Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  July 2013

 UN COMBERSACION INTERESANTE TOCANTE BIJBEL

Dios Ta Sinti Duele ora E Mira Nos Sufri?

Dios Ta Sinti Duele ora E Mira Nos Sufri?

Pa bo haya un idea con Testigonan di Jehova ta combersa cu hende, tuma nota di e siguiente dialogo. Imagina cu Marlen, un Testigo, ta bay na cas di Señora Sonia.

DICON E TA LAGA E COSNAN AKI PASA?

Marlen: Bon dia señora. Awe mi ta parti un tratado pa tur hende aki banda. Su tema ta Bo Kier Haya Sa e Berdad? Ata esun di señora aki.

Sonia: Ta tocante religion?

Marlen: Si, señora. Djis tira un bista riba e seis preguntanan cu tin riba e portada. Cua di nan...?

Sonia: Bo sa señora, mihor bo no sigui pasobra bo ta perde bo tempo.

Marlen: Dicon señora ta bisa asina?

Sonia: E cos ta cu mi no ta kere den Dios.

Marlen: Mi ta contento cu señora ta franco cu mi. Pero semper señora a pensa asina?

Sonia: No, m’a lanta ta bay misa. Pero mi tin hopi tempo cu m’a stop di bay.

Marlen: Mi ta compronde pa señora. Prome cu mi lubida, laga mi introduci mi mes. Mi nomber ta Marlen.

Sonia: Ami ta Sonia.

Marlen: Mucho gusto, Sonia.

Sonia: Igualmente.

Marlen: Sonia, mi no a bin aki pa impone mi creencianan riba bo. Pero mi por puntra bo si tin algo en particular cu a pone bo cuminsa duda si Dios ta existi?

Sonia: Si. Diesshete aña pasa mi mama a haya un accidente di auto.

Marlen: Ay no. Tabata algo serio?

Sonia: Si, el a keda paralitico.

Marlen: No bisa mi! Ay ta pica! E cos ey lo mester ta hopi duro pa bo.

Sonia: Con polaga. Ta pesey tur ora mi ta puntra mi mes: ‘Si ta existi un Dios, dicon e ta laga cosnan asina pasa? Dicon e ta laga nos sufri asin’aki?

TA MALO PA CUESTIONA DIOS?

Marlen: Sonia, no sinti bo malo cu bo ta haci e preguntanan ey. Ora nos ta sufri, ta normal cu nos kier sa e motibo. Bo sa, hasta algun personahe fiel den Bijbel a haci esey.

Sonia: Si?

Marlen: Sigur cu si! Lo bo kier pa mi mustra bo un ehempel?

Sonia: Ok.

Marlen: Mira kico profeta Habacuk a puntra Dios. Laga nos lesa capitulo 1, versiculo 2 y 3 di su buki: “Te ki tempo, o SEÑOR, lo mi sclama pa yudansa, y abo no ta tende? Mi ta sclama na bo: ‘Violencia!’ Toch bo no ta salba. Pakico bo ta haci mi mira inikidad?” Bo no ta haya cu e preguntanan aki ta parce esnan cu abo a haci?

Sonia: Berdad.

Marlen: Sonia, bo sa, nunca Dios no a rabia cu Habacuk pa e preguntanan cu el a haci ni e no a bis’e cu e mester tin mas fe.

Sonia: Interesante.

JEHOVA NO GUSTA MIRA NOS SUFRI

Marlen: Bijbel ta siña nos cu Dios sa di tur nos sufrimento y cu e no ta cera wowo pa esey.

Sonia: Con bo kiermen?

Marlen: Laga mi mustra bo un ehempel na Exodo 3:7. Bo por les’e pa mi?

Sonia: Ta bon. E ta bisa: “SEÑOR a bisa: ‘Siguramente mi a mira e afliccion di mi pueblo cu ta  na Egipto, y [mi] a tende nan sclamacion pa motibo di nan capatasnan, pasobra mi ta consciente di nan sufrimentonan.’”

Marlen: Danki Sonia. Segun e texto, Dios ta mira ora hende ta sufri?

Sonia: Ta parce cu si.

Marlen: Anto ripara cu no ta djis un bista e ta tira. Wak e ultimo parti di e texto. Dios a bisa: “Mi ta consciente di nan sufrimentonan.” Sonia, un Dios indiferente lo bisa e palabranan ey?

Sonia: No, eigenlijk no.

Marlen: Claro cu tin un gran diferencia entre mira un hende sufri y sinti duele ora bo mir’e sufri.

Sonia: Esey ta berdad.

Marlen: Cu esey na mente, laga nos lesa di un otro ocasion ora e pueblo di Dios tabata sufri. E ta skirbi na Isaias 63:9. E prome parti di e versiculo ta bisa: “Den tur nan afliccion e tabata afligi.” Sonia, nos por bisa cu Dios a sinti duele ora el a mira su pueblo sufri?

Sonia: Si, ta parce cu si.

Marlen: Pues Sonia, ta asina cu Dios ta hopi interesa den nos y e no gusta mira nos sufri. Ora nos ta sufri, e ta sufri hunto cu nos.

DICON E NO TA HACI NADA?

Marlen: Sonia, prome cu mi bay, mi kier comparti algo mas cu bo.

Sonia: Dal bay.

Marlen: Wak kico Bijbel ta siña nos tocante e poder di Dios. Bo por lesa Jeremias 10:12?

Sonia: Sigur no! E ta bisa: “Ta el a traha tera cu su poder, el a establece mundo cu su sabiduria; y cu su conocemento el a span e cielonan.”

Marlen: Danki Sonia. Laga nos analisa e versiculo aki un rato. Cuanto poder bo ta kere Dios lo mester tabatin pa crea nos enorme universo y tur loke tin den dje?

Sonia: Masha hopi poder.

Marlen: Awor, si Dios tin asina tanto poder cu e por a crea tur loke tin rond di nos, no ta logico cu e tin poder pa controla tambe loke el a crea?

Sonia: Si.

Marlen: Pensa atrobe riba bo mama. Dicon ta duel bo asina tanto pa mir’e sufri?

Sonia: Pasobra mi stim’e, ta mi mama e ta.

Marlen: Si bo tabatin poder pa cur’e, lo bo no hacie?

Sonia: Sin pensa dos bes.

Marlen: Pensa riba esaki awor: E textonan cu nos a lesa den Bijbel a mustra nos cu Dios ta sinti duele ora e mira nos sufri y cu e tin poder pa caba mesora cu nos sufrimentonan. Pero el a domina su mes pa no haci esey. Bo por imagina cuanto esfuerso e tin cu haci?

Sonia: Nunca mi no a mir’e di e manera ey.

Marlen: Pero dicon Dios mester a domina su mes? Tin un bon motibo dicon e no a caba cu nos problemanan? *

Sonia: Mmm, mi ta kere cu lo e mester tin un motibo.

Marlen: Mi ta tende bo telefon ta ring, pues lo mi bin bek un otro biaha y nos por papia mas tocante e tema aki.

Sonia: Ta bon. Mi ta warda bo. *

Tin un topico di Bijbel en particular cu bo tin gana di sa mas di dje? Bo ta hopi interesa pa sa mas di e creencianan y practicanan religioso di Testigonan di Jehova? Si esey ta e caso, no duda pa bisa un Testigo esey. Lo e ta contento pa considera eseynan cu bo.

^ par. 61 Pa mas informacion, wak capitulo 11 di e buki Kico Bijbel Ta Siña Realmente? publica pa Testigonan di Jehova.

^ par. 64 Den un proximo articulo di e serie aki, nos lo trata dicon Dios ta permiti sufrimento.

Mas Informacion

E TOREN DI VIGILANCIA

Dicon Dios Ta Permiti Sufrimento?

E prome buki di Bijbel ta splica dicon Dios ta permiti cosnan malo pasa aunke e tin poder pa caba cu nan.