Dios ta stima nos of e no ta worry cu loke nos ta pasa aden? E contesta cu nos ta haya den Bijbel ta duna nos gran consuelo. Echo ta cu Dios stima humanidad y e kier pa nos disfruta di bida. Tur dia e ta permiti hende—hasta esnan mas malagradecido—beneficia di e bon cosnan cu el a duna nos na abundancia. Laga nos wak un ehempel di esey den e palabranan di apostel Pablo.—Lesa Echonan 14:16, 17.

Na un ocasion cu Pablo tabata papia cu e habitantenan di e stad Listra, kendenan no tabata adora Dios, el a bisa: “Den pasado [Dios] a permiti tur nacion haci manera nan tabata kier, aunke e no a laga di duna prueba ta ken e ta, ya cu el a haci bon, dunando boso awasero for di cielo y tempo di bon cosecha, y asina a laga boso haya cuminda na abundancia y a yena boso curason cu alegria.” Kico Pablo tabata kier pa nan compronde for di e palabranan ey?

E habitantenan di Listra no tabatin nodo di bay mucho leu pa mira cu Pablo su palabranan tabata berdad. Listra tabata un region fertil y yen di awa, y e hendenan tabata biba di agricultura. Sinembargo, manera Pablo a recorda nan, ta Dios ta e Fuente di awasero y temporada di cosecha. Pues, ki ora cu nan tabatin un bon cosecha of ki ora cu nan a come un cuminda dushi, nan tabata beneficiando di e bon cosnan cu Dios a duna hende.

Loke Pablo a bisa e pueblo di Listra ta siña nos varios les importante tocante Jehova Dios.

Jehova a duna nos boluntad liber. Ripara cu Jehova a permiti hende di tur nacion “haci manera nan tabata kier.” Un buki di consulta pa traductornan di Bijbel ta bisa cu e expresion aki por nifica “haci manera nan ta haya ta bon.” (A Handbook on the Acts of the Apostles) Jehova no ta forsa niun hende pa ador’e. El a duna nos boluntad liber, esta, e capacidad di scoge nos propio rumbo den bida.—Deuteronomio 30:19.

Jehova kier pa nos siña conoc’e. Pablo a splica cu Dios no “a laga di duna prueba ta ken e ta.” E buki di consulta menciona anteriormente ta bisa cu por traduci e frase aki como “e ta laga hende mira bon cla ki tipo di Dios e ta.” Tur loke Dios a crea ta duna prueba di “su cualidadnan invisibel”, incluso su bondad, su sabiduria, su poder y amor. (Romanonan 1:20) Y den Bijbel Jehova a revela mas cos tocante su mes. (2 Timoteo 3:16, 17) No ta bisto cu e kier pa nos siña conoc’e?

Tur dia Dios ta permiti hende—hasta esnan mas malagradecido—beneficia di e bon cosnan cu el a duna nos na abundancia

Jehova kier pa nos ta feliz. Pablo a bisa cu Jehova ta laga nos “haya cuminda na abundancia” y ta yena nos “curason cu alegria.” Hasta un pecador cu no ta reconoce Jehova por come bariga yen y haya un grado di felicidad den bida. Ma Dios kier pa nos biba pa semper den berdadero felicidad. Esey ta posibel unicamente si nos siña e berdad tocante dje y obedec’e.—Salmo 144:15; Mateo 5:3.

Diariamente nos tur ta beneficia di Jehova su bondad. Lo bo no tin gana di haya sa con bo por mustra bo aprecio pa e Dios cu ta laga bo “haya cuminda na abundancia” y yena bo “curason cu alegria”?

Pa luna di juli nos ta recomenda bo lesa

Echonan 11-28