOBO.

Javier, kende a bolbe casa despues cu e tabatin seis aña divorcia, a bisa: “Pa algun tempo despues cu nos a casa, mi casa tabatin e impresion cu mi amigonan tabata studi’e y test e constantemente.” Un esposo cu yama Leo tabatin cu trata cu un otro situacion. El a conta: “Den mi presencia, algun persona tabata bisa mi esposa cuanto nan tabata stima su ex-esposo y cu nan ta sinti su falta masha hopi mes.”

SUGERENCIA: Purba di pone bo mes den sapato di bo amigonan. Ian, menciona anteriormente, a bisa: “Mi ta kere cu e amigonan di antes ta sinti nan straño ora nan tin cu asocia cu solamente mitar di e pareha cu nan a conoce. Tin biaha nan por tin hasta problema cu esey.” Pues, ‘sea rasonabel y demostra suavidad pa cu tur hende.’ (Tito 3:2) Duna bo famia y amigonan tempo pa nan por ahusta nan mes na e situacion nobo. Mescos cu bo matrimonio a cambia, asina tambe bo amistadnan por cambia. Javier, menciona ariba, a bisa “cu segun tempo tabata pasa, e cu su casa a haci esfuerso pa bolbe bira pega cu nan amistadnan di antes.” Anto el a agrega: “Pero loke tambe a yuda  nos ta di haci esfuerso como pareha pa cera amistadnan nobo.”

Tene cuenta cu e sintimentonan di bo casa ora bo ta hunto cu bo amigonan di antes. Por ehempel, si den un combersacion e tema tocante bo prome matrimonio lanta, mustra tacto y sano huicio pa bo casa actual no sintie exclui. Un proverbio den Bijbel ta bisa: “Palabra papiá pa loko ta hùrt hende profundamente, palabra na ora ta trese alivio.”—Proverbionan 12:18BPK.

PURBA ESAKI: Purba anticipa cua ta e actividadnan social cu por crea un situacion fastioso pa abo of pa bo casa. Considera adelanta con lo ta e mihor manera pa trata cu e pregunta- y comentarionan cu bo amigonan por haci relaciona cu bo prome matrimonio.

DIFICULTAD 3: MIEDO DI CONFIA BO CASA NOBO PASOBRA ESUN PROME NO TABATA FIEL.

Andrew, kende su prome casa a bandon’e, a bisa: “Mi tabatin masha miedo di bolbe bira victima di traicion.” Awor cu e ta casa cu Riley, el a bisa: “Hopi bes mi tabata puntra mi mes si mi ta mes bon cu Riley su prome casa. Mi tabatin hasta miedo pa e no lanta un dia bisa cu mi no ta sirbi, anto bay laga mi pa un otro.”

SUGERENCIA: Papia habri cu bo casa tocante bo preocupacionnan. Bijbel ta bisa: “Plannan ta frakasá pa falta di deliberashon.” (Proverbionan 15:22BPK) Mas Andrew cu Riley a ‘delibera’ tocante nan preocupacionnan, mas nan a siña confia otro. Andrew a bisa: “M’a bisa Riley cu ami si lo no core divorcia djis pa scapa di problema, y el a sigura mi cu e tambe ta pensa mescos. Pocopoco pero sigur mi a bin siña confi’e completamente.”

Si bo casa tabata victima di traicion den su prome matrimonio, haci tur loke bo por pa gana su confianza. Por ehempel, Michel cu Sabine—ambos a bin di un prome matrimonio fracasa—a palabra pa laga otro sa ora nan tin contacto cu nan ex-casa. Sabine a bisa: “E compromiso aki ta un proteccion pa nos, y e ta laga nos sinti nos sigur.”—Efesionan 4:25.

PURBA ESAKI: Limita bo combersacionnan priva cu e sexo opuesto, sea personalmente, na telefon of online.

Hopi segundo matrimonio tabatin exito y boso tambe por logra esey. Al fin y al cabo, compara cu bo prome matrimonio, awor bo conoce bo mes mihor. Andrew, menciona anteriormente, a bisa: “Mi a haya un gran consuelo den mi matrimonio cu Riley. Durante e 13 añanan cu nos tin casa, nos a logra forma un bon relacion cu otro—uno cu nos no kier perde pa nada di mundo.”

^ par. 3 A cambia e nombernan.

^ par. 5 Naturalmente, ta haci un gran diferencia si un matrimonio a termina pa motibo di divorcio of morto. Meta di e articulo aki ta pa yuda un hende tin exito den su di dos matrimonio sin importa con su prome matrimonio a termina.

^ par. 7 Pa mas informacion encuanto e dificultadnan cu lantamento di yiu di crianza por trece cu ne, wak e serie di articulo di portada “Clave Cu Por Yuda Famia di Crianza Ser Feliz” di e ¡Despertad! di april 2012, publica pa Testigonan di Jehova.

PUNTRA BO MES ...

  • Cua ta algun di e cualidadnan di mi casa cu mas mi ta balora?

  • Si den un combersacion e tema tocante mi prome matrimonio lanta, con mi por trata e asunto na un manera cu ta laga mi casa actual sintie trankil y balora?